بەيبىت اتامقۇلوۆ جۇمىس ساپارىمەن جامبىل وبلىسىنا باردى

باسقوسۋدا «قازاۆتوجول» اق وبلىستىق فيليالىنىڭ باسشىسى ايجان تۋعانوۆا حابارلاعانداي, رەسپۋبليكالىق ماڭىزى بار «مەركى-شۋ-بۋرىلبايتال» اۆتوجولىنىڭ 262 شاقىرىمىن قايتا جاڭعىرتۋدىڭ باس مەردىگەرلەرى – «سين-سين» قۇرىلىس جانە دامىتۋ جونىندەگى قىتاي كومپانياسى» جشس جانە «ابك اۆتودور-نس» جشس. تاپسىرىس بەرۋشى – «قازاۆتوجول» ۇلتتىق كومپانياسى» اق. جوبا بويىنشا قيىرشىق تاستى-ماستيكالىق اسفالتبەتون توسەۋ جۇمىستارى قاراستىرىلعان. قۇرىلىستىڭ اياقتالۋ مەرزىمى – 2022 جىل.

مەردىگەر كومپانيالار قۇرىلىس-مونتاج جۇمىستارىن 2019 جىلدىڭ ءساۋىر ايىنان باستاپ جۇرگىزۋدە. بۇگىنگى تاڭدا جەتى ميلليون تەكشە مەتردەن استام جول توسەمى توسەلىنىپ, 250 سۋ وتكىزۋ قۇبىرى سالىنعان. ءبىر باعىت بويىنشا 173 شاقىرىم جول توسەمى توسەلىنىپ, 20 كوپىر مەن جول وتكەلدەرىنىڭ قۇرىلىسى بويىنشا جۇمىستار ورتاشا ەسەپپەن 70 پايىزعا اياقتالعان. 151 شاقىرىمدىق جول پايدالانۋعا بەرىلىپ ۇلگەرگەن.

كەڭەستە جالپى جول-قۇرىلىس سالاسىنا قاتىستى بىرقاتار وزەكتى ماسەلە سارالاندى دەسەك, سونىڭ ءبىرى – قۇرىلىس ماتەريالدارى باعاسىنىڭ ايتارلىقتاي ءوسۋى. «ابك اۆتودور-نس» جشس وكىلىنىڭ ايتۋىنشا, بۇگىندە بيتۋمنىڭ قۇنى تونناسىنا 138 مىڭ تەڭگەنى قۇرايدى. سونداي-اق, مەتالل قۇرىلىمدار, جانار-جاعارماي جانە باسقا دا ماتەريالدار قىمباتتاۋدا.

وبلىس اكىمى بەردىبەك ساپارباەۆ جۇمىسشىلار مەن تەحنيكانىڭ تاپشىلىعى بويىنشا قىتايلىق مەردىگەرگە قاتىستى شاعىمدار كوپ ەكەنىن اتاپ ءوتتى. جازباشا تۇردە باياندالعان جانە يندۋستريا جانە ينفراقۇرىلىمدىق دامۋ مينيسترلىگىنە جولدانعان باسقا دا سۇراقتار بارشىلىق.

- مينيسترلىك جولداردىڭ جاي-كۇيىنە, سونداي-اق قۇرىلىس ماتەريالدارىنىڭ باعاسىنا وبەكتيۆتى تالداۋ جۇرگىزەدى. مەردىگەرلەردىڭ جۇمىس تاجىريبەسى مەن مىندەتتەمەلەرىن ورىنداۋ ساپاسىنا قاراي ولاردىڭ رەيتينگىسىن ازىرلەيمىز. ءبىز جاۋاپكەرشىلىگى جوعارى ادال مەردىگەرلەر پۋلىن قۇرامىز, ول بويىنشا ەڭ جاۋاپتى قوسالقى مەردىگەرلىك ۇيىمداردىڭ كەلەسىدە باس مەردىگەر اتانۋ مۇمكىندىگىن قاراستىرا باستايمىز.

باس مەردىگەرلەر جۇمىستىڭ نەگىزگى كولەمىن قوسالقى مەردىگەرلىك ۇيىمداردىڭ موينىنا جۇكتەگەنى دۇرىس ەمەس. ولاردىڭ تاراپىنان ورىندالعان جۇمىس ءۇشىن تولەمنىڭ كەشىكتىرىلۋى تۋرالى دا كوپتەگەن شاعىمدار بار. ءبىز قوسالقى مەردىگەرلىك جۇمىستارمەن اينالىساتىن شاعىن كومپانيالاردى قولداۋ باعىتىن جالعاستىرامىز. ويتكەنى, كوپتەگەن قۇرىلىس جۇمىستارى سولارعا ارتىلعان.

قۇرىلىس ماتەريالدارى باعاسىنىڭ ءوسۋى – بۇل ورتاق ماسەلە. قارجى مينيسترلىگىمەن بىرلەسىپ, مەملەكەتتىك ساتىپ الۋ تۋرالى زاڭعا وزگەرىستەر ەنگىزۋ كەرەك. مونوپولياعا قارسى كوميتەتپەن اۋقىمدى جۇمىس جاساۋ ماڭىزدى. جالپى العاندا, جوبا ىسكە اسىرىلۋعا قابىلدانعان كەزدە قۇرىلىس ماتەريالدارىنىڭ باعاسى تۋرالى ماسەلە كوتەرىلۋى كەرەك. «قازاۆتوجول» اق باسشىلىعىنا جول كومپانيالارىنىڭ بارلىق كەلىسىم-شارتتارىن تالداۋدى, ال مەردىگەرلەرگە ءوز ۇسىنىستارىن جولداۋدى تاپسىرامىن.

قىتاي كومپانياسىنا قاتىستى شىعىس قازاقستان وبلىسىندا دا ماسەلەلەر بار. ەگەر سىزدەر قىتايدا جۇمىس ىستەسەڭىزدەر, سول 90 شاقىرىم جولدى 90 كۇندە رەتكە كەلتىرەر ەدىڭىزدەر, - دەدى بەيبىت اتامقۇلوۆ.

سونداي-اق, كەڭەستە پاۆلودارلىق «تەمىرماش» كومپانياسىنىڭ قوسالقى مەردىگەرى باس مەردىگەر «ابك اۆتودور-نس» جشس تاراپىنان تولەمدەردىڭ كەشىكتىرىلگەنىنە قاتىستى شاعىمداندى. مينيستر جەدەل تۇردە ورىندالعان جۇمىستارعا اقى تولەۋدى تاپسىردى.

جيىندا «تاراز» حيمپارك» اەا باسقارۋشى كومپانياسىنا قاتىستى دا از سىن ايتىلمادى.

- سوڭعى جىلدارى ءىس جۇزىندە ەشقانداي وزگەرىس جوق. وتكەن جىلى قانت زاۋىتىنىڭ قۇرىلىسى باستالۋى كەرەك ەدى, ءالى سول قالپىندا تۇر. ميللياردتاعان بيۋدجەت قارجىسى جۇمسالعانىمەن, ناتيجەسى جوق دەۋگە بولادى. سونىمەن قاتار, مۇندا ايتارلىقتاي جالاقىسى بار كوپتەگەن شتات اشىلعان. ەگەر جۇمىس ىستەيتىن جوبالارى بولماسا, ولار نە ءۇشىن اقشا الىپ وتىر؟ – دەدى وبلىس اكىمى بەردىبەك ساپارباەۆ.

بەلگىلى بولعانداي, باسقارۋشىلار شتاتى 147-دەن 75 ادامعا دەيىن قىسقارتىلعان. مۇندا 16 نىسان پايدالانۋعا بەرىلگەن دەسەك, ولار تەك ينجەنەرلىك ينفراقۇرىلىمعا عانا قاتىستى.

ايماق باسشىسى مينيسترگە «تاراز» حيمپارك» اەا-نى دامىتۋ ماسەلەسىن قاراستىرۋ ءۇشىن ارنايى سەلەكتورلىق كەڭەس شاقىرۋدى ۇسىندى. ۇسىنىس قابىلداندى.

- كەلىسەمىن, سالىنعان قاراجات اۋقىمدى, ولاردىڭ جۇمسالۋى بويىنشا ەسەپ بەرۋ كەرەكپىز. جولدارعا كەلەتىن بولساق, جول بويىنداعى قىزمەت كورسەتۋ نىساندارىن دامىتۋعا كۇش سالۋ قاجەت. باستى مىندەت – بيىل مەركى-شۋ-بۋرىلبايتال جولىنىڭ ءبىر باعىتىن اشۋ. قۇرىلىس ماتەريالدارىنىڭ باعاسىنا كەلەتىن بولساق, كەلىسىمشارتتاردىڭ باسقا جۇيەسىنە كوشەتىن كەز كەلدى دەپ ەسەپتەيمىن, - دەپ اتاپ ءوتتى بەيبىت اتامقۇلوۆ.

باسقوسۋ سوڭىندا وبلىس اكىمى بەردىبەك ساپارباەۆ جامبىل وبلىسىندا بيتۋم شىعاراتىن زاۋىت سالۋدى ۇسىندى.

- جەر ءبولۋ جانە ينفراقۇرىلىم جۇرگىزۋدە ەشقانداي ماسەلە بولمايدى. سونداي-اق, قۇرىلىس ۇيىمدارى بيزنەستىڭ الەۋمەتتىك جاۋاپكەرشىلىگى سياقتى تۇجىرىمدامانى ۇمىتپاۋى ءتيىس. جەرگىلىكتى جۇرتشىلىقتىڭ الەۋمەتتىك ماسەلەلەرىن شەشۋگە كومەكتەسىڭىزدەر, - دەدى ايماق باسشىسى.