ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ جالپى وتىرىسى ءوتىپ, وندا ەۋرازيالىق ەكونوميكالىق وداق ەلدەرى ونىمدەرىنىڭ قاۋىپسىزدىگىن قامتاماسىز ەتۋگە باعىتتالعان راتيفيكاتسيالىق زاڭ جوباسى ماقۇلداندى.
اتاپ ايتقاندا, دەپۋتاتتار «ەۋرازيالىق ەكونوميكالىق وداقتىڭ تەحنيكالىق رەگلامەنتتەرىندە تالاپتار بەلگىلەنبەگەن ءونىمنىڭ ەۋرازيالىق ەكونوميكالىق وداق شەڭبەرىندەگى اينالىسىنىڭ ءتارتىبى جانە مۇنداي ءونىمنىڭ قاۋىپسىزدىگىن قامتاماسىز ەتۋ قاعيدالارى تۋرالى كەلىسىمدى راتيفيكاتسيالاۋ تۋرالى» زاڭ جوباسىن راتيفيكاتسيالادى.
«قۇجاتتىڭ نەگىزگى باعىتتارى وداق اۋماعىندا اينالىستاعى بارلىق ونىمدەردىڭ قاۋىپسىزدىگىن قامتاماسىز ەتۋ. بىرىنشىدەن, بۇل وداق دەڭگەيىندە ونىمگە قاتىستى مىندەتتى تالاپتار بەلگىلەنەتىن ءونىمنىڭ بىرىڭعاي تىزبەسىنە ەنگىزىلمەگەن ونىمدەر. ەكىنشىدەن, وداقتىڭ بىرىڭعاي تەحنيكالىق رەگلامەنتتەرى قابىلدانباعان نەمەسە كۇشىنە ەنبەگەن ونىمدەر. ءونىمنىڭ بىرىڭعاي تىزبەسى تۇتىنۋ جانە پايدالانۋ كەزىندە قاۋىپتىلىگى جوعارى تاۋەكەلدەرمەن سيپاتتالاتىن ءونىم تۇرلەرىن قامتيدى. بۇل تىزبە وداققا مۇشە ەلدەردىڭ جانە حالىقارالىق تاجىريبەنى ەسكەرىپ وتىرىپ ازىرلەنگەن.
بۇگىنگى تاڭدا اينالىسقا شىعارىلاتىن ءونىمنىڭ 85 پايىزى ەۋرازيالىق ەكونوميكالىق وداقتىڭ بىرىڭعاي تەحنيكالىق رەگلامەنتىمەن رەتتەلەدى. بۇل تاماق ونىمدەرىنەن باستاپ, بالالار يندۋسترياسى تاۋارلارى, جەڭىل ونەركاسىپ, ماشينا جاساۋ جانە باسقا دا ءونىم تۇرلەرىنىڭ كەڭ تاۋار نومەنكلاتۋراسىنا ارنالعان تەحنيكالىق رەگلامەنتتەر. وسى كەلىسىم وداق نارىعىنداعى ونىمدەردىڭ قالعان 15 پايىزىن رەتتەيدى», دەدى زاڭ جوباسى جونىندە بايانداما جاساعان ساۋدا جانە ينتەگراتسيا ءمينيسترى باقىت سۇلتانوۆ.
ءمينيستردىڭ ايتۋىنشا, قازىرگى تاڭدا تاۋارلار نومەنكلاتۋراسىنا تالداۋ جاسالعان. وعان, نەگىزىنەن, الەۋەتتى قاۋىپ توندىرمەيتىن ونىمدەر كىرەدى. ماسەلەن, زەرگەرلىك بۇيىمدار, ساعات, تۇرمىستىق ششەتكا, جاساندى زەرگەر بۇيىمدارى سەكىلدى ونىمدەر بار. ب.سۇلتانوۆ قابىلدانعالى وتىرعان كەلىسىم بيزنەس ءۇشىن اكىمشىلىك كەدەرگى كەلتىرمەيتىنىن اتاپ ءوتتى.
ء«ونىم تۋرالى مالىمەتتەردى اقپاراتتىق بازادا جيناقتاۋ كوزدەلەدى. ولار تۇتىنۋشىلار ءۇشىن قولجەتىمدى جانە نارىقتاعى جاعدايدى زەرتتەۋ ماقساتىندا پايدالانۋعا اشىق بولادى. بۇل جاڭا ءونىم تۇرلەرىنە دەن قويۋعا جانە تۇراقتى مونيتورينگ جۇرگىزۋگە مۇمكىندىك بەرەدى.
كەلىسىم ىسكە اسىرۋ ماقساتىندا ءتارتىپتى رەتتەيتىن ءونىم اينالىسى قاعيدالارىنىڭ جوباسى ازىرلەندى. قازىرگى تاڭدا بۇل قاعيداتتاردى بيزنەس-قاۋىمداستىق پەن «اتامەكەن» ۇلتتىق كاسىپكەرلەر پالاتاسى تالقىلاپ جاتىر», دەدى مينيستر. ونىڭ ايتۋىنشا, بۇگىنگى تاڭدا وداققا مۇشە ءۇش مەملەكەت كەلىسىمدى راتيفيكاتسيالاۋ بويىنشا مەملەكەتىشىلىك راسىمدەردى اياقتاعان. ءماجىلىس دەپۋتاتتارى زاڭ جوباسىن ءبىراۋىزدان ماقۇلداپ, داۋىس بەردى.
سونداي-اق دەپۋتاتتار «كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ ساتىپ الۋى تۋرالى» جانە وعان ىلەسپە زاڭ جوبالارىن ەكىنشى وقىلىمدا ماقۇلدادى.
زاڭ جوبالارى جونىندە ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ابيلفاس حامەدوۆ بايانداما جاسادى. دەپۋتات اتالعان قۇجاتتىڭ پرەزيدەنت قاسىم-جومارت توقاەۆتىڭ 2020 جىلعى 1 قىركۇيەكتەگى جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارى اياسىندا ازىرلەنگەنىن اتاپ ءوتتى.
جۇمىس توبى زاڭ جوباسىن تالقىلاۋ بارىسىندا دەپۋتاتتار بىرقاتار تۇزەتۋ ەنگىزگەن. اتاپ ايتساق, زاڭ جوباسىنىڭ نورمالارى قولدانىلمايتىن جاعدايلاردىڭ تولىق تىزبەسى بەلگىلەنەدى. كۆازيمەملەكەتتىك سەكتور سۋبەكتىلەرىنىڭ ساتىپ الۋىن باقىلاۋ جونىندەگى ورتالىقتاندىرىلعان قىزمەتتەردىڭ ءوتىنىش بەرۋشى ساتىپ الۋ پروتسەستەرىنە شاعىم جاساعان كەزدە وعان ناقتى مەرزىمدەردە نەگىزدەلگەن جاۋاپتار بەرىلمەك. بۇعان قوسا, تاپسىرىس بەرۋشىنىڭ كونكۋرستىق قۇجاتتامانى بەرگەننەن جانە اشقاننان كەيىن الەۋەتتى ءونىم بەرۋشىلەردەن قوسىمشا قۇجاتتاردى تالاپ ەتۋىنە تىيىم سالۋ جونىندە تۇزەتۋ ەنگىزىلگەن.
ا.حامەدوۆ قۇجاتتا جەتكىزۋشىلەردىڭ مۇددەسىن قورعاۋ ءۇشىن ورىندالعان كەلىسىمشارتتار بويىنشا جەتكىزۋ اقىسىن تولىق تولەۋ مەرزىمى 30 جۇمىس كۇنى بولىپ بەكىتىلگەنىن اتاپ ءوتتى.
جيىن سوڭىندا ءماجىلىس دەپۋتاتتارى مەملەكەتتىك ورگاندار باسشىلارىنا دەپۋتاتتىق ساۋال جولدادى. اسقار بەيسەنباەۆ وڭتۇستىك كورەياداعى قازاقستاندىق ەڭبەك ميگرانتتارى تۋرالى ماسەلە كوتەردى. ونىڭ ايتۋىنشا, قازاقستاندىق ازاماتتار اتالعان ەلگە زاڭسىز ەڭبەك ەتۋ ءۇشىن سوڭعى 6 جىل بويى تۋريستىك ۆيزانى ارقاۋ ەتىپ, جاسىرىن بارادى. 2014 جىلدان بەرى زاڭسىز جۇمىس ىستەۋگە بارعان ميگرانتتاردىڭ سانى 359 ادامنان 2019 جىلى 12 مىڭ ادامعا دەيىن كۇرت وسكەن. دەپۋتات وڭتۇستىك كورەياعا قىرعىزستان, موڭعوليا جانە وزبەكستان ەلدەرىنەن ازاماتتار كوپ باراتىنىن, بىراق ول ەلدەردىڭ ازاماتتارى ەكىجاقتى كەلىسىمشارتتىڭ نەگىزىندە, «ە-9 ۋاقىتشا» ەڭبەك ۆيزاسىن الۋ ارقىلى زاڭدى جۇمىس ىستەپ جۇرگەنىن اتاپ ءوتتى.
يرينا ۋنجاكوۆا كوروناۆيرۋس ينفەكتسياسىنا قارسى حالىقتى ۆاكتسينالاۋدىڭ باياۋ ءجۇرىپ جاتقانىنا الاڭداۋشىلىق ءبىلدىردى. ونىڭ ايتۋىنشا, دەنساۋلىق ساقتاۋ مينيسترلىگى بۇل ناۋقاندى جۇيەلى ۇيىمداستىرا الماي وتىر.
«جۇرت قايدا بارىپ ۆاكتسينا الۋعا بولاتىنىن بىلمەيدى. سەبەبى وڭىرلەردەگى ەمحانالاردا ۆاكتسينا جوق. دەنساۋلىق ساقتاۋ مينيسترلىگى بيىل الدىن الا ءىس-قيمىل الگوريتمىن جاساي المادى ما؟ كوپتەگەن ادامنىڭ كوكەيىندە وسىنداي سۇراق تۇر», دەدى دەپۋتات.
سونداي-اق ارمان قوجاحمەتوۆ, ۆلاديمير توحتاسۋنوۆ, بەرىك دۇيسەنبينوۆ, اندرەي ليننيك, ايگۇل جۇماباەۆا, بەكبولات تىلەۋحان, ايجان سقاقوۆا, ازات پەرۋاشەۆ دەپۋتاتتىق ساۋال جولدادى.