اتىراۋ وبلىسىندا 10 ناۋرىزدا جوعالىپ كەتكەن 60 جاستاعى شوپاننىڭ دەرەگى شىقپاي تۇر.
وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ اقپاراتىنا سۇيەنسەك, شوپان يساتاي اۋدانىنداعى شارۋا قوجالىعىندا جۇمىس ىستەگەن.
«10 ناۋرىزدا ەكى شوپان وتاردى ورىسكە شىعارعان. ونىڭ ءبىرى– 60 جاستاعى ازامات جاڭا تۋعان قوزىنى الىپ, تۇيەمەن قىستاۋعا بەتتەگەن. ال, ەكىنشى شوپان كەشكە وتاردى قىستاققا اكەلگەن. جوعالعان شوپاندى ىزدەۋ سول كۇنى, 10 ناۋرىزدا باستالدى» دەپ حابارلادى دەپارتامەنتتىڭ ءباسپاسوز قىزمەتى.
بىراق, 6 كۇن بۇرىن ءىز-ءتۇزسىز جوعالىپ كەتكەن شوپان ءالى تابىلعان جوق. بۇگىن, 16 ناۋرىزدا ونى ىزدەۋگە«قازاۆياقۇتقارۋ» رمك اتىراۋ فيليالىنىڭ مي-8 تىكۇشاعى تارتىلدى.
«بەس ساعاتقا جۋىق اۋەدەن ىزدەستىرۋ جۇرگىزىلدى. تىكۇشاقپەن يساتاي, سونداي-اق كورشىلەس ماحامبەت جانە يندەر اۋداندارىنىڭ باتىس قازاقستان وبلىسىنىڭ اۋماقتىق شەكاراسىنا دەيىنگى شالعاي ۋچاسكەلەر زەرتتەلدى. توتەنشە جاعدايلار دەپارتامەنتىنىڭ قىزمەتكەرلەرى شالعايدا قاراۋسىز قالعان قىستاۋلاردى دا تەكسەردى» دەدى ءباسپاسوز قىزمەتىنەن.
ءىز-ءتۇزسىز جوعالعان شوپاندى 4 توتەنشەلىك, 10 پوليتسەي, سونداي-اق, شارۋا قوجالىعىنىڭ 2 قىزمەتكەرى «ترەكول»جانە وزگە دە كولىكتەرمەن ىزدەستىرۋدى جالعاستىرىپ جاتىر.