قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى ءوز قىزمەتىنىڭ تيىمدىلىگىن ارتتىرۋ ءۇشىن ءاردايىم دامۋ جانە وزگەرۋ ۇستىندە.
وزدەرىڭىزگە ءمالىم, 2019 جىلى سىبايلاس جەمقورلىققا قارسى ءىس-قيمىل بويىنشا مەملەكەت باسشىسىنا ەسەپتى ورگان قۇرىلعاننان كەيىن, ەڭ وزىق شەتەلدىك تاجىريبە بويىنشا جەدەل-ىزدەستىرۋ بولىمىمەن قاتار قۇرامىنا پرەۆەنتسيا, پاراساتتىلىق جانە سەرىكتەستىك دەپارتامەنتتەرى كىرەتىن اۋقىمدى الدىن الۋ بلوگى قۇرىلدى.
بۇل سىبايلاس جەمقورلىقتىڭ الدىن-الۋعا جانە ونىڭ العىشارتتارىن جويۋعا كۇش سالۋعا مۇمكىندىك بەردى.
اگەنتتىكتىڭ جاڭا كورپوراتيۆتى ءستيلىنىڭ قابىلدانۋى مەن قولدانىلۋى قوعاممەن ءتيىمدى بايلانىس ورناتۋعا ىقپال ەتتى.
سىبايلاس جەمقورلىققا قارسى قىزمەتتە قوعامدىق باقىلاۋدى كەڭەيتۋ باستاماسى رەتىندە قوعام وكىلدەرى اگەنتتىكتىڭ كونسۋلتاتيۆتىك-كەڭەسشى ورگاندارىنىڭ جۇمىسىنا جانە تارتىپتىك, ەتيكالىق تاجىريبە, مەملەكەتتىك ساتىپ الۋ راسىمدەرى ماسەلەلەرىن تالقىلاۋعا, سونىمەن قوسا, سىبايلاس جەمقورلىققا قارسى ساياساتتى جەتىلدىرۋگە, اگەنتتىكتىڭ اپتالىق اپپاراتتىق ماجىلىستەرىنە قاتىسادى.
2018 جىلى باستالعان ورگاننىڭ قىزمەتىن وڭتايلاندىرۋ ارقىلى الدىن الۋ جانە قۇقىق قورعاۋ مىندەتتەرىن ۇتىمدى رەتتەۋمەن كاسىبي كوماندا قۇرىلدى.
اتاپ ايتقاندا, قوسالقى قىزمەتتەردى ورتالىقتاندىرۋ جانە وڭتايلاندىرۋ (كادرلىق, قارجىلىق جانە زاڭگەرلىك) ىسكە اسىرىلدى.
2020 جىلى اۋدانارالىق بولىمشەلەردى قىسقارتۋ جالعاستى - 13-ءتىڭ تاعى 9-ى تاراتىلدى (2019 جىلى 41 بولدى), ەلدىڭ ءىرى ايماقتارىندا 4-ەۋى قالدى (الماتى, شىعىس قازاقستان, قاراعاندى, تۇركىستان وبلىستارى).
باسشىلىق 453-تەن 253-كە دەيىن 2 ەسەگە قىسقاردى.
باسشىلار مەن ورىنداۋشىلاردىڭ اراقاتىناسى 1:8-گە جەتتى (وڭتايلاندىرۋعا دەيىن - 1:2).
وڭتايلاندىرۋ شارالارىنىڭ ارقاسىندا سىبايلاس جەمقورلىققا قارسى قىزمەتتىڭ بوس ورىندار قورى 25%-عا جەتكىزىلىپ, جەدەل-تەرگەۋ ءبولىمى كۇشەيتىلدى.
سونىمەن, 2019 جىلى كۆازيمەملەكەتتىك سەكتورداعى, قۇقىق قورعاۋ جانە سوت ورگاندارىنداعى سىبايلاس جەمقورلىق قۇقىق بۇزۋشىلىقتارىن انىقتاۋ جانە تەرگەۋ جونىندە 2 جاڭا دەپارتامەنت قۇرىلدى.
2020 جىلى مەملەكەتتىك ورگانداردىڭ جوعارى باسشىلىق قۇرامى اراسىندا قىلمىستاردى انىقتايتىن ماقساتتى بولىمشە قۇرىلدى.
ۇنەمدەلگەن قاراجات ماتەريالدىق-تەحنيكالىق بازانى نىعايتۋعا, قىزمەتكەرلەردى قارجىلىق قولداۋ مەن ىشكى بيزنەس-پروتسەستەردى تسيفرلاندىرۋعا باعىتتالدى.
توراعانىڭ تسيفرلاندىرۋ جونىندەگى كومەكشىسى – جاڭا لاۋازىمى ەنگىزىلدى.
ونىڭ باسشىلىعىمەن ىشكى پروتسەستەر مەن سىرتقى كوممۋنيكاتسيالاردى تسيفرلاندىرۋ ماقساتىندا سىبايلاس جەمقورلىققا قارسى تسيفرلىق قىزمەتتى تالداۋ پلاتفورماسىن ىسكە اسىرۋدىڭ ءبىرىنشى كەزەڭى اياقتالدى.
جوبانىڭ مىندەتتەرى - كادرلىق پروتسەستەردى تسيفرلاندىرۋ (Antikor-HR), ۆەدومستۆولىق ەسەپتىلىكتى اۆتوماتتاندىرۋ (Antikor-Stat) جانە الدىن الۋ جۇمىستارىن جۇيەلەۋ (Antikor-Prevent).
جازا تاعايىنداۋ بارىسىندا قاماۋعا الۋدى كوزدەمەيتىن, ەلەكتروندىق باقىلاۋ قۇرالدارىن قولدانۋ باستالدى (2020 جىلى 5 كۇدىكتى تاۋلىك بويى باقىلاۋدا بولدى).
«ە - قىلمىستىق ءىس» جوباسىنىڭ اياسىندا تەرگەۋشىلەردىڭ جۇمىس ورىندارى جابدىقتالىپ, مالىمەتتەر قاۋىپسىزدىگى قامتاماسىز ەتىلدى. 2020 جىلى 121 قىلمىستىق ءىس ەلەكتروندى تۇردە تەرگەلدى.
ەلباسىنىڭ, مەملەكەت باسشىسىنىڭ قولداۋى مەن بوس ورىندار قورى اگەنتتىك پەن ونىڭ اۋماقتىق ورگاندارى قىزمەتكەرلەرىنىڭ ەڭبەكاقىسىن ەكى ەسەدەن استام ارتتىرۋعا مۇمكىندىك بەردى.
اگەنتتىك قىزمەتكەرلەرىن تۇرعىن ۇيمەن قامتاماسىز ەتۋ بويىنشا جۇمىس تۇراقتى نەگىزدە جۇرگىزىلۋدە. قازىرگى تاڭدا جەكە قۇرامنىڭ 80%-ى تۇرعىن ۇيمەن قامتاماسىز ەتىلگەن.
سونىمەن قاتار, مەملەكەت باسشىسى اگەنتتىكتىڭ جەدەل-تەرگەۋ قۇرامىنىڭ قىزمەتكەرلەرىنە تۇرعىن ءۇي تولەمدەرىن بەلگىلەۋ تۋرالى زاڭعا قول قويدى. وتكەن جىلدىڭ سوڭىندا باسپاناعا مۇقتاج 260 قىزمەتكەرگە تولەم ەسەپتەلدى.
نۇر-سۇلتان, كوكشەتاۋ جانە تالدىقورعان قالالارىندا 121 قىزمەتكەر پاتەرلەردى نارىقتىق باعادان تومەن باعامەن ساتىپ الۋ ءۇشىن قۇرىلىس سالۋشىلارمەن كەلىسىمشارت جاساستى.
105 قىزمەتتىك پاتەر ءبولىندى. جەكە كومپانيالارمەن سالىستىرۋعا بولاتىن ەڭبەكاقىنىڭ جانە الەۋمەتتىك قامسىزداندىرۋدىڭ جوعارى دەڭگەيى ازاماتتىق سەكتوردان جانە باسقا مەملەكەتتىك ورگانداردان جوعارى بىلىكتى كادرلاردىڭ كەلۋىن قامتاماسىز ەتتى.
7 قىزمەتكەردىڭ پرەزيدەنت اكىمشىلىگى مەن پرەمەر-مينيستر كەڭسەسىندە, 15 - ۇلتتىق قاۋىپسىزدىك ورگاندارىندا, 29 - پروكۋراتۋرادا, 17 - ازاماتتىق سەكتوردا جۇمىس تاجىريبەسى بار. قازىرگى تاڭدا ولاردىڭ ارقايسىسى اگەنتتىكتىڭ ۇيىمدىق قۇرىلىمىندا نەگىزگى قىزمەتتەر اتقارادى.
اگەنتتىكتەگى مەملەكەتتىك قىزمەتتىڭ تارتىمدىلىعىن بىزگە جۇمىسقا تۇرۋعا نيەت بىلدىرگەندەردىڭ سانى دا ايعاقتايدى.
وسىلايشا, «ب» كورپۋسىنىڭ بوس لاۋازىمدارىنا ورنالاسۋعا ارنالعان كونكۋرستارعا ورتاشا ەسەپپەن ءبىر ورىنعا 21 ۇمىتكەر قاتىسادى. بۇل باسقا ورتالىق مەملەكەتتىك ورگاندارعا ءوتىنىش بەرۋشىلەردىڭ ورتاشا كورسەتكىشىنەن 3 ەسە كوپ, ءبىر ورىنعا 7 ادام.
كەي جاعدايدا اگەنتتىكتە قىزمەتتىڭ بەدەلىنە ەرەكشە ءمان بەرىلەدى. وتكەن اپتادا عانا پاراساتتىلىق دەپارتامەنتىنىڭ ساراپشىسى لاۋازىمىنا كونكۋرسقا قاتىسۋعا 101 ۇمىتكەر ءوتىنىش بەردى.
كادرلىق ترانسفورماتسيالاۋ تۇرعىسىنان قىزمەتكەرلەردىڭ ءبىلىم ساپاسىنا زور كوڭىل بولىنەدى. قازىرگى ۋاقىتتا اگەنتتىكتە شەتەلدىك جوعارى وقۋ ورىندارىنىڭ 32 تۇلەگى جۇمىس ىستەيدى, ونىڭ 12-ءسى «بولاشاق» باعدارلاماسى بويىنشا وقىعان.
2 قىزمەتكەر PhD دارەجەسىنە يە, تاعى ەكەۋى ونى الۋعا دايىندالۋدا, 10-ى عىلىم كانديداتى, 127-ءسى ماگيستر.
7 ادام شەتەلدىك جوعارى وقۋ ورنىندا ءبىلىم الۋدا, ونىڭ ىشىندە 6-اۋى «بولاشاق» باعدارلاماسى بويىنشا. سونىمەن قاتار سوت تورەلىگى اكادەمياسىندا - 2 ادام, قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىندا - 3, قۇقىق قورعاۋ ورگاندارى اكادەمياسىندا - 2 ادام دوكتورانتۋرا جانە ماگيستراتۋرا باعدارلامالارى بويىنشا وقيدى.
اگەنتتىكتىڭ 5 قىزمەتكەرى پرەزيدەنتتىڭ جاستار كادرلىق رەزەرۆىنىڭ مۇشەلەرى, بۇل ۆەدومستۆونىڭ سانى ازدىعىن ەسكەرگەندە, مەملەكەتتىك ورگاندار اراسىنداعى ەڭ جوعارى كورسەتكىشتەردىڭ ءبىرى بولىپ سانالادى.
ءوز قاتارىمىزدىڭ تازالىعىن قامتاماسىز ەتۋ ماقساتىندا جەكە قۇرام تاراپىنان قۇقىق بۇزۋشىلىقتاردى انىقتاۋ جانە الدىن الۋ بويىنشا جۇيەلى تۇردە ساۋالناما جۇرگىزۋ, كەنەتتەن تەكسەرۋ جانە سوت زالىنان قىزمەتكەرلەرگە قاتىستى ۇكىمدەر جاريالاۋ ارقىلى قاجەتتى شارالار كەشەنى تۇراقتى تۇردە جۇرگىزىلەدى.
ماسەلەن, 3 جىلدا ورەسكەل ءتارتىپ بۇزۋشىلىقتار ءۇشىن جاعىمسىز سەبەپتەرمەن 15 قىزمەتكەر جۇمىستان شىعارىلدى.
اگەنتتىك توراعاسىن قوسقاندا بارلىق باسشىلار, ەگەر قاراماعىنداعىلار كەمىندە ءبىر سىبايلاس جەمقورلىق قۇقىق بۇزۋشىلىعىن جاساعان جاعدايدا, ءوز ەركىمەن جۇمىستان بوساتۋ تۋرالى مىندەتتەمە الدى.