باتىس قازاقستان وبلىسىندا «مەنىڭ اۋلام – مەنىڭ باعىم» جوباسى باستالعانىن بۇدان بۇرىن حابارلاعان بولاتىنبىز. بۇل جوباعا تۇرمىسى تومەن وتباسىلاردان بولەك, مەكتەپ وقۋشىلارى دا قاتىساتىن بولدى. باعبان وقۋشىلارعا جاز كەزىندە 42 500 تەڭگە جالاقى تولەنبەك, دەپ حابارلايدى Egemen.kz
بۇل تۋرالى الەۋمەتتىك جەلىدەگى پاراقشاسىندا حابارلاعان باتىس قازاقستان وبلىسىنىڭ اكىمى عالي ەسقاليەۆ قازىردىڭ وزىندە وڭىردە 1270 ادام باقشا وتىرعىزۋعا تاپسىرىس بەرگەنىن ايتتى. سونىڭ ىشىندە 54 ادام مەملەكەت تاراپىنان بەرىلەتىن گرانت ەسەبىنەن جوباعا قاتىسپاق. نيەت بىلدىرۋشىلەردىڭ كوپشىلىگى تاسقالا, اقجايىق, قاراتوبە, بوكەيورداسى جانە شىڭعىرلاۋ اۋداندارىنان ەكەن. تۇرعىندار كوبىنەسە الما, ورىك, شيە, المۇرت, تاڭقۋراي, قۇلپىناي جانە جۇزىمگە تاپسىرىس بەرگەن.
«بۇل جوبا وتە ماڭىزدى ەكەنىن وسىعان دەيىن اتاپ وتكەن بولاتىنمىن. وسى رەتتە, جوبانى ىسكە اسىرۋعا جانە حالىق اراسىندا كەڭىنەن ناسيحاتتاۋعا ءوز ۇلەستەرىن قوسىپ كەلە جاتقان ەرىكتىلەرگە, بلوگەرلەرگە, اۋىلدىق وكرۋگ اكىمدەرىنە العىسىمدى بىلدىرەمىن» دەيدى عالي ەسقاليەۆ.
«مەنىڭ اۋلام – مەنىڭ باعىم» جوباسىنىڭ ءبىر ەرەكشەلىگى – وقۋشىلارىن ەڭبەككە باۋلىپ, باۋ-باقشا جۇمىسىنا تارتۋ ءۇشىن ورال قالاسى جانە 12 اۋداننان 70 مەكتەپ تاپسىرىس بەرگەن. جازعى دەمالىس كەزىندە مەكتەپ جانىنداعى باۋ-باقشادا جۇمىس ىستەۋگە قۇلشىنىس بىلدىرگەن بالالارعا جەرگىلىكتى اكىمدىك ايىنا 42,5 مىڭ تەڭگە تولەيتىن بولدى. بۇل ىسكە 14 جاستان اسقان وقۋشىلار تارتىلماق.
اتالعان جوباعا قاتىسۋشىلارعا جەرگىلىكتى اۋا-رايىنا جەرسىندىرىلگەن جەمىس اعاشتارىنىڭ كوشەتى بەرىلمەك. جانە ولارعا تاجىريبەلى تالىمگەرلەر كەڭەس بەرەتىن بولادى. جەرگىلىكتى اكىمدىك بۇل جەمىس اعاشتارىنىڭ ءونىمىن مەملەكەتتىك ساتىپ الۋ ءىسىن دە ۇيىمداستىرۋعا ۋادە بەرىپ وتىر.
ورال قالالىق ءبىلىم ءبولىمىنىڭ اقپاراتىنا قاراعاندا, «مەنىڭ اۋلام – مەنىڭ باعىم» جوباسىنا وبلىس ورتالىعىنداعى ءبىلىم نىساندارى تۇگەل قاتىسپاق. ودان بولەك, ورال قالالىق اكىمدىگى مەن قالالىق ءبىلىم بەرۋ ءبولىمى بىرلەسىپ باستاعالى وتىرعان «مەكتەپ. الما باعى. وقۋشى» جوباسىنا قالانىڭ جەتى مەكتەبىنەن 120 وقۋشى قاتىسۋعا ىقىلاس ءبىلدىرىپتى. بۇل وقۋشىلارعا دا ورال قالالىق جۇمىسپەن قامتۋ ورتالىعى 42 500 تەڭگە ايلىق جالاقى تولەيدى.
تۇرمىسى تومەن وتباسىلاردى قولداۋعا ارنالعان «ەڭبەك» باعدارلاماسىن جەتىلدىرۋ جونىندە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى يساتاي مىڭباەۆ ءبىرازدان بەرى ايتىپ كەلگەن بولاتىن. «مەنىڭ اۋلام – مەنىڭ باعىم» جوباسى – وسىنداي ىزدەنىستىڭ ءبىر ناتيجەسى. ال وسى جۇمىستارعا ستۋدەنتتەر مەن وقۋشىلاردى تارتۋ – جاس ۇرپاقتى ەڭبەككە باۋلۋدىڭ جارقىن كورىنىسى دەۋگە بولادى. وتكەن جىلى وسىنداي جۇمىستارعا «ەڭبەك» مەملەكەتتىك باعدارلاماسى اياسىندا 364 ستۋدەنت پەن 1286 جوعارى سىنىپ وقۋشىسى ءتۇرلى قىزمەتكە تارتىلىپ, ولارعا جۇمىسپەن قامتۋ ورتالىعى ارقىلى ەڭبەكاقى تولەنگەن.
باتىس قازاقستان