جاڭادان سالىنعان ناۋرىزباي اۋدانى اكىمدىگىنىڭ عيماراتىنا ورنالاسقان وتباسىلىق وقۋ-كىتاپحاناسىنىڭ ديرەكتورى باقىت ساۋرامباەۆا مۇندا ەلدەگى پاندەمياعا قاتىستى كارانتيندىك تالاپتاردىڭ ءار كەز ساقتالىپ وتىرعانىن, سول ارقىلى اۋداندا وتەتىن كەزەكتەگى ۇلاعاتتى شارالاردىڭ دا ەش ۇزىلمەگەنىن العا تارتتى.
– ناۋرىزباي اۋدانى اكىمدىگىنىڭ قولداۋىمەن كىتاپحانا وقىرماندارىمەن ۇلى اباي, ءال-فارابي جىلىنا وراي ونلاين-وفلاين ون-سان كەزدەسۋ وتكىزدىك, – دەدى باقىت دەمەكجانقىزى. – ال بۇگىنگى زالعا جينالعان شاعىن ءارى وقشاۋ توپتاعى وقىرمان مەن قوناقتار جۇزدەسۋىنىڭ ءوز ەرەكشەلىگى بار.
مادەني ءىس-شارانىڭ مودەراتورى, كىتاپحانا قىزمەتكەرى ءلاززات يساباەۆا جىر الىبى جامبىلعا ارنالعان «جامبىل مەنىڭ ءجاي اتىم, حالىق مەنىڭ شىن اتىم» اتتى ادەبي-كوركەم مازمۇنداعى باسقوسۋدا اقىننىڭ قىسقاشا ومىرباياندىق دەرەكتەرىن ۆيدەولىق كورسەتىلىممەن دەمەپ, شىرايلاندىرىپ جىبەردى. ارنايى شاقىرىلعان قوناقتاردىڭ كوشباسشىسى – جازۋشى, حالىقارالىق جامبىل قورىنىڭ ديرەكتورى ماناربەك ءىزباسار رەسپۋبليكامىزدىڭ تۇكپىر-تۇكپىرىندە ۇيىمداستىرىلىپ جاتقان ءىس-شارالاردىڭ, ياعني ۇلى اقىننىڭ مۇراسىن زەرتتەۋ, زەردەلەۋ باعىتىنداعى ءتۇرلى كەشتەر مەن عىلىمي كونفەرەنتسيالاردىڭ, سيمپوزيۋمدار مەن جىر الىبى كەشتەرىنىڭ باعدارلاماسى تۋرالى ءتۇيىندى اڭگىمە ايتتى.
– قازاق پوەزياسى مەن اقىندىق-جىر ونەرىنىڭ قوس الىبى وزىنەن كەيىنگى ۇرپاققا وشپەس مۇرا قالدىردى. كۇنى كەشە ۇلى ابايدىڭ مەرەيتويىن ۋاقىت كەزەڭىنىڭ اياقتان شالعان «COVID-19» قيىندىقتارىنا قاراماستان لايىقتى مەرەكەلەپ, شىعارىپ سالدىق. ەلىمىزدە پاندەميا دەرتى ءالى دە تولىعىمەن جويىلعان جوق, سول سەبەپتى شەكتەۋ تالاپتارىنا مويىنسۇنا وتىرىپ, ۇلى جامبىل بابامىزدىڭ 175 جىلدىق مەرەيلى مەرەكەسىن اتاپ ءوتۋ ءىس-شارالارىن جالعاستىرا بەرمەكپىز. بۇگىنگى كەزدەسۋىمىزدىڭ كەلبەتىن اشۋ ءۇشىن مەن ەلدەن ۇلى اقىننىڭ شوبەرەسى, جىرشى بەكمۇرات الىمقۇل ۇلى جامبىلوۆتى, شوپشەگى ءاليحاندى ادەيى شاقىرتىپ الىپ كەلدىم, – دەدى م.ءىزباسار.
اقىن شوبەرەسىنىڭ دومبىرانىڭ قوڭىر ۇنىمەن كەمەل داۋىسقا سالىپ اۋەلەتكەن ەرەكشە ەكپىندى جىر-تەرمەلەرى شىن مانىندە توسىنسىيعا اينالدى. ول وقىرماندار زالىنداعى قايتالاي كورسەتىلىپ تۇرعان ۆيدەوداعى ناعىز جامبىل بەينەسىمەن ۇيلەسىپ, بارشاعا ورتاق عاجايىپ كورىنىس اكەلگەندەي اسەر ەتتى. ۇلى جامبىلدىڭ ءوزىن كورگەندەي كۇي كەشكەن كوپشىلىك بەكمۇرات جامبىلوۆقا دۋ قول شاپالاقتاپ, قۇرمەت كورسەتتى.
بەلگىلى جازۋشى, فيلولوگيا عىلىمدارىنىڭ دوكتورى, پروفەسسور نۇرداۋلەت اقىش جامبىلدىڭ ادەبي-عۇمىرنامالىق ءومىر جولىنا قىسقاشا شولۋ جاساپ, جالىن جۇرەك جاس جىگىت جامبىلدىڭ بۇرىم سۇلۋعا عاشىقتىعى حيكايالارىن ورتاعا سالدى, اقىننىڭ ماحاببات سەزىمدەرىنە تۇنعان سيرەك جىر جولدارىنان ءۇزىندى وقىدى.
مايتوبەنىڭ كوكمايسالى باۋرايىندا جىر الىبىنىڭ تىزەسىنە وتىرىپ باتاسىن العان قازىرگى قازاق جۋرناليستيكاسىنىڭ اقساقالى, قازاقستان فوتوونەرىنىڭ قايراتكەرى نۇرمانبەت قيزات ۇلىنىڭ قىزىقتى ەتىپ بابىمەن ايتقان اقىن بابا تۋرالى ەل اراسىنداعى اقيقات تا اڭىز اڭگىمەلەرى دە تىڭداۋشىلارىن ۇيىتتى.
كىتاپحانا وقىرماندارى دا كەزدەسۋگە قۇرالاقان كەلمەپتى, كەزەك-كەزەك جامبىل ولەڭدەرىنەن ءۇزىندى وقىپ, جىردان شاشۋ شاشتى.
«جامبىل ەسىمى – ەشقانداي دا تانىستىرۋدى قاجەت ەتپەيتىن بۇكىلالەمدىك ەرەكشە قۇبىلىس», دەپ ادەبي-كوركەم باسقوسۋدى قورىتىندىلاعان ءسوز زەرگەرى م.ءىزباسار ءوزى قىزمەت ەتەتىن اباي اتىنداعى قازاق ۇلتتىق پەداگوگيكادىق ۋنيۆەرسيتەتىنىڭ «ۇلاعات» باسپاسىنان شىققان جىر الىبىنىڭ شىعارمالار جيناعى مەن ۇلكەن پورترەتىن ناۋرىزباي اۋداندىق وتباسىلىق وقۋ-كىتاپحاناسىنا سىيعا تارتتى.
الماتى
سۋرەتتە: (سولدان وڭعا قاراي) ۇلى جامبىلدىڭ شوبەرەسى بەكمۇرات جامبىلوۆ, حالىقارالىق جامبىل قورىنىڭ ديرەكتورى, جازۋشى ماناربەك ءىزباسار جانە وتباسىلىق وقۋ-كىتاپحاناسىنىڭ ديرەكتورى باقىت ساۋرامباەۆا.