تۇركىستان وبلىسىنىڭ پوليتسەيلەرى بىرنەشە رەت ۇرلىق جاساعان زەينەتكەردى ۇستادى, دەپ حابارلايدى Polisia.kz.
وتىرار اپب-نە جەرگىلىكتى تۇرعىن ۇرىنىڭ قۇربانى بولعاندىعى جونىندە حابار بەرىپ, كومەك سۇراعان. جابىرلەنۋشى ايەلدىڭ ايتۋىنشا, ءوزى جۇمىس ىستەيتىن ەمحانانىڭ قىزمەتتىك بولمەسىندە تۇرعان قول سومكەسىنەن بەلگىسىز ازامات جاسىرىن تۇردە اقشا ۇرلاپ كەتكەن. كەلتىرىلگەن شىعىننىڭ كولەمى 50 000 تەڭگە. پوليتسيا قىزمەتكەرلەرى اتالعان جايتتى قر قك-ءنىڭ 188-بابى “ۇرلىق” بويىنشا تىركەدى.
وتىرار اۋدانىنىڭ پوليتسەيلەرى اتالمىش قىلمىستى اشۋ ماقساتىندا وقيعا ورنىنا تەز ارادا كەلىپ, قاجەتتى شارالاردى جۇزەگە اسىردى. جاقىن ايماقتاردى مۇقيات تەكسەرىپ شىعىپ, كورگەن-بىلگەندەردەن جاۋاپ الدى. ناتيجەسىندە كۇدىكتى انىقتالىپ, ءوز ۇيىندە ۇستالدى. ۇستالعان ەر ادام جەرگىلىكتى زەينەتكەر بولىپ شىقتى.
قازىرگى تاڭدا وسى وقيعاعا قاتىستى تەرگەۋ امالدارى جۇرگىزىلۋدە. تەرگەۋ بارىسىندا كۇدىكتىنىڭ وسىدان باسقا تاعى ەكى ۇرلىق جايتىنا قاتىستىلىعى انىقتالدى. وندا جابىرلەنۋشىلەرگە جالپى 40 000 تەڭگەگە جۋىق شىعىن كەلتىرىلگەن.