كولۋمبياداعى ESPN سپورتتىق تەلەارناسىنىڭ تىكەلەي ەفيرىندە جۋرناليست كارلوس وردۋس ءبىر ولىمنەن امان قالدى, دەپ حابارلايدى Egemen.kz Eurosport-قا سىلتەمە جاساپ.
بۇعان سەبەپ, حابار بارىسىندا كۇتپەگەن جەردەن جۇرگىزۋشىنىڭ ۇستىنە ۇلكەن ەكران قۇلاپ كەتتى. بۇل وقيعا ونىڭ جانىندا وتىرعان ارىپتەستەرىن ابدىراتىپ تاستادى.
الەۋمەتتىك جەلىدە وقيعانىڭ ۆيدەوسى تارالىپ ۇلگەردى. ۆيدەودا ۇلكەن ەكران ءجۋرناليستى ۇستەلگە جابىستىرىپ تاستاعانى انىق بايقالادى. قۋانىشقا وراي, ءتىلشى قاتتى زارداپ شەكپەگەن.
كارلوس وردۋس ءوزىنىڭ جاعدايى جاقسى ەكەنىن ايتتى. كەيىنىرەك Twitter-دە دەنساۋلىعى تۋرالى جازدى.
«وقيعادان كەيىن جازىپ جاعدايىمدى بىلگەن جانە قولداعان ادامدارعا ءبارى جاقسى ەكەنىن ايتقىم كەلەدى. قۇدايعا شۇكىر, مەديتسينالىق تەكسەرۋدەن كەيىن دارىگەرلەر اۋىر ەشتەڭە تاپپادى. تەك مۇرىنىم عانا كوگەرگەن ەكەن. ۋايىمداعانداردىڭ بارىنە راحمەت», دەدى ول.