تۇركىستان قالاسى – ەۋرازيا دۇنيەجۇزىلىك مۇراسى قالالارى قاتارىنا رەسمي تۇردە بيىل اقپاندا قابىلدانعان بولاتىن. وسى ورايدا ۇيىمنىڭ X مەرەيتويلىق كونفەرەنتسياسىن جۋىردا تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتىندە تۇركىستان قالاسىندا وتكىزۋ ۇسىنىلعان.
دۇنيەجۇزىلىك مۇرا قالالارى ۇيىمىنىڭ سەرىكتەستىگى شەڭبەرىندە ۇيىمداستىرىلعان كونفەرەنتسياعا تاريحي-مادەني قۇندىلىقتاردى ساقتاۋدا وزىق تاجىريبەلى يران, رەسەي, سەربيا, تۇركيا, پولشا, گرەتسيا, يندونەزيا, گەرمانيا, ماروككو, البانيا, قىرعىزستان, وزبەكستان جانە قىتاي سىندى الەمنىڭ 23 ەلىنەن 50-دەن استام قالانىڭ وكىلدەرى قاتىستى. ونلاين-كونفەرەنتسيا اياسىندا ەجەلگى مۇرا مەن مادەنيەتتى ساقتاۋ, ءتۋريزمدى دامىتۋ, قالانى دۇرىس جوسپارلاۋ جانە اباتتاندىرۋ, جاڭا قۇرىلىستار سالۋ جاعدايىندا ونىڭ تاريحي تارتىمدىلىعىن ساقتاۋ ماسەلەلەرى تالقىلاندى. تۇركىستان قالاسىنىڭ اكىمى راشيد ايۋپوۆ ءوز سوزىندە بيىل تۇركىستاننىڭ جاسىنا قاتىستى سەنساتسيالىق جاڭالىق جاريا ەتىلگەنىن اتاپ ءوتتى. «2020 جىلى ءبىز «تۇركىستان قالاشىعىنىڭ ستراتيگرافياسى» جوباسىن قولعا الدىق, ونىڭ اياسىندا ەجەلگى قالانىڭ ارحەولوگيالىق كەشەندەرى قارالدى. قازبا جۇمىستارى بارىسىندا تۇركىستان جەرىندە ءبىزدىڭ داۋىرىمىزگە دەيىنگى XVI-XIV عاسىرلارعا ءتان قونىستىڭ پايدا بولۋىنىڭ دالەلدەرى تابىلدى. قالانىڭ وڭتۇستىك شەتىندە ورنالاسقان شەرباي قورىمىنان تابىلعان قولا ءداۋىرىنىڭ كەشەنى تۇركىستاننىڭ جاسىن ءۇش مىڭ جىل دەپ انىقتادى», دەدى راشيد ابات ۇلى. سونداي-اق تۇركىستان قالاسىنىڭ اكىمى ءتۋريزمدى دامىتۋ, بىرلەسكەن تۋريستىك تۋرلاردى قۇرۋ, تىكەلەي اۋە قاتىناسىن ۇلعايتۋ, جاستاردى تەگىن وقىتۋ بويىنشا تاجىريبە الماسۋ جانە گۋمانيتارلىق كومەك سياقتى دۇنيەجۇزىلىك مۇرا قالالارىن ۇيىمداستىرۋعا قاتىسۋشى ەلدەر اراسىنداعى ىنتىماقتاستىق سالالارىن كەڭەيتۋ تۋرالى باستاما كوتەردى. بۇل باستامانى ۇيىمنىڭ بارلىق مۇشەلەرى قولدادى.
جيىن سوڭىندا ەۋرازيانىڭ دۇنيەجۇزىلىك مۇرا قالالارى ۇيىمىنىڭ X حالىقارالىق كونفەرەنتسياسىنىڭ دەكلاراتسياسى قابىلداندى.