تاراز قالاسىنداعى جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ ۇيىمداستىرۋىمەن «رۋحاني جاڭعىرۋ» باعدارلاماسى اياسىندا «جىر الىبى – جامبىل» اتتى جامبىل جاباەۆتىڭ ولەڭدەرىن وقۋدان بايقاۋ ءوتتى.
ۇلى جىراۋدىڭ شىعارماشىلىعىن كەڭىنەن ناسيحاتتاۋ, وقىرمانداردى وتانشىلدىققا باۋلۋ, جاستاردى كىتاپ وقۋعا تارتۋ ماقساتىندا ۇيىمداستىرىلعان بايقاۋ جامبىل جاباەۆتىڭ 175 جىلدىعى مەن ەل تاۋەلسىزدىگىنىڭ 30 جىلدىعىنا ارنالدى.
اتالعان كىتاپحانا ديرەكتورىنىڭ ورىنباسارى گۇلنۇر التىنبەكوۆانىڭ ايتۋىنشا, بايقاۋعا وبلىس بويىنشا 45 جۇمىس تۇسكەن. ۇمىتكەرلەردىڭ جۇمىستارى ءتۇرلى الەۋمەتتىك جەلىلەردە كۇندەلىكتى جاريالانعان. «بايقاۋعا كەلىپ تۇسكەن جۇمىستاردىڭ 19-ى زاعيپ جانە مۇمكىندىگى شەكتەۋلى جاندار جولداعان. بايقاۋ شارتتارىنا سايكەس, قازىلار اقىن ولەڭدەرىنەن مانەرلەپ ءۇزىندى وقۋ جانە شىعارمانى وقۋ ۋاقىتى بەس مينۋتتان اسپاۋىن باستى نازاردا ۇستادى», دەيدى ول. ناتيجەسىندە, «بولاشاق» مەكتەپ-ينتەرناتىنىڭ وقۋشىسى ايزەرە بايبوسىن مەن تاراز قالاسىنداعى №47 مەكتەپتىڭ وقۋشىسى بەكبولات ورالبەك ءبىرىنشى ورىندى جەڭىپ السا, ەكىنشى ورىندى مويىنقۇم اۋدانىنان شارحات بايگوبەك, تاراز قالاسىنداعى №10 مەكتەپ وقۋشىسى الىبەك سەيدازىم جانە تالاس اۋدانى, مايتوبە اۋىلىنان دارحان ماتۆاي يەلەندى. سونىمەن قاتار جۋالى اۋدانىنان سالاۋات ەلامان, جامبىل مەديتسينالىق جوعارى كوللەدجىنىڭ ستۋدەنتى مەيىرمان قۋانىشباي مەن تاراز قالاسىنداعى №5 مەكتەپتىڭ وقۋشىسى ءاديا ءالىمحان ءۇشىنشى ورىن السا, ىنتالاندىرۋ سىيلىقتارىمەن «بولاشاق» مەكتەپ-ينتەرناتىنىڭ وقۋشىسى يبراحيم سۋروۆ, مەركى اۋدانىنان ماريا نيسانوۆا, بايزاق اۋدانىنان ءمولدىر تۇرسىنباەۆا مەن تاراز قالاسىنداعى №5 مەكتەپتىڭ وقۋشىسى ءمولدىر كەڭەس ماراپاتتالدى. جەڭىمپازدار مەن جۇلدەگەرلەرگە باعالى سىيلىقتار مەن ديپلومدار بەرىلسە, بارلىق قاتىسۋشىعا كىتاپحانا اتىنان العىس حاتتار تابىستالدى.
جامبىل وبلىسى