قاۋىپسىزدىك كەڭەسىنىڭ توراعاسى نۇرسۇلتان نازارباەۆ اسەت يسەكەشەۆتى قابىلدادى, دەپ حابارلايدى Egemen.kz ەلباسىنىڭ ءباسپاسوز قىزمەتىنە سىلتەمە جاساپ.
كەزدەسۋدە قازاقستاننىڭ تۇڭعىش پرەزيدەنتىنە 2025 جىلعا دەيىنگى ۇلتتىق قاۋىپسىزدىك ستراتەگياسى مەن ۇلتتىق قاۋىپسىزدىك قاتەرلەرىنىڭ الدىن الۋ جونىندەگى ءىس-ارەكەت جوسپارى بويىنشا جۇرگىزىلىپ جاتقان جۇمىستار, سونداي-اق قاۋىپسىزدىك كەڭەسىنىڭ كەزەكتى وتىرىسىنا دايىندىق بارىسى تۋرالى اقپارات بەرىلدى. وندا قارۋلى كۇشتەردى, باسقا دا اسكەر جانە كۇشتىك قۇرىلىمداردى 2030 جىلعا دەيىن قۇرۋ, دامىتۋ تۇجىرىمداماسىنىڭ جوباسى, سونىمەن بىرگە شەكاراداعى قاۋىپسىزدىكتى قامتاماسىز ەتۋ ماسەلەلەرى قارالادى.
سونىمەن قاتار ەلباسىعا ازاماتتاردىڭ قۇقىعى مەن بيزنەستى قورعاۋدى كۇشەيتۋ, ۋچاسكەلىك پوليتسيا ينسپەكتورلارىنىڭ ءرولىن ارتتىرۋ, قۇقىق قورعاۋ جۇيەسىن رەفورمالاۋ جۇمىستارى, سونداي-اق كيبەرقاۋىپسىزدىك پەن اقپاراتتىق كەڭىستىكتى قورعاۋ سالاسىندا قابىلدانعان شارالار تۋرالى باياندالدى.
كەزدەسۋدە نۇرسۇلتان نازارباەۆ سۋ تاسقىنى مەن سەلدەن قورعانۋ, ءورت قاۋىپسىزدىگى سىندى وزەكتى ماسەلەلەرگە, سونداي-اق پاندەميا اياقتالعاننان كەيىنگى كەزەڭدە ۇلتتىق ەكونوميكانى ءارى قاراي دامىتۋ ماسەلەلەرىنە نازار اۋداردى.
– ۇلتتىق قاۋىپسىزدىكتىڭ بارلىق اسپەكتىلەرىنە, سونىڭ ىشىندە ازىق-ت ۇلىك قاۋىپسىزدىگى مەن قۇقىق قورعاۋ جۇيەسىنىڭ جۇمىسىنا ودان ءارى تالداۋ جۇرگىزۋ كەرەك. قاۋىپسىزدىك كەڭەسىنىڭ كەلەسى وتىرىسىندا قارۋلى كۇشتەردى دامىتۋ ماسەلەلەرى تالقىلانادى. الداعى جيىنعا ساپالى دايىندىق جۇرگىزۋ قاجەت, – دەدى قازاقستاننىڭ تۇڭعىش پرەزيدەنتى.
قاۋىپسىزدىك كەڭەسىنىڭ حاتشىسى قۇقىق قورعاۋ جۇيەسىن كەزەڭ-كەزەڭىمەن رەفورمالاۋدىڭ العاشقى ناتيجەلەرى تۋرالى باياندادى. ءا.يسەكەشەۆتىڭ اقپاراتىنا سايكەس, نەگىزگى پروتسەسسۋالدىق شەشىمدەر بويىنشا پروكۋرورمەن كەلىسۋ ينستيتۋتىن ەنگىزۋ ازاماتتاردىڭ قىلمىستىق پروتسەستەگى كونستيتۋتسيالىق قۇقىقتارىنىڭ بۇزىلۋىن ۇشتەن بىرگە, نەگىزسىز قاماۋعا الىنعان ادامدار سانىن ەكى ەسە ازايتۋعا جول اشتى.
– بيىل قىلمىس دەڭگەيىنىڭ تومەندەۋ ءۇردىسى ساقتالىپ وتىر. ءبىرىنشى توقساندا بۇل كورسەتكىش 13,3 پايىزعا ازايدى, – دەدى قاۋىپسىزدىك كەڭەسىنىڭ حاتشىسى.
سونداي-اق ءا.يسەكەشەۆ 28-29 ساۋىردە دۋشانبەدە وتەتىن ۇجىمدىق قاۋىپسىزدىك تۋرالى شارت ۇيىمى قاۋىپسىزدىك كەڭەسى حاتشىلارى كوميتەتىنىڭ كەزەكتى وتىرىسىنا دايىندىق بارىسى تۋرالى باياندادى. اتالعان جيىندا وڭىرلىك قاۋىپسىزدىككە قاتىستى وزەكتى ماسەلەلەر, تەرروريزم مەن ەسىرتكى قىلمىسىنا قارسى كۇرەس جانە ءوزارا ءىس-ارەكەتتىڭ وزگە دە اسپەكتىلەرى تالقىلانادى.
سوڭىندا نۇرسۇلتان نازارباەۆ قاۋىپسىزدىك كەڭەسىنىڭ اپپاراتىنا بىرقاتار ناقتى تاپسىرما بەردى.