سەنات توراعاسى ماۋلەن اشىمباەۆ جاپونيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى تاتسۋحيكو كاسايمەن كەزدەستى, دەپ حابارلايدى Egemen.kz.
كەزدەسۋ بارىسىندا ەكى ەل ىنتىماقتاستىعىن ودان ءارى نىعايتۋ, ونىڭ ىشىندە پارلامەنتارالىق بايلانىستى ارتتىرۋ ماسەلەلەرى ءسوز بولدى. سەنات سپيكەرى قازاقستان ەلدە قولايلى ينۆەستيتسيالىق احۋال قالىپتاستىرۋعا باسا ءمان بەرىپ وتىرعانىن اتاپ ءوتتى.
ء«بىزدىڭ ەلىمىز شەتەلدىك ينۆەستورلاردى تارتۋ جانە ولاردىڭ قۇقىقتارىن قورعاۋ بويىنشا جۇرگىزىلىپ كەلە جاتقان بەلسەندى جۇمىستى ءارى قاراي جالعاستىرۋدا. مەملەكەت باسشىسىنىڭ تاپسىرماسىمەن وسى باعىتتاعى ءتيىستى زاڭدارعا قاجەتتى تۇزەتۋلەر ەنگىزىلدى. سوعان سايكەس, ەندى ينۆەستيتسيانىڭ كولەمى مەن مەرزىمىنە جانە جۇمىس ورنىنا بايلانىستى ينۆەستورلار كورپوراتيۆتى تابىس سالىعىنان, جەر سالىعىنان, قوسىمشا قۇن سالىعىنان جانە م ۇلىك سالىعىنان 10 جىلعا دەيىن بوساتىلادى. مۇنداي قادام ەل ەكونوميكاسىنا شەتەلدىك, ونىڭ ىشىندە جاپون ينۆەستورلارىن دا تارتۋ جانە قازىرگىدەي كۇردەلى ۋاقىتتا جاڭا جوبالاردى ىسكە اسىرۋ ءۇشىن قاجەت», – دەدى ماۋلەن اشىمباەۆ.
سونداي-اق, سەنات سپيكەرى قازاقستان مەن جاپونيا اراسىنداعى مادەني-گۋمانيتارلىق بايلانىستاردىڭ قارقىندى دامىپ كەلە جاتقانىنا نازار اۋداردى. وعان ت.رىسقۇلوۆ اتىنداعى قازاق ەكونوميكالىق ۋنيۆەرسيتەتى مەن م.نارىكباەۆ اتىنداعى قازاق مەملەكەتتىك زاڭ ۋنيۆەرسيتەتىندە جاپون ءتىلىن وقىتاتىن ورتالىقتاردىڭ جۇمىس ىستەۋى دالەل. ودان بولەك, ماۋلەن اشىمباەۆ پاندەميا كەزەڭىندە ەلىمىزگە كومەك قولىن سوزعان جاپونيا ۇكىمەتىنە العىسىن ءبىلدىردى.
«قازاقستانداعى مەديتسينالىق مەكەمەلەرگە جاپون مەديتسينالىق قوندىرعىلارىن الۋ ءۇشىن ارنايى گرانت بولگەن جاپونيا ۇكىمەتىنە العىسىمىزدى بىلدىرەمىز. بۇل كومەكتى قازىرگىدەي كۇردەلى كەزەڭدە دوستىق پەن ءوزارا ءتيىمدى جانە سەنىمدى سەرىكتەستىكتىڭ جارقىن كورىنىسى دەپ قابىلدايمىز», – دەدى سەنات توراعاسى.
سونىمەن قاتار پالاتا سپيكەرى قازاقستان سەناتى ەكىجاقتى ىنتىماقتاستىقتى جانە قازاقستان مەن جاپونيا اراسىنداعى پارلامەنتارالىق قارىم-قاتىناستى ودان ءارى نىعايتۋ ءۇشىن ءتيىستى جۇمىستى جالعاستىرا بەرەتىنىن ايتتى.