باتىس قازاقستان وبلىسىندا بوراندى كۇنى جولعا شىعىپ, دالادا قالىپ قويعان جولاۋشىلار قۇتقارىلدى. ونىڭ ىشىندە بالالار دا بولعان دەپ حابارلايدى Egemen.kz
باتىس قازاقستان وبلىسىندا سوڭعى تاۋلىكتە قۇتقارۋشىلار كۇشەيتىلگەن رەجيمدە جۇمىس جاساۋدا. قار جاۋىپ, قاتتى سوققان جەل كوز كورسەتپەس بورانعا اينالدى.
17 ناۋرىز كۇنى 20 ساعات 58 مينۋتتا باتىس قازاقستان وبلىسى توتەنشە جاعدايلار مينيسترلىگىنىڭ داعدارىس جاعدايىندا باسقارۋ باسقارماسىنا سىرىم اۋدانى, شاعىرلىوي كەنتىنەن 7 شاقىرىم جەردە ورنالاسقان «احمەتجان» قىستاعىندا تراكتورمەن جىلقى ىزدەۋگە شىققان مالشى جوعالىپ كەتكەنى جونىندە حابار كەلىپ ءتۇستى. ەڭ قيىنى, تراكتور كابيناسىندا كىشكەنتاي بالا دا بولعان ەكەن. دەپارتامەنتتىڭ جەدەل-قۇتقارۋ جاساعى دابىل بويىنشا كوتەرىلدى. «ترەكول» اۆتوكولىگىمەن ىزدەستىرۋ جۇمىستارى ارادا 4 ساعات وتكەندە ناتيجە بەردى. تۇنگى 01 ساعات 10 مينۋتتا بالالى مالشى قۇتقارىلدى. ولاردىڭ دەنساۋلىعىنا قاۋىپ جوق.
ءدال وسى كۇنى 22 ساعات 06 مينۋتتا سىرىم اۋدانى, قوڭىر اۋىلى اۋماعىندا سامارا-شىمكەنت تاس جولىنان 10-15 شاقىرىم قاشىقتىقتا نيۆا اۆتوكولىگى قار قۇرساۋىندا قالىپ قويعانى تۋرالى دا حابار تۇسكەن. قۇتقارۋشىلار بۇل جولى دا جەدەل قيمىلدادى. №14 ءورت ءسوندىرۋ پۋنكتىنىڭ قىزمەتكەرلەرى وقيعا ورنىنا جەتىپ, 5 ادامدى قۇتقاردى. ونىڭ ىشىندە 1 بالا بولاتىن. ولار تۇرعىلىقتى جەرى قوڭىر اۋىلىنا جەتكىزىلدى.
وسى كۇنى سىرىم اۋدانى تاسقۇدىق اۋىلى شاماسىندا قالىڭ قاردان جۇرە الماي جولدا قالعان نيۆا اۆتوكولىگىنىڭ 3 جولاۋشىسى دا قۇتقارىلىپ, جىمپيتى كەنتىنىڭ جىلىتۋ پۋنكتىنە جەتكىزىلدى.
18 ناۋرىزدا تۇنگى 01 ساعات 42 مينۋتتا تەرەكتى اۋدانى اقسوعىم اۋىلى ماڭىندا, بارباستاۋ-يندەر تاس جولىنىڭ 71 شاقىرىمىندا 3 جۇك كولىگى, 7 جەڭىل كولىك جۇرە الماي, جولدا قالعانى انىقتالدى. قۇتقارۋشىلار اقجايىق اۋىلىنداعى جىلىتۋ پۋنكتىنە ادامداردى جەدەل تۇردە ەۆاكۋاتسيالادى. قۇتقارىلعان 10 ادامنىڭ ىشىندە 6-ۋى بالالار ەكەن. اۆتوكولىك جۇرگىزۋشىلەرى ەۆاكۋاتسيادان باس تارتقان.
ناۋرىز ايى بەل ورتادان اسىپ كەتسە دە باتىس قازاقستان وبلىسىندا قىس تاعىنان تۇسەر ەمەس. سوندىقتان وبلىستىق توتەنشە جاعدايلار دەپارتامەنتى جولاۋشىلاردى قاۋىپسىزدىك شارالارىن قاتاڭ ساقتاۋعا شاقىرىپ جاتىر. «جولدارداعى جاعداي̆ تۋرالى اقپاراتتى «دارمەن» ءموبيلدى قوسىمشاسىنان الۋعا بولادى» دەيدى دەپارتامەنتتىڭ ءباسپاسوز قىزمەتى.