1 ساۋىردەگى جاعداي بويىنشا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسى اياسىندا مۇگەدەكتىگى بار 5,4 مىڭ ادام جۇمىسقا ورنالاستىرىلدى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
ونىڭ ىشىندە 1,1 مىڭنان استامى تۇراقتى جۇمىس ورنىمەن قامتىلسا, ال 4,3 مىڭى – الەۋمەتتىك جۇمىس ورىندارىنا, جاستار تاجىريبەسىنە جانە قوعامدىق جۇمىسقا تارتىلدى.
بۇدان باسقا 2021 جىلى مۇگەدەكتىگى بار ادامداردى جۇمىسقا ورنالاستىرۋ ءۇشىن جۇمىس بەرۋشىلەردىڭ ولاردى جاراقتاندىرۋ شىعىندارىن سۋبسيديالاۋ ارقىلى 113 ارنايى جۇمىس ورنى قۇرىلادى. بۇل جۇمىس ورىندارى حالىقارالىق تاجىريبە نەگىزىندە قۇرىلادى جانە كورۋ, ەستۋ, تىرەك-قيمىل جۇيەسى بۇزىلعان ادامداردىڭ جۇمىس ىستەۋى ءۇشىن جاعدايدى قامتاماسىز ەتۋدى كوزدەيدى. 2018 جىلدان باستاپ 350-گە جۋىق ءتيىستى جۇمىس ورنى اشىلدى. بيىل اتالعان باعىتقا 251,8 ملن تەڭگە ءبولىندى.
ەستەرىڭىزگە سالساق, 2020 جىلى, 25,5 مىڭنان استام مۇگەدەكتىگى بار ادامعا جۇمىسپەن قامتۋدى قولداۋدىڭ ءتۇرلى شارالارى كورسەتىلدى. ونىڭ ىشىندە 1,5 مىڭعا جۋىق ادام شاعىن نەسيە مەن گرانت الىپ, 15,4 مىڭى «ەڭبەك» مەملەكەتتىك باعدارلاماسى اياسىندا جۇمىسقا ورنالاستىرىلدى. جۇمىسپەن قامتۋدىڭ جول كارتاسى ارقىلى 2,2 مىڭ ازامات جۇمىسقا تۇردى. مۇگەدەكتىگى بار ادامدارعا ارنالعان جۇمىس ورىندارىن كۆوتالاۋ قاعيداسى شەڭبەرىندە, بىلتىر, جۇمىس بەرۋشىلەر 6,4 مىڭ ادامدى جۇمىسقا قابىلدادى.