حالىقارالىق تۇركى اكادەمياسىنىڭ پرەزيدەنتى دارحان قىدىرالى قازاقستاننىڭ باستاماسىمەن وتكەن تۇركى كەڭەسىنىڭ كەزەكتەن تىس بەيرەسمي سامميتىنە قاتىستى پىكىر ءبىلدىردى. بۇل تۋرالى ول ءوزىنىڭ Facebook پاراقشاسىندا جازدى, دەپ حابارلايدى Egemen.kz.
«قازاقستاننىڭ باستاماسىمەن وتكەن تۇركى كەڭەسىنىڭ كەزەكتەن تىس بەيرەسمي ءسامميتى تاريحي جيىن بولدى. سامميتكە ەۋروپادان ماجارستاننىڭ جانە ىرگەدەگى جابىق ەل تۇركىمەنستاننىڭ قاتىسۋى باس قوسۋدىڭ سالماعىن ارتتىرا ءتۇستى. بۇل رەتتە جيىن تاقىرىبىنىڭ تۇركىستانعا ارنالۋى جانە قاراباق جەڭىسىنەن كەيىنگى العاشقى كەلەلى كەڭەس بولۋى دا ماڭىزدى», دەپ جازدى د. قىدىرالى.
بۇدان سوڭ, ول سامميتتە ايتىلعان ويلار مەن مەملەكەت باسشىلارىنىڭ ۇسىنىستارىن 4 تاقىرىپقا ءبولىپ جازعان:1. ەكونوميكالىق ىنتىماقتاستىقتى ارتتىرۋ, سونىڭ ىشىندە كولىك-كومۋنيكاتسيا سالاسى مەن تۋريزمگە ءمان بەرۋ, ازيا مەن ەۋروپانى جالعايتىن «تۇران ءدالىزىن» ءتيىمدى پايدالانۋ, ينۆەستيتسيالىق قور قۇرۋ, ترانس-شەگكرالىق سۋلار ماسەلەسىن شەشۋ;2. ساياسي ىنتىماقتاستىقتى ارتتىرۋ, تۇركى كەڭەسىنىڭ اتىن وزگەرتىپ, حالىقارالىق ۇيىم رەتىندە اتاۋ, ستراتەگيالىق سەرىكتەستىككە ءمان بەرىپ, بولاشاق بايلانىستارعا باعدار بولاتىن قۇجات قابىلداۋ, ىنتىماقتاستىق ۇيىمدارىنىڭ قۇرىلىمدىق قۇجاتتارىن اياقتاۋ;3. گۋمانيتارلىق-مادەني بايلانىستاردى ارتتىرۋ, تۇركى الەمىنىڭ تۇعىرلى تۇلعالارى ءنيزاميدىڭ 880, يۋنۋس امىرەنىڭ 700, ءناۋايدىڭ 580 جىلدىعى سىندى مەرەيتويلاردى بىرگە اتاپ ءوتۋ, تۇركىستان مەن ق.ا.ياساۋي مۇراسىن دارىپتەۋ, مادەنيەت سالاسىندا ناۋاي اتىنداعى حالىقارالىق سىيلىق بەكىتۋ;4. عىلىم-ءبىلىم سالاسىنىڭ پاندەميا كەزىندە ماڭىزى ارتقاندىعىن ەسكەرە وتىرىپ, عىلىمي ينتەگراتسياعا ءمان بەرۋ, ۇلى تۇلعالار مەن قاستەرلى مەكەندەردى زەرتتەپ, زەردەلەۋ, تۇركىستاندا ارحەولوگيالىق قازبا جۇمىستارىن جۇرگىزۋ, باۋىرلاس ەلدەردىڭ جوعارى وقۋ ورىندارىن ۇيلەستىرەتىن « ۇلى تۇركىلەر» جوباسىن باستاۋ, ق.ا. ياساۋي اتىنداعى ۋنيۆەرسيتەتتى تۇركى الەمىنىڭ ورتاق وقۋ ورنىنا اينالدىرىپ تامىرلاس جۇرتتار وكلدەرىنە ارناپ 50 «ياساۋي شاكىرتاقىسىن» بەلگىلەۋ. سوڭعى, عىلىم مەن ءبىلىم سالاسىنداعى ۇسىنىستاردىڭ بارلىعىن قازاقستان پرەزيدەنتى قاسىم-جومارت توقاەۆ ايتتى.
«بۇل ۇسىنىستار, اسىرەسە, «ياساۋي شاكىرتاقاسى» بولاشاق ينتەگراتسيانىڭ بەكەم ىرگەتاسى بولاتىن باستامالار. سوندىقتان تۇركى الەمىندەگى عىلىمي ينتەگراتسيانى ۇيلەستىرۋگە جاۋاپتى ۇيىم رەتىندە اكادەميا اتىنان بۇل ۇسىنىستارعا قۋانىپ قالدىق. تاعى ءبىر اتاپ ايتارلىق جايت, مەملەكەت باسشىسى ق.توقاەۆ تۇركى كەڭەسىنە العاش رەت قاتىسىپ وتىرعانىمەن, القالى جيىندى وتە جاقسى جۇرگىزدى. بۇعان دەيىن ەلباسى 1992 جىلدان باستاپ بارلىق سامميتتەرگە قاتىسقانى بەلگىلى. دەمەك قازاقستاننىڭ تۇركى الەمىندەگى قاراشاڭىراق رەتىندەگى قىزمەتى ساباقتاستىق ارقىلى جالعاسىن تابا بەرەدى», دەلىنگەن جازبادا.