گەنەرال-لەيتانانت نۇرلان ەرمەكباەۆ الماتى مەن گۆاردەيسك گارنيزوندارىنداعى تانك جانە دەسانتتىق-شابۋىلداۋ بريگادالارىنىڭ جاۋىنگەرلىك دايارلىق بارىسىمەن تانىستى, دەپ حابارلايدى Egemen.kz.
اسكەرلەردىڭ قولباسشىلارى بيىلعى وقۋ-جاتتىعۋلاردا قازىرگى زامانعى قارۋلى قاقتىعىستار تاجىريبەسى ەسكەرىلىپ, جاڭا ۇرىس ادىستەرى قولدانىلعانى تۋرالى باياندادى.
سونىڭ ءبىرى رەتىندە ناۋرىز ايىنىڭ باسىندا العاش رەت ەكى جاقتى فورماتتا ۇيىمداستىرىلعان «ماتىبۇلاق» پوليگونىندا وتكەن بريگادالىق تاكتيكالىق وقۋ-جاتتىعۋىن ايتۋعا بولادى. وسىنداي وقۋ-جاتتىعۋ كومانديرلەردى جاۋىنگەرلىك ءىس-قيمىلداردا قالىپتان تىس ادىستەردى جوسپارلاۋعا, ۋاقىتىلى ۇرىس جاعدايىن وزگەرتۋگە ارەكەت ەتۋگە جانە باعىنىستى بولىمشەلەردىڭ ءىس-قيمىلىنا قاجەتتى وزگەرىستەر ەنگىزۋگە ۇيرەتەدى. ەكى جاقتى وقۋ-جاتتىعۋ ءوزىنىڭ تيىمدىلىگىن كورسەتتى. الداعى ۋاقىتتا اۋقىمدى قولدانىلاتىن بولادى.
قورعانىس ءمينيسترى «ىلە» پوليگونىندا بولىمشەلەردىڭ وتكەن جىلدان باستاپ اسكەرلەردىڭ جاۋىنگەرلىك دايارلىعىنا بەلسەندى ەنگىزىلىپ جاتقان ارميالىق تاكتيكالىق اتىس ساباعىن تەكسەردى. دەسانتتىق-شابۋىلداۋ بريگاداسىنىڭ كومانديرى اسكەري قىزمەتشىلەردىڭ كاسىبي شەبەرلىكتەرىن شىڭداۋدا زامان تالاپتارىن ەسكەرە وتىرىپ قارقىندى جاۋىنگەرلىك دايارلىق جۇرگىزۋگە مۇمكىندىك بەرەتىن وقۋ-ماتەريالدىق بازاسىن كورسەتتى. وسى جەردە مينيستر ارميا حالىقارالىق ويىندارىنداعى «دەسانتتىق ۆزۆود» سايىسىنا قاتىساتىن جاۋىنگەرلەردىڭ دايارلىعىمەن دە تانىستى.
قورعانىس ۆەدومستۆوسىنىڭ باسشىسى گۆاردەيسك گارنيزونىندا تانك بولىمشەلەردىڭ ساباعىن تەكسەرىپ, سونىمەن قاتار وقۋ-جاتتىعۋ الاڭدارىنىڭ ينفراقۇرىلىمىن قارادى. قازىرگى ۋاقىتتا ول جەردە اسكەرلەردىڭ جاۋىنگەرلىك جاتتىعۋلارى وتۋدە, ال جازدا وندا ەلىمىزدە وتەتىن ارميا حالىقارالىق ويىندارىنىڭ سايىستارىن وتكىزۋ جوسپارلانىپ وتىر.
تەكسەرىس ناتيجەسى بويىنشا گەنەرال-لەيتەنانت نۇرلان ەرمەكباەۆ تۇراقتى تۇردە قارقىندى دامىپ كەلە جاتقان جاۋىنگەرلىك دايارلىقتى اتاپ ءوتىپ, ونى ءارى قاراي ارتتىرۋدا كومانديرلەرگە بارلىق كۇش-جىگەردى جۇمىلدىرۋدى تاپسىردى.