ماۆريكي بيلىگى ەلدەگى ىندەت جۇقتىرعاندار سانى كۇرت كوبەيگەنىنە بايلانىستى شەتەلدىك تۋريستەر ءۇشىن شەكارانى 2 اپتاعا جابۋعا ءماجبۇر بولدى, دەپ حابارلايدى Egemen.kz
ارالداردا لوكداۋن جاريالانعاندىقتان, اۋەجايلار حالىقارالىق رەيستەردى قابىلدامايدى. بىراق ماۆريكيدەن ۇشۋعا بولادى. مۇنداي شارالار پاندەميا كەزىندە ەكىنشى رەت قابىلدانىپ وتىر. قازىر ارحيپەلاگتا كوروناۆيرۋستىق جۇقتىرىپ, اۋىرىپ قالعان 15 ادام بار.
ء«بىز ۆيرۋستىڭ ودان ءارى تارالۋ قاۋپى جوق ەكەنىنە كوز جەتكىزۋ ءۇشىن ۇلتتىق لوكداۋن ەنگىزۋدى شەشتىك. ماۆريكي قوناقتاردى تاعى قارسى الۋدى اسىعا كۇتەدى جانە ەندى ولار ءبىزدىڭ جەرىمىزدە قاۋىپسىز ءارى سەنىمدى ەكەنىن بىلەتىن بولادى», دەدى ءتۋريزمدى دامىتۋ باسقارماسىنىڭ توراعاسى نيلەن ۆەنكاداسمي.
شەتەلدىكتەر قاتاڭ كارانتيندىك رەجىم ەنگىزىلگەنگە دەيىن ماۆريكيگە كەلە الاتىن. ولار پتر-تەستتىڭ تەرىس ناتيجەسىن جانە قوناقۇيدەن ورىن العانىن راستاۋ كەرەك ەدى.
ايتا كەتەيك, قاڭتار ايىندا جەرگىلىكتى بيلىك ۆاكتسينا سالدىرعان تۋريستەر ءۇشىن ەكى اپتالىق كارانتيندى الىپ تاستاۋعا جانە ولاردىڭ ەلگە ەركىن كىرۋىن قامتاماسىز ەتۋگە دايىن ەكەنىن مالىمدەدى.