ەلىمىزدەگى ەكى ءىرى بانك – اتفبانك پەن Jýsan Bank 16 ناۋرىز كۇنى وتكەن ەكى بانك اكتسيونەرلەرىنىڭ كەزدەسۋىنەن سوڭ بىرىگۋ تۋرالى جاريالادى. قوسىلۋ پروتسەسى وسى جىلدىڭ اياعىنا دەيىن سوزىلماق. بىرىگۋگە رۇقسات الۋعا بايلانىستى قۇجاتتار بەكىتىلگەن زاڭدىق مەرزىم اياسىندا قارجى نارىعىن رەتتەۋ جانە دامىتۋ اگەنتتىگىنە جولداناتىن بولادى.
Jýsan Bank وكىلىنىڭ ايتۋىنشا, كليەنتتەر بازاسىن بىرىكتىرىپ, زاماناۋي وزىق تەحنولوگيالاردى ەنگىزۋ ارقىلى قارجى ينستيتۋتى نارىقتاعى ۇلەسىن ارتتىرماق. بىرىگۋ پروتسەسىنەن سوڭ قوس بانكتىڭ نارىقتاعى ۇلەسى قازىرگى 10 پايىزدان دا قارقىندى وسەدى دەپ بولجانعان. ء«بىز قارجىلىق پوزيتسيالارى بەرىك جانە تسيفرلى سەرۆيستەرى اسا ىڭعايلى سەنىمدى ءارى زاماناۋي بانك قۇرىپ جاتىرمىز» دەيدى Jýsan Bank ديرەكتورلار كەڭەسىنىڭ توراعاسى شيگەو كاتسۋ.
بىرىگۋ شاراسىنان كەيىن Jusan Bank بۇكىل ەلىمىز بويىنشا 1,1 مىڭ بىرلىكتەن اساتىن ەڭ ءىرى بانكوماتتار جەلىسىن جانە 180-نەن استام بولىمشەلەردى قامتيتىن بولادى.
– ءبىز جەكە تۇلعالار, سونداي-اق شاعىن جانە ورتا بيزنەس ءۇشىن بانك ونىمدەرىن دامىتىپ جاتىرمىز. بارلىق كليەنتتەرگە كرەديت بەرۋ, تاۋارلاردى ءبولىپ تولەۋمەن ساتىپ الۋ, سونداي-اق قاراجات جيناۋ جانە ءوز جيناق قاراجاتىن ينۆەستيتسيالاۋ بويىنشا بىرەگەي ونىمدەر ۇسىنىلادى. ءبىزدىڭ سەرۆيسىمىزدىڭ ەرەكشەلىگى – بارلىق ءونىمدى ءموبيلدى جانە ينتەرنەت ارنالارى ارقىلى ونلاين الۋ. ءبىز اتفبانكتىڭ بارلىق كليەنتىنە «قوش كەلدىڭىزدەر» دەگىمىز كەلەدى جانە ولار Jýsan تسيفرلى ەكوجۇيەسىنىڭ ارتىقشىلىقتارىنا ءوزىنىڭ جوعارى باعاسىن بەرەدى دەگەن سەنىمدەمىز, – دەيدى Jýsan Bank باسقارما توراعاسى ايبەك قايىپ.
اتفبانك باسقارما توراعاسى گاليا ماحانوۆا الداعى بىرىگۋ پروتسەسستەرىنىڭ ءاربىر كليەنت ءۇشىن بارىنشا جايلى ءوتۋى ءۇشىن بار كۇشىن سالاتىنىن جەتكىزدى.
– ەكى بانكتىڭ بىرىگۋى بارىسىندا اتفبانكتىڭ بارلىق ءبولىمى مەن سەرۆيسى Jýsan Bank-كە قىزمەت كورسەتۋگە تولىق كوشكەنگە دەيىن قالىپتى رەجىمدە جۇمىسىن جالعاستىراتىن بولادى, – دەپ اتاپ ءوتتى اتفبانك باسقارما توراعاسى.
وسىلايشا, ەلدەگى ەكىنشى دەڭگەيلى بانكتەر سانى 24-كە ازايدى. ال بىرىكەننەن سوڭ اكتيۆ كولەمى 3 ترلن تەڭگەدەن اسىپ, Jýsan-نىڭ وتاندىق بانك سەكتورىنداعى ۇلەسى 10 پايىزدان اسىپ تۇسپەك. ەسكە سالساق, Jýsan 2020 جىلدىڭ سوڭىندا قارجى نارىعىن رەتتەۋ جانە دامىتۋ اگەنتتىگىنىڭ رۇقساتىنان سوڭ اتفبانك اكتسياسىنىڭ 99,76 پايىزىن يەلەنگەن ەدى. اتف-تىڭ 124 ملرد تەڭگە كولەمىندەگى جەكە كاپيتالى قوسىمشا پروۆيزيالار قۇرۋعا جۇمسالعان. كەلىسىم ناتيجەسىندە اتفبانكتىڭ بۇرىنعى اكتسيونەرى عالىمجان ەسەنوۆ 19,97 پايىز اكتسيا يەلەنۋ ارقىلى Jýsan Bank-ءتىڭ ءىرى اكتسيونەرى اتاندى.