اتىراۋدا تەمىر جول ۆوكزالىنىڭ اۋماعىن كەڭەيتۋ جوسپارلانىپ وتىر. اتىراۋ قالالىق اكىمدىگى ءباسپاسوز قىزمەتىنىڭ مالىمەتىنشە, بۇعان جولاۋشىلار سانىنىڭ ارتۋى سەبەپ بولعان. سوندىقتان, تەمىر جول ۆوكزالىن جانىنداعى اۆتوبەكەتپەن بىرىكتىرۋ كوزدەلىپتى, دەپ حابارلايدى Egemen.kz
ۆوكزال عيماراتى 1972 جىلى 500 ورىنعا ەسەپتەلىپ سالىنعان. الايدا, قازىر ۆوكزالعا كەلۋشىلەر سانى 6 ەسەگە ارتىپ, 3000-عا جەتكەن. جول ءجۇرۋ باعىتى دا كوبەيدى. ماسەلەن, اتىراۋلىق ستۋدەنتتەر الماتى مەن نۇر-سۇلتانعا, ماڭعىستاۋ مەن اقتوبە قالاسىنا كوپ قاتىنايدى. سونداي-اق جىلىوي اۋدانىنداعى كاسىپورىنداردا ۆاحتالىق ادىسپەن جۇمىس ىستەيتىن جۇمىسشىلار دا وسى ۆوكزالدان جولعا شىعادى.
«جولاۋشىلار اعىنىڭ كوبەيۋىنە بايلانىستى ۆوكزالدى كەڭەيتۋ جوسپارلانىپ وتىر. وسىعان وراي قاسىنداعى اۆتوبەكەتتى ۆوكزالعا قوسىپ, اۋماعىن كەڭەيتۋگە بولادى. بۇل جوسپار اۆتوبەكەتتى «قازاقستان تەمىر جولى» ۇك» اق بالانسىنا العاننان كەيىن عانا جۇزەگە اسىرىلادى. قازىر اۆتوبەكەتتى بالانسقا الۋ جۇمىسى جۇرگىزىلىپ جاتىر. مۇنى وتە ءتيىمدى جوبا دەپ ەسەپتەيمىز», دەيدى «اتىراۋ ماگيسترالدى جەلى» بولىمشەسىنىڭ ديرەكتورى ەلۋباي ساپاروۆ.
ونىڭ ايتۋىنشا, الداعى ۋاقىتتا وبلىس اكىمىنىڭ باستاماسىمەن «قازاقستان تەمىر جولى» اق-نىڭ قولداۋىمەن «اتىراۋ-قۇرمانعازى» باعىتىنا قاتىنايتىن جۇردەك پويىز ىسكە قوسىلماق. بۇل دا ۆوكزالعا كەلۋشىلەردىڭ سانىن ارتتىرادى.
«ۆوكزال اۋماعىن كەڭەيتۋ جوسپارى ىسكە اساتىن بولسا, وبلىسارالىق اۆتوبۋستار ءۇشىن اۆتوبەكەتتى باسقا جەرگە اۋىستىرۋ ماسەلەسى قاراستىرىلاتىن بولادى. ءبىز ونى اتىراۋ قالاسى ماڭىنداعى «الامان» بازارىنا كوشىرۋدى ويلاستىرىپ وتىرمىز. ازىرگە ناقتى شەشىم قابىلدانعان جوق» دەيدى «سمارت اتىراۋ» كمم ديرەكتورىنىڭ ورىنباسارى رۇستەم ەرنيازوۆ.