«قىزىل ايماقتاعى» ءتورتىنشى توقسان

ەلىمىزدىڭ باس سانيتار دارىگەرى بيىلعى وقۋ جىلىنىڭ 4 توقسانىندا كونتينگەنتى 300 وقۋشىعا دەيىن قالالىق جانە اۋىلدىق مەكتەپتەردەگى ساباقتى بالا سانىن 25 ادامنان اسىرماي ءداستۇرلى فورماتتا وقىتۋعا رۇقسات بەرگەن بولاتىن. شىنى كەرەك, جىل بويى مەكتەپ كورمەي, قۇربى-قۇرداستارىمەن ارالاسپاي, قاشىقتان وقۋعا ءماجبۇر بولعان وقۋشىلار ءساۋىردىڭ 1-ءىن اسىعا كۇتكەن ەدى. الايدا ەلىمىزدە قايتا كۇشەيگەن كوروناۆيرۋس بۇل جوسپاردى وزگەرتتى. اسىرەسە سوڭعى اپتالار بويى «قىزىل ايماقتان» شىعا الماي كەلە جاتقان باتىس قازاقستان وبلىسىندا بالالاردىڭ قاۋىپسىزدىگىن قاتەرگە تىگۋگە بولمايدى.

- تاۋەكەلى جوعارى ايماقتا ورنالاسقان وڭىرلەردەگى بارلىق ءبىلىم نىساندارى دەنساۋلىق ساقتاۋ ءمينيسترى بەكىتكەن قاعيداعا سايكەس سانيتاريالىق-ەپيدەميولوگيالىق تالاپتارىن ساقتاۋى ءتيىس. بۇگىن وبلىس اۋماعىنداعى 379 مەملەكەتتىك مەكتەپتىڭ 279-ىندا ساباق شتاتتىق رەجيمدە, 100 مەكتەپتە ارالاس فورماتتا باستالدى, - دەيدى باتىس قازاقستان وبلىستىق ءبىلىم باسقارماسىنىڭ باسشىسى ايگۇل مىڭباەۆا.

ادەتتەگىدەي وقىتىپ جاتقان – شالعاي ەلدى مەكەندەردەگى شاعىن كومپلەكتىلى مەكتەپتەر. ولاردىڭ سانى بارلىق مەكتەپتىڭ 75 پايىزى بولعانىمەن, وبلىستاعى بارلىق وقۋشىنىڭ 25,4%-ى عانا ول مەكتەپتەردە ءبىلىم الادى. ال وقۋشىلاردىڭ 74,6%-ى, ياعني 82 مىڭنان استام وقۋشى قاشىقتان وقىتىلۋدا.

وبلىستىڭ باس سانيتار دارىگەرى م.ارىسپاەۆ بالا سانى كوپ, سىنىپتاعى وقۋشى تىعىز ءبورلى, بايتەرەك اۋداندارى مەن ورال قالاسىنىڭ مەكتەپتەرىندە ءار سىنىپتاعى بالا سانىن 15 ادامنان اسىرماي ارالاس فورماتتا وقىتۋدى ۇسىندى.

قالا مەكتەپتەرىندە ءاربىر سىنىپ وقۋشىلارىنا وزىندىك قوزعالىس كەستەسى بەكىتىلىپ, بالالاردىڭ ءبىر-بىرىمەن ارالاسپاۋى, عيمارات ىشىندە ءجۇرىپ-تۇرۋ كەزىندە ءبىر جاقتى قوزعالىس, ارا قاشىقتىق قاعيدالارى ساقتالۋى, قول وڭدەۋگە ارنالعان سانيتايزەرلەردىڭ ءار قاباتتا بولۋى, مەكتەپتىڭ كىرە بەرىسىندا اياق كيىمگە ارنالعان دەزينفەكتسيا كىلەمشەسىنىڭ بولۋى, مىندەتتى تۇردە جەلدەتۋ, ىلعالدى جيناۋ, كۆارتستاۋ جۇمىستارىن جۇرگىزۋ, ساباق اراسىنداعى ءۇزىلىس ءار سىنىپقا ءارتۇرلى ۋاقىتقا بەلگىلەنۋى, سانيتاريالىق-ەپيدەمولوگيالىق تالاپتاردىڭ ساقتالۋىنا جاۋاپتى مامان تاعايىندالۋى قاراستىرىلعان.

«بارلىق مەكەمە سانيتايزەر, انتيسەپتيكالىق قۇرال, تەرمومەتريا, كۆارتس شامدارى, ديسپەنسەر, دەزينفەكتسيالاۋ قۇرالدارى, اقپاراتتىق ماتەريالدارمەن قامتاماسىز ەتىلدى» دەدى باسقارما باسشىسى.

كوپشىلىكتىڭ سۇراۋىنا سايكەس, وقۋشىلارعا مەكتەپ فورماسىن ساقتاۋ تالاپ ەتىلمەيتىن بولدى.

باتىس قازاقستان