اتىراۋدا 6 ناۋرىزدا جۇمىسىنا بارار جولدا جوعالىپ كەتكەن 54 جاستاعى كۇزەتشىنى تاپپاي جاتىر, دەپ حابارلايدى Egemen.kz.
وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە, جوعالىپ كەتكەن 54 جاستاعى ت.ورازاليەۆ «WDC» جشس-دە كۇزەتشى بولىپ جۇمىس ىستەيدى ەكەن.
«دەپارتامەنتتىڭ ديسپەتچەرلىك پۋلتىنە 10 ناۋرىزدا اتىراۋ قالاسىنىڭ تۇرعىنىنان 1967 جىلى تۋعان ت.ورازاليەۆتىڭ 6 ناۋرىزدا ساعات 19-00-دە ۇيىنەن جۇمىسىنا شىعىپ, وسى ۋاقىتقا دەيىن قايتا ورالماعانى تۋرالى حابار ءتۇستى. جوعالعان ازاماتتى ىزدەستىرۋگە 10 ناۋرىزدا جەدەل قۇتقارۋ جاساعىنىڭ 7 قىزمەتكەرى, 4 كينولوگيالىق ەسەپ پەن 4 تەحنيكا جۇمىلدىرىلدى. سونداي-اق, ەرىكتىلەرمەن بىرگە (4 ادام مەن 2 تەحنيكا) بىرلەسىپ بىرلىك, اقساي, جۇلدىز-3 ەلدى مەكەندەرىندە ىزدەستىرۋ جۇرگىزىلدى» دەپ حابارلادى دەپارتامەنتتىڭ ءباسپاسوز قىزمەتى.
ىزدەستىرۋ جۇمىستارى بۇگىن, 11 ناۋرىزدا ساعات 08:00-دە قايتا جالعاسىپ, وعان جەدەل قۇتقارۋ جاساعىنىڭ 10 قىزمەتكەرى, 3 تەحنيكاسى (ونىڭ ىشىندە 2 كينولوگيالىق ەسەپ) مەن جوعالىپ كەتكەن ازاماتتىڭ 10 تۋىسى تارتىلدى.