سەناتتىڭ قارجى جانە بيۋدجەت كوميتەتىنىڭ كەڭەيتىلگەن وتىرىسىندا دەپۋتاتتار «ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇزەگە اسىرۋ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى» زاڭ جوباسىن تالقىلادى, دەپ حابارلايدى Egemen.kz.
زاڭ جوباسىنىڭ باستى ماقساتى - مۇشە مەملەكەتتەردىڭ باسەكەلەستىكتەگى ەرەكشەلىكتەرىنە باعىتتالعان ءوزارا ءتيىمدى ساۋدا-ەكونوميكالىق تەتىكتەردى قالىپتاستىرۋ جانە وسى سالاداعى ءتيىمدى شارالار ازىرلەۋ بولىپ تابىلادى. كەلىسىم سونداي-اق ەاەو كەدەندىك اۋماعىندا باعالى مەتالدار مەن تاستاردىڭ ەركىن اينالىمىن قامتاماسىز ەتۋ ءۇشىن جاعداي جاساۋدى كوزدەيدى.
قۇجاتتا سونىمەن قاتار باعالى مەتالدارمەن جانە وڭدەلمەگەن اسىل تاستارمەن وپەراتسيالاردى جۇزەگە اسىرۋ, مامىلەلەر جاساۋ جانە كلاسسيفيكاتسياسى مەن قۇندىلىق سيپاتتامالارىن انىقتاۋ, زەرگەرلىك بۇيىمداردى جانە ەاەو اۋماعىندا يمپورتتالعان نەمەسە وندىرىلگەن باسقا ونىمدەردى سىناۋ, تالداۋ جانە ماركالاۋ تەتىكتەرى دە بار.
سەناتور جەڭىس نۇرعاليەۆتىڭ پىكىرىنشە, كەلىسىم وداق ەلدەرىندەگى زەرگەرلىك بۇيىمداردىڭ ىشكى نارىعىندا زەرگەرلىك بۇيىمدارمەن ءوزارا ساۋدادا تالداۋ بەلگىلەرىن مويىندالماۋىنا بايلانىستى شەكتەۋلەردى جويۋعا وڭ اسەر ەتەدى.
«ەگەر زەرگەرلىك بۇيىم قازاقستان اۋماعىندا جاسالىپ, سىناقتان وتسە, وندا بۇل بۇيىم ەاەو ەلدەرىندە ساتىلعان كەزدە قايتا تەستىلەۋ قاجەت بولمايدى», دەدى جەڭىس نۇرعاليەۆ.
كەلىسىم تالداۋ بەلگىلەرىنىڭ ۇلگىلەرىمەن جانە ولاردىڭ سيپاتتامالارىمەن الماسۋ, سونداي-اق اقشانى جىلىستاتۋعا قارسى كۇرەس جونىندەگى قارجىلىق شارالاردى ازىرلەۋ توبىنىڭ ۇسىنىمدارىن ەسكەرە وتىرىپ, قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى اقپارات الماسۋدى كوزدەيدى. بۇل نورمالار تولىق ەسەپجۇرگىزۋگە جانە سىبايلاس جەمقورلىقپەن كۇرەسۋگە مۇمكىندىك بەرەدى.
قارجى جانە بيۋدجەت كوميتەتى زاڭ جوباسىن پالاتاعا ۇسىندى.