فۋتزالدان قازاقستان ۇلتتىق قۇراماسى 2022 جىلعى ەۋروپا چەمپيوناتىنىڭ ىرىكتەۋ كەزەڭىن جەڭىلىسسىز اياقتادى. بەسىنشى توپتا ماجارستان, يزرايل جانە بەلارۋس قۇرامالارىمەن سىنعا تۇسكەن جەرلەستەرىمىز التى ويىننىڭ بارىندە جەڭىسكە جەتىپ, 18 ۇپايمەن ءوز توبىندا ءبىرىنشى ورىن الدى.
قازاقستان قۇراماسى ىرىكتەۋ كەزەڭىندەگى سوڭعى ەكى ويىنىن يزرايل قۇراماسىمەن وتكىزدى. ەلوردادا ۇيىمداستىرىلعان العاشقى كەزدەسۋدە ءبىزدىڭ جىگىتتەر 4:1 ەسەبىمەن باسىم تۇسسە, 11 ساۋىردەگى قارىمتا ماتچتا قارسىلاستار قاقپاسىنا جاۋاپسىز ءتورت گول سوقتى. ءبىرىنشى ويىنداعىداي تاينان قارسىلاستار قاقپاسىن 2 جانە 25-مينۋتتاردا ءدال كوزدەپ, ءدۋبلدىڭ اۆتورى اتانسا, تيمۋر بالتاباەۆ (5-مينۋت) پەن جومارت توقاەۆ (22-مينۋت) ءبىر مارتە مەرگەندىگىمەن كوزگە ءتۇستى.
جەرلەستەرىمىز ەندى 2022 جىلدىڭ 19 قاڭتارى مەن 6 اقپانى ارالىعىندا نيدەرلاندتىڭ امستەردام جانە گرونينگەن قالالارىندا وتەتىن كەزەكتى ەۋروپا چەمپيوناتىنا دايىندالادى.