ەۋروپا كەڭەسى پارلامەنتتىك اسسامبلەياسىنىڭ (ەكپا) باس حاتشىسى دەسپينا حادزيۆاسيليۋ-تسوۆيليس قازاقستان پرەزيدەنتىنىڭ جۇرگىزگەن ىشكى ساياسي جانە الەۋمەتتىك رەفورمالاردىڭ بەلگىلەنگەن باعىتىن قولدايتىنىن ءبىلدىردى, دەپ حابارلايدى Egemen.kz.
ونى ەۋروپاداعى ەڭ ەسكى پارلامەنتارالىق ينستيتۋتتاعى جەتەكشى قىزمەتكە سايلانۋىمەن قۇتتىقتاي وتىرىپ, قازاقستاننىڭ ستراسبۋرگتاعى باس كونسۋلى انۋاربەك احمەتوۆ بيىلعى تاۋەلسىزدىكتىڭ 30-جىلدىعىن اتاپ ءوتىپ جاتقان ەلىمىزدە بولىپ جاتقان قايتا قۇرۋلار تۋرالى ايتتى.
«حالىق ۇنىنە قۇلاق اساتىن مەملەكەت» قۇرۋدىڭ ماڭىزدىلىعىمەن كەلىسە وتىرىپ, ەكپا حاتشىلىعىنىڭ باسشىسى قازاقستان باسشىلىعىنىڭ زاڭنىڭ ۇستەمدىگىن قامتاماسىز ەتۋ, ازاماتتىق قوعامنىڭ ءرولىن كۇشەيتۋ جانە كوپپارتيالىق جۇيەنى قالىپتاستىرۋ جونىندەگى جالپى ۇستانىمىن قاناعاتتانۋشىلىقپەن اتاپ ءوتتى.
ساياسي رەفورمالاردى قاراستىرا وتىرىپ, ەكپا باس حاتشىسى ءولىم جازاسىن جويۋ ارقىلى قازاقستان بۇكىل ايماق ءۇشىن جانە ۇيىمنىڭ كەيبىر مۇشەلەرى ءۇشىن ۇلگى بولدى دەپ مالىمدەدى.
تاراپتار سونىمەن بىرگە قازاقستان پارلامەنتى مەن پارلامەنتتىك اسسامبلەيا اراسىنداعى ىنتىماقتاستىقتى دامىتۋ پەرسپەكتيۆالارىن ەگجەي-تەگجەيلى تالقىلادى. پاندەمياعا قاراماستان, پارلامەنتارالىق بايلانىستار كۇشەيتىلەدى. قازاقستاندىق دەپۋتاتتار ەۋروپالىق ارىپتەستەرىمەن كوپتەگەن ماسەلەلەر بويىنشا سەنىمدى, سىندارلى ديالوگ قۇرۋعا مۇددەلى ەكەندىگى باسا ايتىلدى.