بۇل كۇندەرى اقش-تىڭ فلوريدا شتاتىنداعى مايامي-گاردەنس قالاسىندا جۇلدە قورى 9 314 875 اقش دوللارىن قۇرايتىن Miami Open حالىقارالىق ءتۋرنيرى ءوتىپ جاتىر.
مۇحيتتىڭ ارعى بەتىندە ۇيىمداستىرىلىپ جاتقان اسا ءىرى دودادا قازاقستاندىق سپورتشىلار دا باق سىناۋدا. جارىستىڭ العاشقى كۇنىندە كورتقا شىققان زارينا دياس ءبىرىنشى اينالىمدا ايگىلى امەريكالىق تەننيسشى ۆينۋس ۋيليامسپەن كەزدەستى. تەننيس الەمىندە اپالى-ءسىڭلىلى ۆينۋس پەن سەرەنا ءۋيليامستى تانىمايتىن جانكۇيەر كەمدە-كەم شىعار. سەرەنا «ۇلكەن دۋلىعا» ءتۋرنيرىن 23 رەت ۇتسا, ۆينۋس تا اتالعان تۋرنيردە 10 مارتە توپ جارعان. ايەلدەر اراسىنداعى الەمدىك رەيتينگتە تالاي ۋاقىت كوش باستاعان 40 جاستاعى ۆ.ۋيليامس ءالى كۇنگە دەيىن تەننيستەن قول ۇزبەي كەلەدى.
دەسە دە بۇگىندە ۆينۋستىڭ بىلەگىنەن ءال كەتە باستاعانىمەن, تەننيستە جيعان تاجىريبەسى مول. كەز كەلگەن قارسىلاستى ايلا-تاسىلىمەن وپ-وڭاي جەڭىپ كەتە الاتىنداي قاۋقارى بار. بىراق بۇل جولى ونىڭ زارينا دياسقا شاماسى جەتپەدى. ءبىرىنشى سەتتە وتانداسىمىز قارسىلاسىن ەش قيىندىقسىز 6:2 ەسەبىمەن جەڭسە, ەكىنشى سەتتە ۇلكەن ۋيليامس ءبىراز قارسىلاستى. 6:6 ەسەبىمەن تارازى باسى تەڭسەلىپ تۇرعان ويىندا زارينانىڭ جولى بولدى. تاي-برەيكتە 12:10 ەسەبىمەن باسىم تۇسكەن جەرلەسىمىز 7:6 ناتيجەسىمەن جەڭىستى ج ۇلىپ الدى.