سەنات توراعاسى ماۋلەن اشىمباەۆ Facebook-تەگى پاراقشاسىندا قازاقستاندىقتاردى ناۋرىز مەرەكەسىمەن قۇتتىقتادى, دەپ حابارلايدى Egemen.kz.
قۇرمەتتى دوستار! بارشاڭىزدى ۇلىستىڭ ۇلى كۇنى – ناۋرىز مەيرامىمەن شىن جۇرەكتەن قۇتتىقتايمىن! ءاز-ناۋرىز – تاتۋلىق پەن دوستىقتىڭ, ىرىس پەن ىنتىماقتىڭ, ىزگىلىك پەن جاقسىلىقتىڭ مەرەكەسى. جاڭارۋ مەن جاسامپازدىقتىڭ نىشانى. بۇل كۇندەرى ءتول قۇندىلىقتارىمىز تورگە وزىپ, سالت-ءداستۇرىمىز كەڭىنەن دارىپتەلەدى. تەرەڭنەن تامىر تارتاتىن وسىناۋ مەيرام تاۋەلسىزدىگىمىزدىڭ ارقاسىندا قايتا تۇلەپ, ۇلت رۋحانياتىنىڭ ءورىسىن كەڭەيتتى. مەملەكەت باسشىسى قاسىم-جومارت كەمەل ۇلى توقاەۆ «تاۋەلسىزدىك بارىنەن قىمبات» اتتى ماقالاسىندا ناۋرىزدا قوعامدى ۇيىستىرار قۇندىلىقتارعا باسىمدىق بەرۋدىڭ ماڭىزى زور ەكەنىن ايتقان ەدى. شىن مانىندە, الداعى ۋاقىتتا مەرەكەنىڭ ءمان-مازمۇنىن ودان ءارى ارتتىرا تۇسكەنىمىز ابزال. كەلىپ جەتكەن جاڭا جىلىمىز ەلىمىز ءۇشىن قۇتتى دا قايىرلى بولسىن! ءار شاڭىراققا شاتتىق پەن باق-بەرەكە اكەلسىن! تاۋەلسىز قازاق ەلى ماڭگى جاساي بەرسىن! ۇلىس وڭ, اق مول بولسىن, اعايىن!