1 ناۋرىزداعى جاعداي بويىنشا 109,7 مىڭ ادام ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىنىڭ قاتىستى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
باعدارلامانىڭ ءبىرىنشى باعىتى اياسىندا قىسقا مەرزىمدى كۋرستارعا 236 ادام جىبەرىلدى. ءوز ءىسىن اشۋ ءۇشىن 1,2 مىڭ ادام مەملەكەتتىك گرانتتار الدى.
سۋبسيديالاناتىن جۇمىس ورىندارىنا 68,6 مىڭ ادام جۇمىسقا ورنالاستىرىلدى, ونىڭ ىشىندە: الەۋمەتتىك جۇمىس ورىندارىنا 9,7 مىڭ ادام, جاستار پراكتيكاسىنا – 5,1 مىڭ ادام, قوعامدىق جۇمىستارعا – 53,8 مىڭ ادام.
ەڭبەك رەسۋرستارىنىڭ ۇتقىرلىعى شەڭبەرىندە 35 وتباسى نەمەسە 97 ادام قونىس اۋداردى, ونىڭ ىشىندە 47 ادام ەڭبەككە قابىلەتتى جاستا. ەڭبەككە قابىلەتتى 23 ادام جاڭا تۇرعىلىقتى جەردە تۇراقتى جۇمىس ورىندارىنا ورنالاستىرىلدى.
ەستەرىڭىزگە سالا كەتەيىك, 2020 جىلى «ەڭبەك» مەملەكەتتىك باعدارلاماسىنا 649 مىڭ ادام قاتىستى. 437,3 مىڭ ادام جۇمىسقا ورنالاستىرىلدى, ونىڭ 319,2 مىڭى تۇراقتى جۇمىسقا تۇردى. جاپپاي كاسىپكەرلىكتى دامىتۋعا 12,7 مىڭ ميكروكرەديت جانە جاڭا بيزنەس-يدەيالاردى ىسكە اسىرۋعا 44,9 مىڭ مەملەكەتتىك قايتارىمسىز گرانت بەرىلدى.
قىسقا مەرزىمدى وقىتۋ كۋرستارىنا 18,7 مىڭ ادام جىبەرىلدى, ال تجكب ۇيىمدارىندا وقىتۋمەن 18,4 مىڭ ادام قامتىلدى.
بۇدان باسقا, ەڭبەك رەسۋرستارىنىڭ ۇتقىرلىعىن ارتتىرۋ شەڭبەرىندە جۇمىس كۇشى ارتىق وڭىرلەردەن قۇرامىندا 5,8 مىڭ ادام بار 1,8 مىڭ وتباسى قونىس اۋداردى.