«اتىراۋ» كومانداسى ايىپپۇل تولەيدى

قازاقستان فۋتبول فەدەراتسياسى «اتىراۋ»-«شاحتەر» كوماندالارىنىڭ كەزدەسۋىنەن كەيىن وسىنداي شەشىم قابىلدادى.

«تارتىپتىك رەگلامەنتتىڭ 45-بابى 1-تارماعىنىڭ 1-تارماقشاسىنا سايكەس «اتىراۋ» كومانداسىنىڭ ويىنشىسى الەكسەي روديونوۆ ماتچتىڭ رەسمي تۇلعاسىنا ادەپسىز ءسوز ايتقانى ءۇشىن ءتورت ماتچقا شەتتەتىلسىن. شەتتەتۋ مەرزىمى 2021 جىلعى 14 ناۋرىزدان باستاپ ەسەپتەلسىن. تارتىپتىك رەگلامەنتتىڭ 118-بابىنا سايكەس «اتىراۋ» كومانداسىنىڭ  ويىنشىسى ءسابيت تاستانبەكوۆكە 2021 جىلعى 14 ناۋرىزدان باستاپ بولعان ينتسيدەنتتى جان-جاقتى جانە تولىق زاڭدى تالقىلاۋ ءۇشىن قفف اياسىندا وتكىزىلەتىن بارلىق جارىستاردا 30 (وتىز) كۇنتىزبەلىك كۇنگە شەتتەتۋ تۇرىندەگى ۋاقىتشا سانكتسيا قولدانىلسىن» دەلىنگەن فەدەراتسيانىڭ اقپاراتىندا.

فەدەراتسيانىڭ مالىمەتىنشە, «اتىراۋ» فۋتبول كومانداسى قازاقستان چەمپيوناتى مەن كۋبوگىنىڭ ماتچتارىن وتكىزۋدىڭ تەحنيكالىق رەگلامەنتىن بۇزىپ, ماتچتى ينتەرنەت ارقىلى تاراتۋ مۇمكىندىگىن, پرەمەر-ليگا كلۋبتارى اراسىنداعى 2021 جىلعا ارنالعان Olimpbet رەگلامەنتى-قازاقستان رەسپۋبليكاسىنىڭ چەمپيوناتى نەگىزىندە ستاديون اۋماعىندا (مىنبە استىنداعى ءۇي-جايعا) قۇقىق قورعاۋ ورگاندارىنىڭ نەمەسە جەكە قۇرىلىمداردىڭ كۇشىمەن تورەشىلەر بريگاداسىن الىپ ءجۇرۋدى قامتاماسىز ەتپەگەن.

سول سەبەپتەن, «اتىراۋ» فۋتبول كومانداسىنا تارتىپتىك رەگلامەنتىنىڭ 66-بابىنا سايكەس بۇزۋشىلىقتاردىڭ جيىنتىعىمەن 160 اەك مولشەرىندە ايىپپۇل سالىندى. ەندى كوماندا  466 720 تەڭگەنى 18 ساۋىرگە دەيىن تولەۋى ءتيىس.