اتىراۋ وبلىسى, قۇرمانعازى اۋدانى, كوپتوعاي اۋىلىندا سالىپ جاتقان شەكارا قورشاۋى وزگەرتىلىپ, قايتا سالىندى. ەندى اۋىز سۋدى ساعاتتاپ الىپ جۇرگەن كوپتوعايلىقتار قيعاش وزەنىنە بارا الاتىن بولدى, دەپ حابارلايدى Egemen.kz ۇقك شەكارا قىزمەتىنە سىلتەمە جاساپ.
وسىدان ءبىر كۇن بۇرىن اۋدان اكىمى مارات مۋرزيەۆ جەرگىلىكتى تۇرعىنداردىڭ نارازىلىعىن تۋدىرعان قيعاش وزەنى بويىنا ورناتىلعان شەكارا بەلگىلەرى الىنىپ تاستالعانىن ايتتى.
«بۇعان دەيىن 13 جانە 16 ءساۋىر كۇندەرى جەرگىلىكتى تۇرعىندارعا ءتۇسىندىرۋ جۇمىستارى جۇرگىزىلدى. قازىر مالدى سۋارۋ جانە ەگىن سۋارۋ ءۇشىن وزەنگە بارۋ مۇمكىندىگى قاراستىرىلدى. بۇعان ەشقانداي كەدەرگى جوق», دەدى اۋدان اكىمى.
جەرگىلىكتى حالىقتىڭ دۇرلىگۋى 14 ساۋىردە كوپتوعاي اۋىلى تۇسىندا قازاقستان مەن رەسەي شەكاراسىندا جاڭا شەكارالىق قورشاۋ سالۋدان باستالدى.
«بۇعان دەيىن شەكارالىق قورشاۋ قيعاش وزەنىنىڭ سالاسى «وتىز بەس» دەپ اتالاتىن وزەكتىڭ ارعى تۇسىندا بولاتىن. بۇل وزەك اۋىلعا جاقىن ورنالاسقان. ەندى كەلىپ ول قورشاۋدى وزەكتىڭ بەرگى جاعىنا شىعارىپ, اۋىلدىڭ ىرگەسىنەن ءبىر شىعاردى. اۋىل تەك مالمەن كۇنەلتەدى. اۋىز سۋ ساعاتپەن بەرىلەدى. ءبىز سول وزەكتىڭ سۋىن اۋىز سۋ رەتىندە دە, مالعا دا پايدالاناتىنبىز. بۇل شەكارالىق بەلگىنى نەگە جىلجىتتى. سوعان تۇسىنبەي دالمىز. نەگە بىزگە الدىن الا ايتپايدى. ءبىز ەندى قالاي كۇنەلتەمىز, اۋىز سۋدى قايدان تاسيمىز, مال قايدان سۋ ىشەدى؟ مالعا دا سەنىم جوق, شەكارادان ءوتىپ كەتسە, شەكارانى بۇزۋ بولىپ تابىلا ما؟», دەيدى كوپتوعاي اۋىلىنىڭ تۇرعىندارى.
جوعارىدا اتالعان جايتقا قاتىستى ۇقك شەكارا قىزمەتى مالىمدەمە جاسادى. ولار 2013 جىلدىڭ مامىر ايىندا ەكى شەكارا بەلگىسى اراسىنا ورناتىلعان قورشاۋلار رەسەي فەدەراتسياسىنىڭ اۋماعىنا 10-70 مەترگە ەنىپ كەتكەنىن, وسىعان بايلانىستى كوپتوعاي اۋىلىندا ينجەنەرلىك جۇمىستار جۇرگىزىلگەنىن ايتتى.