قۇندىلىقتار قۇلدىراپ, جۇرەكتەر قاتايعان قوعامدا ادام ساۋداسى قىزا تۇسپەسە, ازايماسى انىق. بۇگىندە قىلمىستىڭ بۇل ءتۇرى شەكارا تاڭدامايدى, ۇلتتى سۇرىپتاپ جاتپايدى.
اسىرەسە, قازاق قىزدارىنىڭ تاعدىرى تالكەككە ءتۇسىپ, ارى اياققا تاپتالعان تۇستا كىبىرتىكتەمەي, باتىل قيمىل جاساۋ – قۇقىق قورعاۋ ورگاندارىنىڭ عانا ەمەس, بۇكىل ۇلتتىڭ نامىسىن جىرتۋ دەگەن ءسوز. زاڭ قاتايعانمەن, پەندەنىڭ پەيىلى تۇزەلمەي ادام ساۋداسى دا كۇن تارتىبىنەن تۇسپەيدى. مۇنى مەملەكەت باسشىسى قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» اتتى حالىققا جولداۋىندا اتاپ كورسەتتى. ۇلتتىق قوعامدىق سەنىم كەڭەسىنىڭ باسقوسۋىندا دا ەل پرەزيدەنتى بۇل ماسەلە بويىنشا تۇراقتى تۇردە جۇمىس جۇرگىزۋ قاجەتتىگىن قاتاڭ ەسكەرتىپ, بارلىق ۋاكىلەتتى ورگانداردىڭ باتىل ءارى ۇيلەسىمدى ارەكەت ەتۋىن تالاپ ەتكەن بولاتىن. بۇل باعىتتا قازاقستاننىڭ زاڭناماسىن حالىقارالىق ستاندارتتارعا ساي بەيىمدەۋدى تاپسىرىپ, ادام ساۋداسىنا قاتىستى قىلمىستاردىڭ الدىن الۋ جانە ولاردى انىقتاۋ بويىنشا ناقتى شارالاردى قابىلداۋعا ەكپىن بەردى. قازىرگى تاڭدا قۇقىق قورعاۋ ورگاندارى مۇنداي قىلمىستاردى انىقتاۋ مەن تەرگەۋ ءىس-شارالارىن جەتىلدىرىپ كەلەدى. ناتيجە دە جوق ەمەس. سونىڭ ءبىرى – تاياۋدا عانا اشكەرەلەنگەن «باحرەين ءىسى».
تەگىڭدى تالقاندايمىن دەسە قازىر قىلمىستىڭ سان سوراقىسى جەتىپ ارتىلادى. تۇتاس ۇلتقا قاۋىپ ءتوندىرىپ تۇرعان سونداي ازعىندىقتىڭ ءبىرى – قىزدارىمىزدى قىزىقتىرىپ شەتەل اسىرىپ, جات جەردە قۇجاتتارىن تارتىپ الىپ, جەزوكشەلىككە سالۋ بولىپ تۇر.
ءىىم تەرگەۋ دەپارتامەنتىنىڭ باسشىسى سانجار ءادىلوۆ ونلاين رەجىمدە وتكەن بريفينگتە ءدۇيىم جۇرتقا «باحرەين ءىسى» دەگەن اتپەن بەلگىلى بولعان اتىشۋلى تەرگەۋ ىسىنە قاتىستى جاڭا مالىمەتتەردى حابارلادى.
«جالاقىسى جوعارى جۇمىسقا تۇرىپ, كۇرەپ اقشا تاباسىڭ» دەگەن جىلتىراق سوزگە سەنىپ, شەتەل اسىپ كەتكەن قازاقتىڭ 39 قىزى باحرەين كورولدىگىنە كەلگەندە جىنىستىق قۇلدىققا تۇسكەنىن ءبىر-اق بىلگەن. قاراكوزدەردىڭ «ول جاقتا ات باسىنداي التىن بار» دەپ باسىن اينالدىرىپ, كەلە سالىسىمەن بار قۇجاتتارىن جيناپ الىپ, جەزوكشەلىكپەن اينالىسۋعا ماجبۇرلەگەن قىلمىستىق توپتىڭ قازىرگى تاڭدا 19 مۇشەسى انىقتالىپ, 15-ءى قاماۋعا السىنسا, ۇشەۋىنە حالىقارالىق ىزدەۋ جاريالانعان. ورىمدەي قىزدارعا قورعان بولۋدىڭ ورنىنا قورلاپ كەلگەن ترانسۇلتتىق ۇيىمداسقان توپتىڭ قۇرامىندا قازاقستاندىقتاردان بولەك, رەسەي جانە باحرەين ازاماتتارى بولعان.
ادام ساۋداسىمەن اينالىسىپ, ارام ويلارىن ىسكە اسىرىپ كەلگەن بۇل قىلمىستىق توپ 2016 جىلدان باستاپ, 2020 جىلعا دەيىن ەل اۋماعىندا باحرەين كورولدىگىنە جەزوكشەلىكپەن اينالىسۋ ءۇشىن قىزداردى جالداۋمەن جانە جىبەرۋمەن اينالىسىپ كەلگەنى انىقتالىپ وتىر. ەڭ سوراقىسى, جوعارىدا ايتىلعان 39 قىزدىڭ بارلىعى قازاقى قايماعى بۇزىلماعان تۇركىستان وبلىسى مەن كيەلى مەكەن شىمكەنت قالاسىنىڭ تۇرعىندارى بولىپ شىققان.
ەستىگەن ەلدىڭ جانىن تۇرشىكتىرگەن «باحرەين ءىسى» وتكەن جىلدىڭ اقپان ايىندا بەلگىلى بولعان ەدى. سول كەزدە ءدۇيىم ەل باق ارقىلى باحرەين كورولدىگىندە 21 قازاقستاندىق قىزدىڭ سەكسۋالدىق قۇلدىقتان بوساتىلعانى تۋرالى ەستىپ-ءبىلدى. بۇل بيزنەستىڭ قىر-سىرى مەن قۇپياسىن مىقتاپ مەڭگەرىپ العان قىلمىستىق توپ مۇشەلەرى قۇرباندارىن كوبىنە وڭتۇستىك وڭىردەن تاڭداپ الىپ, نەگىزىنەن تۇرمىستىق دەڭگەيى تومەن وتباسىلاردان شىققان بويجەتكەندەرگە شەتەلدە قىزمەت كورسەتۋ جانە قوناقۇي سالاسىندا جۇمىس ىستەۋدى ۇسىنىپ, تۇزاقتارىنا ءتۇسىرىپ وتىرعان.
س.ءادىلوۆتىڭ حابارلاۋىنشا, سوڭعى ەكى اپتانىڭ ىشىندە پوليتسيا قىزمەتكەرلەرى وسىنداي جولمەن ەلدەن كەتىپ, باحرەيندە ءتانىن ساۋدالاۋعا تۋرا كەلگەن تاعى التى قىزدى انىقتاعان. الايدا, بۇل قىزدار ەبىن تاۋىپ قۇلدىقتا ۇستاپ وتىرعان قوجايىندارىنان قاشىپ شىققانىمەن, ءوز بەتتەرىنشە تۋعان جەرلەرىنە ورالا الماعان. ورنالاسقان جەرى انىقتالعانىن كەيىن سىرتقى ىستەر مينيسترلىگىنىڭ كومەگىمەن قىزدار باحرەين, تۇركيا جانە ءباا-دەن قايتارىلعان. ءىىم تەرگەۋ دەپارتامەنتى باستىعىنىڭ ايتۋىنشا, قازىرگى تاڭدا قۇقىق قورعاۋ ورگاندارى باحرەين جەرىندە جەزوكشەلىك بيزنەستىڭ كورىگىن قىزدىرىپ كەلگەن تاعى ءبىر ترانسۇلتتىق ۇيىمداسقان قىلمىستىق توپتى اشكەرەلەپ, مۇشەلەرىن قولعا ءتۇسىرىپ, ماتەريالداردى تولىقتاي باس پروكۋراتۋراعا جولداعان.
بۇل ىسكە قاتىستى ترانسۇلتتىق قىلمىستىق توپتى قۇرۋ جانە باسقارۋ بويىنشا قوسىمشا قىلمىستىق ءىس قوزعالىپ, جاقىن ۋاقىتتا ءىس اياقتالىسىمەن ماتەريالدار ايىپتاۋ قورىتىندىسىمەن سوتقا جولدانباق.
قازىرگى ۋاقىتتا شەتەلدە جەزوكشەلىككە سالىنعان جابىرلەنۋشىلەردىڭ بارلىعى ەلىمىزگە قايتارىلىپ, وتباسىلارىنا ورالعان. جىلتىراق ومىرگە قىزىعىپ, جىنىستىق قۇلدىققا تۇسكەن قىزدارعا الەۋمەتتىك, مەديتسينالىق, قۇقىقتىق جانە پسيحولوگيالىق كومەك كورسەتىلۋدە.
«ادام ساۋداسى تەك قۇقىق قورعاۋ ورگاندارىنىڭ عانا ەمەس, بۇكىل قوعامنىڭ وزەكتى ماسەلەسىنە اينالىپ وتىر. ويتكەنى قاراپايىم حالىقتىڭ قۇقىعى مەن بوستاندىعىنا تىكەلەي قاتىستى بولعاندىقتان, بۇل تۇيتكىلگە ءاتۇستى قاراۋعا بولمايدى. وكىنىشكە قاراي, شەكارالاردىڭ اشىقتىعى, كوشى-قون اعىندارىنىڭ كۇن ساناپ ارتۋى جانە ەكونوميكانىڭ دامۋىنا قاراي قىلمىستىڭ بۇل ءتۇرى دە وزگەرىپ, مەملەكەتارالىق جانە ترانسۇلتتىق سيپاتقا يە بولا باستادى. سول سەبەپتى ادام ساۋداسىنا قاتىستى ءار ءىس ءىىم-ءنىڭ ءجىتى باقىلاۋىنا الىنادى», دەپ اتاپ ءوتتى دەپارتامەنت باسشىسى.
ادام ساۋداسىنىڭ الدىن الۋ, الەمدى شارلاپ كەتكەن بۇل قىلمىستىڭ جولىن كەسۋ جانە ترانسۇلتتىق قىلمىستىق توپتارعا قارسى كۇرەس جۇرگىزۋ ماقساتىندا بۇگىندە ءىىم باسقا دا مۇددەلى مەملەكەتتىك ورگاندارمەن بىرلەسىپ, ۇكىمەتتىڭ ءىس-شارالار جوسپارىن ىسكە اسىرىپ كەلەدى. تمد مەملەكەت باسشىلارى كەڭەسىنىڭ شەشىمىمەن بەكىتىلگەن قىلمىسقا قارسى كۇرەستىڭ بىرلەسكەن ءىس-شارالارىنىڭ مەملەكەتارالىق باعدارلاماسى شەڭبەرىندە دە ازاماتتاردىڭ حالىقارالىق ترافيگىن بولدىرماۋ جونىندە تۇراقتى جۇمىس جۇرگىزىلۋدە.
بريفينگ بارىسىندا س.ءادىلوۆ بۇگىندە ىشكى ىستەر ورگاندارىندا ادام ساۋداسىنا قاتىستى 133 قىلمىستىق ءىس بويىنشا تەرگەۋ جۇرگىزىلىپ جاتقانىن اتاپ ءوتتى. بۇل ىستەر بويىنشا 48 ادام قىلمىستىق جاۋاپكەرشىلىككە تارتىلسا, 15-ءى قاماۋعا الىنعان.