كۇللى الەمگە تانىمال WorldSkills قوزعالىسى قازاقستاندا بەلسەندى دامىپ كەلەدى. وڭىرلىك جانە رەسپۋبليكالىق چەمپيوناتتاردى ۇيىمداستىرۋ مەن وتكىزۋ جۇيەسى جەتىلدىرىلىپ, ارىپتەستىك ينستيتۋتتارى مەن ساراپشىلار قوعامداستىعى دا دامىپ جاتىر. بۇل تۋرالى WorldSkills Kazakhstan باس اسسامبلەياسىنىڭ كەزەكتى وتىرىسىندا ايتىلدى, دەپ حابارلايدى Egemen.kz بعم ءباسپاسوز قىزمەتىنە سىلتەمە جاساپ.
قازاقستان WorldSkills باعدارلاماسىنا 2014 جىلى قاتىسىپ, WSI-ءنىڭ 70-ءشى مۇشەسى اتاندى. از ۋاقىتتىڭ ىشىندە قازاقستاندىق ستۋدەنتتەر الەمدىك چەمپيوناتتاردا جاقسى ناتيجەلەر كورسەتتى.
«WorldSkills قوزعالىسىنا ءبىز جەتىنشى جىل قاتارىنان قاتىسىپ كەلەمىز. وسى ۋاقىت ىشىندە قازاقستان 50-ورىننان 14-ورىنعا دەيىن كوتەرىلدى. 2019 جىلى ءبىزدىڭ ستۋدەنتتەر جالپىكوماندالىق ەسەپتە 63 قاتىسۋشى ەلدىڭ اراسىندا 14-ءشى ورىنعا يە بولعانىن ەستەرىڭىزگە سالا كەتەيىن. بۇل - جاقسى ناتيجە. قازاقستان جۇمىسشى مامانداردى دايارلاۋ سالاسىنداعى ۇزدىك پراكتيكالاردىڭ بەنچماركينگى ءۇشىن بۇل قوزعالىستى ودان ءارى دامىتاتىن بولادى. اتاپ ايتقاندا, ءبىز WorldSkills ستاندارتتارىن وقۋ پروتسەسىنە ەنگىزىپ, كوللەدجدەردە دەمونستراتسيالىق ەمتيحانداردى وتكىزەمىز. سونداي-اق ساراپشىلاردى وقىتۋ جانە سەرتيفيكاتتاۋ بويىنشا جۇمىستى ۇيىمداستىرامىز», دەدى ءبىلىم جانە عىلىم ۆيتسە-ءمينيسترى شولپان كارينوۆا.
2020 جىلى WorldSkills ستاندارتتارى بويىنشا دەمونستراتسيالىق ەمتيحان وتكىزۋ بويىنشا ۇسىنىستار ازىرلەنىپ, ەلىمىزدىڭ 36 كوللەدجىنە ەمتيحاننىڭ دەمو-نۇسقاسىن ەنگىزۋ باستالدى. سونىمەن بىرگە وتكەن جىلى WorldSkills قامقورشىلىق كەڭەسى قۇرىلدى. AgroSkills, Kazakhmys كورپوراتيۆتىك چەمپيوناتى جانە باسقا دا سالالىق باعىتتار بيزنەستىڭ قاتىسۋىمەن جەتىلدىرىپ كەلەدى.
WorldSkills – بۇل جۇمىسشى ماماندىقتارى بويىنشا كادرلاردى دايارلاۋ ساپاسىن ارتتىرۋعا جانە ولاردى جاستار اراسىندا تانىمال ەتۋگە باعىتتالعان حالىقارالىق قوزعالىس.