ەلوردانىڭ ءموبيلدى توپتارى كۇشەيتىلگەن رەجيمدە جۇمىس ىستەۋدە. ەپيدەميولوگيالىق جاعدايدىڭ تۇراقسىزدىعىنا جانە كارانتيندىك شارالاردىڭ قاتاڭداتىلۋىنا قاراماستان قالادا كۇن سايىن كارانتين رەجيمىن بۇزۋشىلار انىقتالۋدا. وتكەن تاۋلىكتە موبيلدىك توپتار وسىنداي 14 فاكتىنى تىركەدى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ەسىل اۋدانىنىڭ ءموبيلدى توپتارى 6 كاسىپكەرلىك سۋبەكتىنىڭ كارانتيندى بۇزعانىن انىقتادى. مىسالعا «Alco Market» الكوگولدى ىشىمدىكتەر دۇكەنىندە ماسكا رەجيمى ساقتالماعان. ال «Happylon» اتتراكتسيوندار پاركى, «Invictus» فيتنەس-كلۋبى, «Inforno» مەيرامحاناسى, «Tequila» بارى, «Pei Zdes» لاۋندج-بارى بەلگىلەنگەن ۋاقىتتان كەيىن دە جۇمىس ىستەدى.
كارانتين رەجيمىنە قويىلعان شەكتەۋلەردى سارىارقا اۋدانىنداعى «Kidli kids», «Cotton Turkiye», «كوتتون» دۇكەندەرى مەن «بينكوۆسكي» بارى دا بۇزدى.
ءتارتىپ بۇزۋشىلار قاتارىندا «Small» گيپەرماركەتى, سونداي-اق بايقوڭىر اۋدانىنىڭ سەمبينوۆ كوشەسىندەگى كەيبىر مەكەمەلەر, الماتى اۋدانىنداعى «پاناەحالي» بارى جانە «اققايىڭ» كافەسى بار.
جوعارىدا اتالعان فاكتىلەر بويىنشا راپورت جاسالدى. ءتارتىپ بۇزۋشىلارعا قاتىستى ماتەريالدار كاسىپكەرلىك سۋبەكتىلەرىن جاۋاپكەرشىلىككە تارتۋ ءۇشىن سانيتارلىق-ەپيدەميولوگيالىق باقىلاۋ باسقارماسىنا جولداندى.
ەستەرىڭىزگە سالا كەتەيىك, نۇر-سۇلتان قالاسى 10 ناۋرىزدان باستاپ ەپيدەميولوگيالىق جاعداي بويىنشا «قىزىل ايماققا» ەنگەن. كەشە ەلوردانىڭ باس مەملەكەتتىك سانيتارلىق دارىگەرى قالاداعى كارانتيندىك شەكتەۋلەردى قاتايتۋ تۋرالى جاڭا قاۋلىعا قول قويدى. ەلوردا تۇرعىندارى مەن قوناقتارىنان, سونداي-اق كاسىپكەرلىك سۋبەكتىلەرىنەن كارانتين رەجيمىن قاتاڭ ساقتاۋدى جانە ادام كوپ جينالاتىن ورىنداردان اۋلاق بولۋدى تالاپ ەتەدى.