اسحات ايماعامبەتوۆ كوللەدجدەردە وقۋ مەرزىمى قىسقاراتىنىن ايتتى

«تەحنيكالىق جانە كاسىپتىك ءبىلىم بەرۋ سالاسىندا بارلىق جاسقا قاجەتتى ماماندىقتار بويىنشا كوللەدجدەردە تەگىن وقۋعا مۇمكىندىك بەرىلەدى. 2017 جىلدان بەرى تەگىن تەحنيكالىق ءبىلىم بەرۋمەن قامتۋ ۇلعايدى. بىراق ءالى دە 50 مىڭعا جۋىق ستۋدەنت اقىلى بولىمگە وقۋعا تۇسەدى. وسىعان وراي 2025 جىلعا دەيىن جاستاردى كەزەڭ-كەزەڭمەن 100%-عا دەيىن تەحنيكالىق بىلىممەن قامتۋ جوسپارلانۋدا. ول ءۇشىن مەملەكەتتىك تاپسىرىس كولەمى 50 مىڭعا دەيىن كەزەڭ-كەزەڭمەن ۇلعاياتىن بولادى», دەدى مينيستر.

اسحات ايماعامبەتوۆتىڭ ايتۋىنشا, كوللەدجدەرگە اكادەميالىق دەربەستىكتى ەنگىزۋ بويىنشا جۇمىس قولعا الىندى. بۇگىنگى كۇنى زاڭنامالىق دەڭگەيدە ۋاكىلەتتى ورگاننىڭ كوللەدجدەردە وقۋ مەرزىمدەرىن بەلگىلەۋى تۋرالى نورما الىپ تاستالدى.

«9-سىنىپ نەگىزىندە كوللەدجگە تۇسكەندەر ءۇشىن وقۋ مەرزىمىن ءۇش جارىم جىلدان 2 جىلعا دەيىن جانە 11-سىنىپ نەگىزىندە ەكى جارىم جىلدان 1,5 جىلعا دەيىن قىسقارتۋ جوسپارلانۋدا. بۇل نارىققا كادرلاردى دايارلاۋ مەرزىمىن قىسقارتىپ, ونىڭ ساپاسىن ارتتىرىپ, ءبىلىم باعدارلامالارىن جاڭارتۋعا مۇمكىندىك بەرەدى», دەدى اسحات ايماعامبەتوۆ.

ءبىلىم ءمينيسترى «جاس مامان» جوباسى اياسىندا 180 كوللەدجدىڭ ينفراقۇرىلىمىن جاڭعىرتۋ بيىل اياقتالاتىنىن ايتتى.

«جوبانىڭ قورىتىندىسى بويىنشا ءاربىر وڭىردە دامىعان ماتەريالدىق-تەحنيكالىق بازاسى, جاڭا وقۋ جوسپارلارى مەن باعدارلامالارى بار كەمىندە 7 زاماناۋي كوللەدج جۇمىس ىستەيتىن بولادى. جەرگىلىكتى اتقارۋشى ورگاندارمەن بىرلەسىپ, كوللەدجدەردى سەنىمگەرلىك باسقارۋ تەتىگىن دامىتۋدامىز. وسى جۇمىس ءارى قاراي جالعاسادى», دەدى مينيستر.