ارىس قالاسىنا جاڭا اكىم تاعايىندالدى

جاڭا اكىمدى قالا اكتيۆىنە ارنايى تانىستىرعان ومىرزاق ەستاي ۇلى ونىڭ الداعى جۇمىسىنا ساتتىلىك تىلەي وتىرىپ, ابىرويلى ەڭبەك ەتەتىنىنە سەنىم ءبىلدىردى.

وبلىس اكىمى ارىس قالاسىنىڭ جاڭا باسشىسىنىڭ الدىنا ءوڭىردىڭ الەۋمەتتىك-ەكونوميكالىق دامۋى, قوعامداعى بىرلىك پەن كەلىسىمدى نىعايتۋ بويىنشا بىرقاتار مىندەتتەر جۇكتەپ وتىر.

«ارىس - وتە ماڭىزدى اۋماق. قالادا جاسالاتىن جۇمىستار جەتكىلىكتى. شاعىن جانە ورتا بيزنەس سالاسىن, اۋىل شارۋاشىلىعى سالاسىن دامىتۋ كەرەك. ەڭ باستىسى بيزنەستى جانداندىرىپ, ينۆەستيتسيا تارتۋ كەرەك. ول ءۇشىن بارلىق مۇمكىندىكتەر بار. گۇلجان مامىتقىزى وتە تاجىريبەلى. بيۋدجەت, قارجى, الەۋمەتتىك سالالارىندى جەتىك مەڭگەرگەن. ءوزىمنىڭ كەڭەسشىم بولعان. تاجىريبەسى مول, ەڭبەكقور ازامات. الدا اتقارىلار ىستەر كوپ», دەدى وبلىس اكىمى.

ارىس قالاسىنىڭ جاڭا اكىمى گۇلجان قۇرمانبەكوۆا وزىنە ارتىلعان سەنىمدى اقتاپ, ارىستىڭ دامۋى مەن وركەندەۋى جولىندا بار كۇش-جىگەرىن جۇمسايتىنىن جەتكىزدى.

گۇلجان قۇرمانبەكوۆا 1965 جىلى وتىرار اۋدانىندا دۇنيەگە كەلگەن. 1987 جىلى الماتى حالىق شارۋاشىلىق ينستيتۋتىن ءبىتىردى. ەڭبەك جولىن ءشاۋىلدىر جولاۋشىلار اۆتوكولىگى مەكەمەسىنىڭ كاسسيرى بولىپ باستاعان.

1987 ­– 1992 جىلدارى قىزىلقۇم اۋداندىق قارجى ءبولىمىنىڭ كىرىس ەسەبىنىڭ ينسپەكتورى, تەكسەرۋشى –ينسپەكتورى, اعا ەكونوميستى قىزمەتتەرىن اتقارعان. 1992 – 2004 جىلدارى وقو قالالىق قارجى ءبولىمىنىڭ اعا تەكسەرۋشى-ينسپەكتورى, باس ەكونوميست, باس مامان-باس ەكونوميستى.

2004 – 2005 جىلدارى – وقو ءبىلىم دەپارتامەنتىنىڭ باس مامانى, شىمكەنت قارجى ءبولىمى مەڭگەرۋشىسىنىڭ ورىنباسارى. 2007 – 2010 جىلدارى – شىمكەنت قالاسىنىڭ قارجى ءبولىمىنىڭ باستىعى. 2010 – 2020 جىلدارى – شىمكەنت قالاسىنىڭ ەكونوميكا جانە قارجى ءبولىمىنىڭ باستىعى, شىمكەنت قالاسى اكىمىنىڭ ورىنباسارى قىزمەتىن اتقاردى. 2020 جىلدان بەرى تۇركىستان وبلىسى اكىمىنىڭ ەكونوميكا, قارجى ماسەلەلەرى بويىنشا كەڭەسشىسى بولدى.

«قازاقستان رەسپۋبليكاسىنىڭ كونستيتۋتسياسىنا 10 جىل», «قازاقستان رەسپۋبليكاسىنىڭ تاۋەلسىزدىگىنە 25 جىل» مەرەيتويلىق مەدالدارىمەن, «ەرەن ەڭبەگى ءۇشىن» مەدالىمەن ماراپاتتالعان.