ەكونوميكا بولجامى جاقسارا ءتۇستى (ۇكىمەت بيۋدجەت كىرىسى مەن شىعىسىن ارتتىردى)

ۆاكتسينامەن قامتۋ كەڭەيتىلەدى

قازىرگى جاعداي, حالىقتى ۆاكتسينالاۋ بارىسى جانە مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ بويىنشا قابىلدانىپ جاتقان شارالار تۋرالى دەنساۋلىق ساقتاۋ ءمينيسترى الەكسەي تسوي, اقتوبە وبلىسىنىڭ اكىمى وڭداسىن ورازالين, شىمكەنت قالاسىنىڭ اكى­مى مۇرات ايتەنوۆ, ماڭعىستاۋ وبلى­سىنىڭ اكىمى سەرىكباي ترۇموۆ باياندادى.

ۆيرۋستىڭ رەپرودۋكتيۆتى كورسەتكىشى رەسپۋبليكا بويىنشا 1,065 قۇرايدى. ينفەكتسيالىق توسەك ورىندارىنىڭ جۇكتەمەسى – 41%, رەانيماتسيالىق توسەك ورىندارى – 27%. قازىرگى ۋاقىتتا Covid-19 تارالۋ قارقىنى بويىنشا «قىزىل ايماقتا» نۇر-سۇلتان, الماتى جانە شىمكەنت قالالارى, اتىراۋ, باتىس قازاقستان, اقمولا, قاراعاندى جانە اقتوبە وبلىستارى تۇر. قوستاناي جانە تۇركىستان وبلىستارىن قوسپاعاندا, قال­عان بارلىق وڭىرلەر – «سارى ايماقتا». «حا­لىقتى, اسىرەسە قامتىلۋى تومەن وڭىرلەردە ۆاكتسينالاۋمەن قامتۋدى كەڭەيتۋ قاجەت. اي سايىن 2 ملن ادامدى ۆاكتسينامەن قام­تاماسىز ەتۋ جونىندەگى جوسپاردى ناقتى ورىنداۋ كەرەك», دەدى ا.مامين. 

پرەمەر-مينيستر كوروناۆيرۋس­پەن اۋىرىپ قالعان ناۋقاستارعا ساپالى مە­ديتسينالىق كومەك كورسەتۋگە جانە ءدارى-دارمەكتەردىڭ بولۋىنا تۇراقتى مونيتورينگ جۇرگىزۋدى تاپسىردى. اكىم­دىكتەرگە دەنساۋلىق ساقتاۋ, ىشكى ىستەر مينيسترلىكتەرىمەن, «اتامەكەن» ۇكپ-مەن بىرلەسىپ, ءموبيلدى مونيتورينگتىك توپ­تاردىڭ بەلسەندى قاتىسۋىمەن حالىقتىڭ سانيتارلىق-ەپيدەميالىق تالاپتاردى ساقتاۋىن قامتاماسىز ەتۋ تاپسىرىلدى.

ۇكىمەت وتىرىسىندا قازاقستاننىڭ 2021-2025 جىلدارعا ارنالعان الەۋمەتتىك-ەكونوميكالىق دامۋىنىڭ ناقتىلانعان بولجامى جانە 2021-2023 جىلدارعا ارنال­عان رەسپۋبليكالىق بيۋدجەت قارال­دى. ۇلتتىق ەكونوميكا ءمينيسترى اسەت ەر­عاليەۆ, قارجى ءمينيسترى ەرۇلان جا­ماۋباەۆ جانە پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ بايانداما جاسادى.

جىل باسىنان بەرى قازاقستان ەكونومي­كاسىنىڭ ءوسۋى بويىنشا جەدەل دەرەكتەردى جانە الەمدىك تاۋار نارىقتارىنداعى احۋال­دى, سونداي-اق الەمدىك ەكونوميكانىڭ ءوسۋ بولجامدارىن ەسكەرە وتىرىپ, ۇكىمەت 2021 جىلعا ارنالعان الەۋمەتتىك-ەكونوميكالىق دامۋ بولجامىنىڭ كورسەتكىشتەرى مەن ينديكاتورلارىن ناقتىلادى.

بيۋدجەت كىرىسى كوبەيە تۇسپەك

ۇلتتىق ەكونوميكا ءمينيسترى اسەت ەرعا­ليەۆتىڭ ايتۋىنشا, ماكروكورسەتكىشتەردىڭ بولجامى ەل ەكونوميكاسىنىڭ ءوسۋى بويىنشا جەدەل دەرەكتەردى, الەمدىك ەكونوميكا  مەن نارىقتاعى وڭ ۇردىستەردى ەسكەرە وتىرىپ, ناقتىلاندى. وسىلايشا, جىل باسىنان بەرى ەل ەكونوميكاسى ءوسىمىنىڭ قالپىنا كەلۋىنىڭ وڭ سەرپىنى بايقالۋدا. «ماسەلەن, ءىجو-ءنىڭ ءوسۋ قارقىنى قاڭتار ايىنداعى مينۋس 4,5%-دان ءبىرىنشى توقساننىڭ قورىتىندىسى بويىنشا مينۋس 1,6%-عا دەيىن جاقساردى», دەدى ءا.ەرعا­ليەۆ.

جىل باسىنان بەرى مۇنايدىڭ ورتاشا باعاسى باررەلىنە 61 دوللاردى قۇ­رادى. بۇل رەتتە مۇناي باعاسى بويىنشا دۇنيەجۇزىلىك قارجى ۇيىمىنىڭ بول­جامدارى 44 پەن 67 دوللار ارالى­عىن­دا بولىپ وتىر. وسىعان بايلانىس­تى, ماكروكورسەتكىشتەردى ناقتىلاۋ كە­زىن­دە مۇنايدىڭ ورتاشا جىلدىق باعا­سى باررەلىنە 50 دوللار دەڭگەيىندە ايقىن­دالدى (بۇرىن ماقۇلدانعاننان 15 دوللار جوعارى). «دۇنيەجۇزىلىك بانك ۆاكتسينالاۋ جۇرگىزۋدىڭ تيىمدىلىگىنە بايلانىستى الەمدىك ەكونوميكانىڭ ءوسۋىن 1,6%-دان 5%-عا دەيىن بولجاپ وتىر. جوعارىدا ايتىلعانداردى ەسكەرە وتىرىپ, ەل ەكونوميكاسىنىڭ ءوسۋ بولجامى 2,8%-دان 3,1%-عا دەيىن جاقساردى. بۇل رەتتە نومينالدى ىشكى جالپى ءونىم 77,8 ترلن تەڭگە كولەمىندە باعالانۋدا, بۇل ماقۇلدانعان بولجامنان 1,2 ترلن تەڭگەگە جوعارى», دەدى ءا.ەرعاليەۆ.

سىرتقى سۇرانىستى قالپىنا كەلتىرۋ اياسىندا مەتاللۋرگياداعى ءوندىرىستىڭ نەعۇر­لىم بەلسەندى ءوسۋى ەسەبىنەن وڭدەۋشى ونەركاسىپتەگى بولجامدى كورسەتكىشتەر 4,1%-دان 5,2%-عا دەيىن جاقساردى. قۇرى­لىستا جوسپارلانعان 17 ملن شارشى مەتر تۇرعىن ءۇيدىڭ پايدالانۋعا بەرۋىنە بايلانىستى بولجام 2,5%-دان 5%-عا دەيىن جاقساردى. اقپارات پەن بايلانىستا IT قىزمەتتەرگە سۇرانىستىڭ ءوسۋى ناتيجەسىندە بولجام 3,8%-دان 6,5%-عا دەيىن ۇلعايدى.

ۇلتتىق ەكونوميكا ءمينيسترى حابار­لاعانداي, ۇلتتىق بانكتىڭ بولجامى بويىن­شا ەكسپورت 10,8 ملرد دوللارعا ءوسىپ, 52,2 ملرد دوللارعا دەيىن ۇلعايادى (بۇرىن ماقۇل­دانعانى – 41,4 ملرد). يمپورت 37,1 ملرد دوللاردى قۇرايدى. ينفلياتسيا بۇ­رىن بەكىتىلگەن 4,0-6,0% دالىزىندە ساق­تالدى.

تۇزەتىلگەن ماكروەكونوميكالىق بولجام نەگىزىندە 2021 جىلعا ارنالعان رەسپۋب­ليكالىق بيۋدجەت پارامەترلەرى بولجا­مى ناقتىلاندى. رەسپۋبليكالىق بيۋدجەت­تىڭ كىرىستەرى (ترانسفەرتتەردى ەسەپكە الما­عاندا) 2021 جىلى 7 204 ملرد تەڭگە كولەمىندە باعالانادى, بۇل بەكىتىلگەن جوس­پاردان 279 ملرد تەڭگەگە جوعارى. «ۇلت­تىق قوردان كەپىلدەندىرىلگەن ترانسفەرت وزگەرمەيدى جانە 2 700 ملرد تەڭگە مول­شەرىندە ساقتالدى. Nur Otan پلات­فورماسىنىڭ ءىس-شارالارىن قارجى­لان­دىرۋ ءۇشىن ۇلتتىق قوردان نىسانالى ترانسفەرت 1 ترلن تەڭگەدەن 1 ترلن 850 ملرد تەڭگەگە دەيىن ۇلعايدى», دەدى ءا.ەرعاليەۆ.

رەسپۋبليكالىق بيۋدجەت شىعىستارى 15 334 ملرد تەڭگە كولەمىندە بولجانىپ وتىر, بۇل بەكىتىلگەن كورسەتكىشكە قا­را­عاندا 1 285 ملرد تەڭگەگە جوعارى. بيۋدجەت تاپ­شىلىعى ىشكى جالپى ونىمگە قاتىستى 3,5% دەڭگەيىندە بولجانىپ وتىر.

ءوز كەزەگىندە قارجى ءمينيسترى ەر­ۇلان جاماۋباەۆ ۇكىمەتتىڭ قاراۋىنا 2021 جىلعا ارنالعان رەسپۋبليكالىق بيۋد­­جەتتى ناقتىلاۋ تۋرالى زاڭ جوباسىن ۇسىندى. «ناقتىلاۋ كەزىندە Nur Otan پارتياسىنىڭ سايلاۋالدى باعدار­لاما­سىنىڭ ءىس-شارالارى مەن مەملەكەت باسشىسىنىڭ تاپسىرمالارى, ونىڭ ىشىندە جىل سايىنعى جولداۋلارى شەڭبەرىندە ايتىلعان ستراتەگيالىق باستامالارى ەسكەرىلدى. سونداي-اق پاندەمياعا قارسى كۇرەس جو­نىندەگى شارالار مەن بۇرىن قابىلدان­عان مىندەتتەمەلەر ەسكەرىلدى», دەدى ە.جاماۋباەۆ.

اتالعان باعىتتار بويىنشا بيۋدجەت شىعىستارى 1,3 ترلن تەڭگەگە ۇلعايىپ, 15,3 ترلن تەڭگەنى قۇرادى. بيۋدجەت شىعىستارى كەلەسى كوزدەر ەسەبىنەن ۇلعايتىلدى: 279 ملرد تەڭگە قوسىمشا تۇسىمدەر; 850 ملرد تەڭگە ۇلتتىق قوردان نىسانالى ترانسفەرت تارتۋ; بيۋدجەت تاپشىلىعىن ءىجو-ءنىڭ 3,5%-ىنا دەيىن جەتكىزۋ. بۇدان باسقا, پرەزيدەنتتىڭ باستامالارىنا ارنالعان رەزەرۆ قاراجاتىن قايتا ءبولۋ ىسكە اسىرىلدى. 

سايلاۋالدى باعدارلامانى قارجىلىق قامتاماسىز ەتۋ مىناداي نەگىزگى باعىتتار بويىنشا ىسكە اسىرىلاتىن بولادى: الەۋمەتتىك سالانى قولداۋ, قۇقىق ءتارتىبى مەن قاۋىپسىزدىكتى قامتاماسىز ەتۋگە – 182 ملرد تەڭگە; «جۇمىسپەن قامتۋدىڭ جول كارتاسى» جانە «ەڭبەك» مەملەكەتتىك باع­دار­لامالارىن, «اۋىل – ەل بەسiگi» جوباسىن ىسكە اسىرۋعا – 177 ملرد تەڭگە; اۋىل شارۋاشىلىعىن جانە تكش سالاسىن دامىتۋعا – 143 ملرد تەڭگە; رەس­پۋبليكالىق جانە جەرگىلىكتى جولداردى سالۋ, رەكونسترۋكتسيالاۋ, جوندەۋ جانە ۇستاۋعا – 140 ملرد تەڭگە; شوب-تى قول­داۋعا – 64 ملرد تەڭگە. ىندەتكە قارسى ءىس-شارالارعا قوسىمشا 265 ملرد تەڭگە ءبولىندى, ونىڭ ىشىندە كارانتيندىك ءىس-شارالارىن جۇرگىزۋگە تارتىلعان مەديتسينا قىزمەتكەرلەرىنە قوسىمشا اقى تولەۋگە – 70 ملرد تەڭگە; تمككك شەڭبەرىندە مەديتسينالىق قىزمەتتەرگە اقى تولەۋگە – 80 ملرد تەڭگە. مەملەكەت باسشىسىنىڭ باسىم تاپسىرمالارىن قارجىلاندىرۋعا 154 ملرد تەڭگە كوزدەلگەن. بيۋدجەتتىڭ قوسىم­شا شىعىستارىنىڭ جالپى كولەمىندە وڭىرلەرگە ترانسفەرتتەر 539 ملرد تەڭگەنى قۇرايتىن بولادى. «وسى شارالاردىڭ بارلىعى ەكونوميكانى ىنتالاندىرۋ مەن ازاماتتاردىڭ ءال-اۋقاتىن ارتتىرۋدىڭ نەگىزىن قالايدى. اعىمداعى جىلعا ارنال­عان رەسپۋبليكالىق بيۋدجەتتىڭ نەگىزگى پارامەترلەرى وسىنداي. وسى ماسەلەنىڭ ماڭىزدىلىعى مەن جەدەلدىگىن ەسكەرە وتىرىپ, زاڭ جوباسىن قولداۋدى سۇرايمىن», دەدى قارجى ءمينيسترى. 

مينيسترلەردىڭ ءسوزىن قورىتىندىلاي كەلە, پرەمەر-ءمينيستردىڭ ءبىرىنشى ورىن­باسارى ءا.سمايىلوۆ وسى ءىس-شارا­لاردى قارجىلاندىرۋ ءۇشىن بيۋدجەتتە بۇرىن بەكىتىلگەن شىعىستاردى قوسىمشا وڭتايلاندىرۋ بويىنشا جۇمىستار جۇر­گىزىلىپ, بيۋدجەت تاپشىلىعى ۇلعايتىلعانىن جانە ۇلتتىق قوردان نىسانالى ترانسفەرت تارتىلعانىن اتاپ ءوتتى. ۇسىنىلعان ناقتىلاۋ ازاماتتاردىڭ تۇرمىسىن جاقسارتۋ جانە ەكونوميكانى دامىتۋ جونىندەگى ماڭىزدى ءىس-شارالاردى ىسكە اسىرۋدى قامتاماسىز ەتەدى. وسى قاراجات ەسەبىنەن رەسپۋبليكالىق جانە جەرگىلىكتى دەڭگەيلەردە اۆتوموبيل جولدارىن دامىتۋ; «اۋىل – ەل بەسىگى» جوباسىن ودان ءارى ىسكە اسىرۋ; شوب-قا قولداۋ كورسەتۋ; جۇمىسپەن قامتۋدىڭ جول كار­تاسىن ىسكە اسىرۋدى جالعاستىرۋ; اۋىل شا­رۋاشىلىعىن دامىتۋ جۇزەگە اسىرى­لادى. «مۇنىڭ بارلىعى ورتا مەرزىم­دى كەزەڭدە ەكونوميكالىق ءوسۋ ءۇشىن كەرەك­تى نە­گىز قالاۋعا جانە ۇلتتىق قوردىڭ رەزەرۆ­تەرىن قالىپتاستىرۋ ساياساتىنا ورالۋعا مۇم­كىندىك بەرەدى. جالپى, بيۋدجەت تەڭگەرىمى قالىپتاستىرىلدى», دەدى ءا.سمايىلوۆ.

ءبىرىنشى ۆيتسە-پرەمەردىڭ ايتۋىنشا, جوعارىدا ايتىلعاندى ەسكەرە وتىرىپ بيۋدجەت قاراجاتىن بارىنشا ءتيىمدى پايدالانۋ كەرەك.  ماسەلەنى ۇكىمەت باسشىسى اسقار مامين قورىتىندىلادى. ونىڭ ايتۋىنشا, 2021 جىلى ەل ەكونوميكاسىنىڭ ءوسۋ بولجامى 2,8%-دان 3,1%-عا دەيىن جاقساردى.

ەكونوميكانىڭ ءوسۋ بولجامى 3,1%-عا دەيىن ۇلعايتىلدى

مۇناي باعاسى باررەلىنە 50 (بۇرىن 35) دوللار, ۇلتتىق ۆاليۋتا باعامى – ءبىر دوللارعا 425 تەڭگە (بۇرىن 420 تەڭگە) دەڭگەيىندە بولجانۋدا. سىرتقى سۇرانىستى قالپىنا كەلتىرۋ اياسىندا مەتاللۋرگياداعى ءوندىرىستىڭ نەعۇرلىم بەلسەندى ءوسۋى ەسەبىنەن وڭدەۋ ونەركاسىبىندەگى بولجامدى كورسەتكىشتەر 4,1%-دان 5,2%-عا دەيىن جاقساردى. قۇرىلىستا بولجام 17 ملن شارشى مەتر تۇرعىن ءۇيدى پايدالانۋعا بەرۋ جوسپارىنا بايلانىستى 2,5%-دان 5%-عا دەيىن جاقساردى. اقپارات پەن بايلانىس سالاسىندا ات قىزمەتتەرگە سۇرانىستىڭ ءوسۋى ناتيجەسىندە بولجام 3,8%-دان 6,5%-عا دەيىن ۇلعايدى.

ۇلتتىق بانكتىڭ بولجامى بويىنشا ەكسپورت 10,8 ملرد دوللارعا – 52,2 ملرد دوللارعا دەيىن ۇلعايادى. ينفلياتسيا بۇعان دەيىن بەكىتىلگەن 4,0-6,0% دالىزىندە ساقتالدى.

سونىمەن قاتار تۇزەتىلگەن ماكروەكو­نوميكالىق بولجام نەگىزىندە 2021 جىلعا ارنالعان رەسپۋبليكالىق بيۋدجەت پارامەترلەرىنىڭ بولجامى دا ناقتىلاندى. وسى جىلعا ارنالعان ناقتىلانعان بيۋدجەت شىعىستارىنىڭ نەگىزگى باعىتتارى – Nur Otan پارتياسىنىڭ باعدارلاماسىن جانە مەملەكەت باسشىسىنىڭ 2020 جىلعى 1 قىركۇيەكتەگى قازاقستان حالقىنا ارناعان جولداۋىن ىسكە اسىرۋدى قامتاماسىز ەتۋ. سونداي-اق شىعىندار پاندەمياعا قارسى كۇرەس جونىندەگى ءىس-شارالاردى قارجىلاندىرۋعا جانە دەنساۋلىق ساقتاۋ جۇيەسىن جاڭعىرتۋعا, ەكونوميكانىڭ ناقتى سەكتورىن ىنتالاندىرۋعا باعىتتالادى.

پرەمەر-مينيستر ەلىمىزدىڭ الەۋ­مەتتىك-ەكونوميكالىق دامۋىنىڭ 2021-2025 جىلدارعا ارنالعان بولجامىن جانە 2021-2025 جىلدارعا ارنالعان ناق­تى­لانعان رەسپۋبليكالىق بيۋدجەت تۋرالى زاڭ جوباسىن پارلامەنتكە ەنگىزۋدى تاپسىردى.

اۋىلداعى تۇرمىس جاقسارا تۇسەدى

ۇكىمەت وتىرىسىندا اۋىلدىق جەر­لەردە تۇرمىس دەڭگەيىن ارتتىرۋ ماسە­لەلەرى قارالدى. اۋىلدا ءومىر ءسۇرۋ ساپاسىن جاقسارتۋ بويىنشا اتقارىلىپ جات­قان جۇمىستار تۋرالى ۇلتتىق ەكونوميكا ءمينيسترى اسەت ەرعاليەۆ, اۋىل شارۋاشىلىعى ءمينيسترى ساپار­حان وماروۆ, يندۋستريا جانە ينفرا­قۇرىلىمدىق دامۋ ءمينيسترى بەيبىت اتامقۇلوۆ, ەنەرگەتيكا ءمينيسترى نۇرلان نوعاەۆ, دەنساۋلىق ساقتاۋ ءمينيسترى الەكسەي تسوي, ءبىلىم جانە عىلىم ءمينيسترى اسحات ايماعامبەتوۆ, مادەنيەت جانە سپورت ءمينيسترى اقتوتى رايىمقۇلوۆا بايانداما جاسادى. Nur Otan پارتيا­سى­نىڭ سايلاۋالدى باعدارلاماسىن ىسكە اسىرۋ اياسىندا دامۋ الەۋەتى جوعارى 3,5 مىڭ اۋىل­دى اۋقىمدى جاڭعىرتۋ جۇمىستارى جۇر­گىزىلىپ جاتىر, وندا اۋىل حالقىنىڭ 87%-ى تۇرادى, بۇل – شامامەن 7 ملن ادام.

ءبىرىنشى كەزەكتە, اۋىل تۇرعىندارىنىڭ تۇرمىس ساپاسىن ارتتىرۋ ءۇشىن ينفراقۇ­رىلىمدى جاڭعىرتۋ جۇمىستارى جۇرگى­زىلۋدە. 2025 جىلدى قوسا العاندا, جەرگى­لىكتى ماڭىزى بار 27 مىڭ شاقىرىم جول سالى­نىپ, جوندەلەدى. اۋىلداردا 24 ملن شار­شى مەتر تۇرعىن ءۇي پايدالانۋعا بەرى­لەدى. اوك سالاسىندا 500 مىڭ جۇمىس ورنىن قۇرۋمەن 845 جوبا, 350 مىڭ فەر­مەر­لىك جانە ءۇي شارۋاشىلىقتارىن تارتۋمەن 7 ەكوجۇيە جۇزەگە اسىرىلاتىن بولادى.

قابىلدانىپ جاتقان شارالار 1 ملن اۋىل تۇرعىنىنىڭ تابىسىن ارتتىرۋعا مۇمكىندىك بەرەدى. اۋىل تۇرعىندارىنىڭ 100%-ى ساپالى اۋىز سۋمەن, 60%-ى تابيعي گازبەن قامتاماسىز ەتىلەدى. دەنساۋلىق ساقتاۋ سالاسىندا بەس جىل ىشىندە 1 095 نىسان جوندەلىپ, سالىنادى. بۇل حالىقتى مەديتسينالىق قىزمەت كورسەتۋمەن قامتۋدى 2 ەسەگە ۇلعايتۋعا مۇمكىندىك بەرەدى. 5 جىل ىشىندە 5 مىڭ مەكتەپ جاڭعىرتىلىپ, 315 اۋىل مەكتەبى سالىنادى. اۋىل وقۋشىلارىن قوسىمشا بىلىممەن بارىنشا قامتۋ جانە قالا مەن اۋىل اراسىنداعى ءبىلىم ساپاسىنداعى الشاقتىقتى قىسقارتۋ بويىنشا جۇمىس جۇرگىزىلۋدە.

2025 جىلعا قاراي 748 مادەنيەت نىسانى مەن 1 719 سپورت نىسانى جوندەلىپ, سالىنادى. بيىل 480 اۋىلدى جاڭعىرتۋعا 105 ملرد تەڭگە ءبولىندى. «باستى مىندەت – اۋىلدا تۇرمىس ساپاسىن ارتتىرۋ», دەدى ا.مامين.

ۇكىمەت باسشىسى ۇلتتىق ەكونوميكا مينيسترلىگىنە اۋىلدىق اۋماقتاردى كەشەندى دامىتۋ جونىندەگى جۇمىستى ءتيىستى كورسەتكىشتەرمەن جانە بىرىڭعاي تاسىلمەن ۇيلەستىرۋدى تاپسىردى. اۋىل شارۋاشىلىعى مينيسترلىگىنە «بايتە­رەك» ۇبح» اق-پەن جانە اكىمدىكتەرمەن بىرلەسىپ, اۋىلدىق جەرلەردە كرە­ديت قاراجاتىنا قاجەتتىلىكتىڭ ۇلعايۋىن ەسكەرە وتىرىپ, اوك-ءتى تۇراقتى قار­جىلاندىرۋدى, سونداي-اق جوسپارلانعان بارلىق جوبالاردىڭ ىسكە اسىرىلۋىن قامتاماسىز ەتۋ تاپسىرىلدى. يندۋستريا, ەنەرگەتيكا, دەنساۋلىق ساقتاۋ, ءبىلىم جانە مادەنيەت مينيسترلىكتەرىنە وڭىرلەردىڭ اكىمدىكتەرىمەن بىرلەسىپ, بارلىق قاجەتتى شارالاردى قابىلداۋ جانە 2025 جىلعا قاراي اۋىلدىق اۋماقتاردى دامىتۋ بو­يىنشا نىسانالى ينديكاتورلارعا قول جەتكىزۋدى قامتاماسىز ەتۋ تاپسىرىلدى.