ەڭبەك جانە حالىقتى الەۋمەتتىك قورعاۋ مينيسترلىگى 5 باعىت بويىنشا «ەڭبەك» باعدارلاماسىن جۇزەگە اسىرۋدا. ونىڭ اياسىندا 649 مىڭ ادامعا كومەك كورسەتىلدى. بۇل تۋرالى ورتالىق كوممۋنيكاتسيالار قىزمەتى الاڭىندا وتكەن بريفينگتە ۆيتسە-مينيستر ەرجان ءبىرجانوۆ ءمالىم ەتتى, دەپ حابارلايدى Egemen.kz.
ەڭبەك داعدىلارىن دامىتۋ شەڭبەرىندە 18 مىڭنان استام ادام قىسقاشا كۋرستان وتسە, تاعى 18 مىڭ ادام تەحنيكالىق كاسىپتىك ءبىلىم الدى.
«كاسىپكەرلىكتى قولداۋ باعدارلاماسى شەڭبەرىندە «باستاۋ بيزنەس» جوباسى ىسكە اسىرىلدى. ونىڭ باراسىندا كاسىپكەرلىك جايلى كوپ ماعلۇمات بەرىلىپ, مەنەدجمەنت, ماركەتينگ ساباقتارى وتكىزىلدى, 45 مىڭ ادامعا قايتارىمسىز گرانت بەرىلدى. ميكرونەسيەلەر سانى 13 مىڭدى قۇرادى, قوسىمشا 14 مىڭ جۇمىس ورنى قۇرىلدى. سونىمەن قاتار, وسال توپتاعى ادامدارعا ارنالعان جۇمىس ورىندارىن سۋبسيديالاۋ باعىتى بويىنشا 150 مىڭ ادام قوعامدىق جۇمىسقا تارتىلدى. جاستار اراسىندا جۇمىسسىزدىقتى ازايتۋ ماقساتىندا «جاستار پراكتيكاسى» ەنگىزىلدى. بىلتىر 34 مىڭ ادام جۇمىسپەن قامتىلدى. الەۋمەتتىك جۇمىس ورنىنا 19 مىڭ ادام ورنالاستى», دەدى ۆەدومستۆو وكىلى.
«ەڭبەك» باعدارلاماسىنىڭ 4-باعىتى ەڭبەك رەسۋرستارىنىڭ ۇتىمدىلىعىن ارتتىرۋ بويىنشا وڭتۇستىك وڭىرلەردەن سولتۇستىك وڭىرلەرگە ەڭبەك رەسۋرستارىن تارتۋ قاراستىرىلعان. وتكەن جىلدىڭ قورىتىندىسى بويىنشا 1600 وتباسى نەمەسە 5800 ادام سولتۇستىككە قونىس اۋداردى. ونىڭ ىشىندە 3 مىڭ ادام ەڭبەككە جارامدى.