بۇل تۋرالى «Egemen Qazaqstan» گازەتىندە ۇيىمداستىرىلعان «ۇلتتىق حالىق ساناعى: ۇپاي تۇگەندەلەتىن تاريحي ءسات» اتتى دوڭگەلەك ۇستەلىندە ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى باسشىسىنىڭ ورىنباسارى نياز كوشكىمباەۆ ايتتى, دەپ حابارلايدى Egemen.kz.
– قازاقستاندا ۇلتتىق حالىق ساناعىن 2021 جىلدىڭ قازان ايىنىڭ 1-30 كۇندەرى ارالىعىندا وتكىزۋ جوسپارلانۋدا. حالىق ساناعىن وتكىزۋگە دايىندىق بارىسى پاندەميا شەكتەۋلەرىن ەسكەرە وتىرىپ, جۇرگىزىلەتىن بولادى. وسى جىلعى ساناققا جاۋاپتى ورگان – ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى. ءاليحان اسحان ۇلى ايتىپ وتكەندەي, قازاقستان حالقىنىڭ ۇلتتىق ساناعىنا دايىندىق جانە وتكىزۋ جۇمىستارىنا بايلانىستى ۇيىمداستىرۋشىلىق, نۇسقاۋشىلىق ماسەلەلەردى شەشۋ ءۇشىن ارنايى كوميسسيا قۇرىلدى. ونىڭ قۇرامىنا ورتالىق مەملەكەتتىك ورگانداردىڭ باسشىلارى, وبلىستاردىڭ, نۇر-سۇلتان, الماتى جانە شىمكەنت قالالارىنىڭ اكىمدەرى كىرەدى. بۇل رەتتە, ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى مەن قورعانىس, ىشكى ىستەر, سىرتقى ىستەر, ءبىلىم جانە عىلىم, دەنساۋلىق ساقتاۋ مينيسترلىكتەرىنىڭ, ۇلتتىق قاۋىپسىزدىك كوميتەتىنىڭ اراسىنداعى ءوزارا ءىس-قيمىل ءتارتىبى ازىرلەنىپ, بەكىتىلدى. سونداي-اق, وسىنداي ءىس-قيمىل ءتارتىبى جەرگىلىكتى اتقارۋشى ورگاندارمەن, وبلىستاردىڭ جانە نۇر-سۇلتان, الماتى جانە شىمكەنت قالالارى اكىمدىكتەرىنىڭ اراسىندا دا ايقىندالدى, – دەدى نياز كوشكىمباەۆ.
ەستەرىڭىزگە سالا كەتەيىك, الداعى كۇز ايلارىندا تۇتاس ءبىر مەملەكەتتىڭ ىشكى بولمىس-ءبىتىمى, حالىقتىڭ تىنىس-تىرشىلىگى تارازىعا تارتىلاتىن تاريحي ءسات كۇتىپ تۇر. ولاي دەيتىنىمىز, ون جىلدا ءبىر رەت وتكىزىلەتىن ۇلتتىق حالىق ساناعى ەلىمىز ەگەمەندىك العالى بەرى وسىمەن ءۇشىنشى مارتە ۇيىمداستىرىلعالى وتىر.