قوستانايدا ءداستۇرلى تۇردە ءوتىپ كەلە جاتقان حالىقارالىق “التىن ميكرافون” بالالار ءان بايقاۋى بيىل وتە تارتىستى ءوتتى.
بولگاريادان, رەسەيدەن, وزبەكستاننان, بەلورۋسسيادان, قىرعىزستاننان جانە قازاقستاننىڭ بارلىق وبلىستارىنان كەلگەن 60 بالا بايقاۋدىڭ باس جۇلدەسى ءۇشىن ونەر دوداسىنا ءتۇستى. ءتورت مەملەكەتتىڭ ونەر قايراتكەرلەرىنەن, تانىمال مۋزىكا ماماندارىنان قۇرالعان قازىلار القاسىنا ەكى كۇن بويى بايقاۋدىڭ جۇلدەسىن ءبولۋ وڭايعا تۇسكەن جوق. – بالالاردى ولاردىڭ ورىنداۋ قابىلەتىنە عانا ەمەس, ورىنداۋ مانەرىنە قاراپ تا ءتۇرلى دەڭگەيگە بولۋگە بولادى. وسى جولى ازيالىق جانە ەۋروپالىق ءان ايتۋ مەكتەبى توقايلاستى. ءبىزدىڭ كىشكەنتاي انشىلەردىڭ تالانتىنا ەش كۇمان جوق, تاڭداي قاقتىردى, –دەيدى قازىلار القاسىنىڭ مۇشەسى, حالىقارالىق “بوزتورعاي” حالىقارالىق بالالار ءان بايقاۋىنىڭ ديرەكتورى قارلىعاش ابدىكارىموۆا. بالالاردىڭ تالانتى سىرتتان كەلگەن مۋزىكا ماماندارىن دا, كورەرمەندەردى دە تامسانتتى. ال وتكەن جىلى حالىقارالىق ءان كونكۋرستارىنىڭ باس جۇلدەلەرىن يەمدەنگەن قوستانايلىق ءۇش ءانشى دە وسى “التىن ميكروفون” بايقاۋىنىڭ “شاپانىنان شىققاندار” ەكەن. بۇل جولى بايقاۋدىڭ سوڭعى كۇنگى گالا-كونتسەرتىن وبلىس اكىمى سەرگەي كۋلاگين دە كەلىپ تاماشالادى, جەڭىمپازدارعا جۇلدە تاپسىردى. ءبىرىنشى ورىندى كىشى توپتىڭ اراسىندا بولگاريادان كەلگەن توعىز جاسار مارتين يوردانوۆ, ورتا توپتا الماتىلىق ازيز ناستوكوۆ, ەرەسەك توپتا قوستانايلىق ايدانا جاقىپوۆا يەلەندى.بايقاۋدىڭ باس جۇلدەسىن بەلورۋسسيادان كەلگەن جاس ءانشى داريا ميحايلوۆا قانجىعاسىنا بايلادى. پروديۋسەر ۆياچەسلاۆ اۆدەەۆتىڭ ايتۋىنشا, حالىقارالىق “التىن ميكرافون” بايقاۋى وتكەن سەگىز جىلدىڭ ىشىندە باس جۇلدە ءبىرىنشى رەت قازاقستاننان سىرتقا كەتتى. – كەزىندە كىشكەنتاي انشىلەردىڭ بايقاۋىنىڭ قوستانايدا ءوتۋىن قولداعانىمىزعا قازىر ەرەكشە قۋانىپ تۇرمىن. وسى جىلدار ىشىندە قانشاما تالانتتاردىڭ جۇلدىزى جارقىرادى, قانشاما بۇلاقتىڭ كوزىن اشتىق. كەلەسى جىلى “التىن ميكرافوننىڭ” تاعى دا قوستانايدا ءوتۋى ءۇشىن وعان بولىنەتىن قارجىنى ءۇش ەسە كوبەيتەمىز,–دەدى وبلىس اكىمى سەرگەي ۆيتالەۆيچ. ال بۇلاقتار وزەنگە قۇيادى... ءنازيرا جارىمبەتوۆا, قوستاناي.