دانيال احمەتوۆ مەكتەپتە تاماقتان ۋلانعان وقۋشىلاردىڭ جاعدايىنا قاتىستى پىكىر ءبىلدىردى

ايماق باسشىسىنىڭ ايتۋىنشا, قازىرگى تاڭدا 82 بالا دارىگەرلەردىڭ كومەگىنە جۇگىنگەن.

«36 بالا وسكەمەن قالاسىنداعى انا مەن بالا ورتالىعىنا جاتقىزىلدى. بالالاردىڭ جاعدايى قالىپتى, دارىگەرلەردىڭ باقىلاۋىندا. الدىن الا قويىلعان دياگنوز – جەدەل ىشەك ينفەكتسياسى. كەشەدەن بەرى ول جاقتا ارنايى كوميسسيا جۇمىس ىستەۋدە, قۇرامىندا وبلىستىڭ باس پەدياترى, ەپيدەميولوگ, ينفەكتسيونيست, سونداي-اق سانيتارلىق-ەپيدەميولوگيالىق باقىلاۋ قىزمەتىنىڭ ماماندارى جانە اۋدان اكىمى بار. بۇگىن اۋىلعا ءبىلىم جانە دەنساۋلىق ساقتاۋ باسقارمالارىنىڭ, سانيتارلىق-ەپيدەميالىق باقىلاۋ قىزمەتى دەپارتامەنتىنىڭ باسشىلارى, سونداي-اق وبلىس اكىمى اپپاراتى باسشىسىنىڭ ورىنباسارى شىقتى», دەيدى وبلىس اكىمى.

ونىڭ ايتۋىنشا, مەكتەپ اسحاناسىندا تاماقتاندىرۋ ءىسى جالعا الۋشى جەكە كاسىپكەرمەن ۇيىمداستىرىلعان.

قر قك 304-بابى 1-بولىگى بويىنشا قىلمىستىق ءىس قوزعالدى. ارينە, بۇل ۋاكىلەتتى ورگاندار تاراپىنان تاماقتاندىرۋدى ۇيىمداستىرۋ جۇمىسىن جۇيەلى باقىلاۋعا الماۋلارىنىڭ سالدارى. سوندىقتان, بۇگىن ءتيىستى تۇلعالار جاۋاپكەرشىلىككە تارتىلادى. سونداي-اق بارلىق مەكتەپ, مەكتەپكە دەيىنگى, سونداي-اق وبلىستىڭ ارناۋلى الەۋمەتتىك قىزمەتتەر كورسەتەتىن مەكەمەلەرىنە تەكسەرۋ ۇيىمداستىرىلادى.

«اتا-انالارعا تۇراقتى تۇردە جەدەل جانە ناقتى اقپارات بەرۋ تۋرالى تاپسىرما بەرىلدى. سونىمەن قاتار, انا مەن بالا ورتالىعىندا ەمدەلىپ جاتقان بالالار دا اتا-انالارىمەن تەلەفون ارقىلى بايلانىسقا شىعىپ وتىرۋلارى قاجەت. كەشەدەن بەرى مەكتەپ كارانتينگە جابىلدى. وقۋشىلار قاشىقتىقتان وقىتۋعا كوشىرىلدى», دەيدى دانيال احمەتوۆ.

دانيال احمەتوۆ سونداي-اق اتا-انالاردان بالالاردىڭ دەنساۋلىعىنا قاتىستى ماسەلە تۋىنداعان جاعدايدا دەرەۋ ءتيىستى ورىندارعا حابارلاۋلارىن سۇرادى جانە ماسەلە جەكە باقىلاۋىندا ەكەنىن جەتكىزدى.