بيىل شىلدە ايىنان باستاپ ەلىمىزدە مىندەتتى اياق كيىمدى تسيفرلى تاڭبالاۋ ەنگىزۋ جوسپارلانعان. بۇل – بارلىق اياق كيىم وندىرۋشىلەر مەن يمپورتتاۋشىلار ءوز تاۋارلارىن ارنايى ەكى ولشەمدى Data Matrix كودىمەن تاڭبالاۋى كەرەك دەگەن ءسوز. بارلىق نورماتيۆتىك-قۇقىقتىق اكتىلەر بەكىتىلگەننەن كەيىن, الەمنىڭ باسقا ەلدەرىنەن, ونىڭ ىشىندە ەاەو-دان تسيفرلى تاڭبالاۋسىز تاۋار قازاقستان شەكاراسىنان وتە المايدى. تاڭبالانباعان اياق كيىمنىڭ قالدىقتارىن جىل بويىنا ساتۋعا بولادى.
جاڭا ەنگىزىلىم قازاقستاننىڭ اياق كيىم نارىعىنىڭ بارلىق قاتىسۋشىلارىنا – وندىرۋشىلەرگە, يمپورتتاۋشىلارعا جانە بولشەك ساۋدا دۇكەندەرىنە قاتىستى. اتاپ ايتقاندا, اياق كيىم اينالىمىنا قاتىسۋشىلار تاۋارلاردى تاڭبالاۋ مەن ونىڭ قاداعالانۋىنىڭ اقپاراتتىق جۇيەسىندە (تتقاج) تىركەلۋگە, سونداي-اق ءوز تاۋارلارىن ۇلتتىق كاتالوگتا تىركەۋگە ءتيىس بولادى. تاڭبالاۋ كودتارى اۆتوماتتى تۇردە تتقاج-دا جاسالادى. سودان كەيىن ولاردى Data Matrix-كە تۇرلەندىرۋگە جانە باسىپ شىعارۋ ءۇشىن جۇكتەۋگە بولادى.
«قازىر قازاقستاندا اياق كيىمدى مىندەتتى تسيفرلى تاڭبالاۋدى ەنگىزۋ ءۇشىن نورماتيۆتىك-قۇقىقتىق بازانى دايىنداۋ پروتسەدۋرالارى جۇرگىزىلىپ جاتىر. بىراق ءبىز يمپورتتاۋشىلارعا, وندىرۋشىلەرگە جانە بولشەك ساتۋشىلارعا نارىقتا جۇمىس ىستەۋدىڭ جاڭا ەرەجەلەرىنە قازىر دايىندالۋعا كەڭەس بەرەمىز. بيزنەس تسيفرلى تاڭبالاۋ پروتسەسىن نەعۇرلىم ەرتەرەك باستاسا, بارلىق كەزەڭدى زەرتتەۋگە ونىڭ كوپ ۋاقىتى بولادى», دەدى تسيفرلىق ەكونوميكانى دامىتۋ ورتالىعىنىڭ باس ديرەكتورى بيكەش قۇرمانعاليەۆا.
يمپورتتاۋشىلار تاۋارعا Data Matrix تسيفرلى تاڭبالاۋ كودىن تاۋار مەملەكەتتىك كەدەندىك راسىمدەردەن وتكەنگە دەيىن تاڭبالاۋى قاجەت. ءونىمدى باسقا ەلدەگى وندىرىستە نەمەسە قازاقستان رەسپۋبليكاسىنىڭ اۋماعىنداعى كەدەن قويماسىندا تاڭبالاۋعا بولادى. Data Matrix كودى تىكەلەي اياق كيىمگە, سونداي-اق تاۋارلىق جاپسىرماعا نەمەسە تۇتىنۋشى قاپتاماسىنا ەنگىزىلۋى مۇمكىن.
تسيفرلى تاڭبالاۋ نارىقتى ساپاسىز جانە قازاقستان اۋماعىنا زاڭسىز اكەلىنگەن ونىمدەردەن تازارتۋعا كومەكتەسەدى, سونداي-اق وتاندىق وندىرۋشىلەردى دامىتۋعا سەرپىن بەرەدى. تۇتىنۋشى دا ءوز پايداسىن الادى. بىرىنشىدەن, جاڭا تسيفرلى بەلگى ساتىپ الۋشى ءۇشىن ءونىمنىڭ زاڭدىلىعى تۋرالى بەلگى بولادى. ەكىنشىدەن, تۇتىنۋشى Naqty Onim ارنايى ءموبيلدى قوسىمشاسى ارقىلى Data Matrix كودىن سكانەرلەپ, تاۋار تۋرالى تولىق اقپارات الا الادى.
ەستەرىڭىزگە سالا كەتەيىك, قازاقستان رەسپۋبليكاسىندا تەمەكى ونىمدەرىن مىندەتتى تسيفرلى تاڭبالاۋ 2020 جىلعى 1 قازاننان باستاپ ەنگىزىلدى. 2022 جىلى فارماتسەۆتيكالىق پرەپاراتتاردى, الكوگول ونىمدەرىن جانە جەڭىل ونەركاسىپ تاۋارلارىن مىندەتتى تسيفرلى تاڭبالاۋدى ىسكە قوسۋ جوسپارلانۋدا.