الەۋمەتتىك جەلىلەردە جاياۋ جۇرگىنشى وتكەلىمەن جولدى كەسىپ وتپەك بولعان قىزدى اۆتوبۋس قاعىپ كەتكەنى تۋرالى ۆيدەو تارادى. وقيعا الماتى قالاسىندا بولعان. قالالىق پد ءباسپاسوز قىزمەتى وقيعا بۇگىن تاڭعى 8:30-دا جەتىسۋ اۋدانىندا ورىن العانىن مالىمدەدى, دەپ حابارلايدى Egemen.kz.
الەۋمەتتىك جەلىدە تارالعان ۆيدەودان جول شەتىندە تۇرعان قىزدىڭ جاياۋ جۇرگىنشى جولاعىنا جۇگىرىپ شىققانىن كورۋگە بولادى. تەجەگىشتى باسىپ ۇلگەرمەگەن اۆتوبۋس قىزدى قاعىپ كەتكەن.
«وقيعا بۇگىن تاڭعى 8:30-دا جەتىسۋ اۋدانىندا بولعان. «لياز» اۆتوبۋسىنىڭ جۇرگىزۋشىسى ءا.جانگەلدين كوشەسىمەن سولتۇستىككە باعىتتا كەلە جاتىپ 18 جاستاعى بويجەتكەندى قاعىپ كەتتى. قىز جاياۋ جۇرگىنشىلەر جولىمەن وتپەك بولعان. بويجەتكەن وقيعا ورنىنان وبلىستىق اۋرۋحاناعا جەتكىزىلدى. اتالعان دەرەكتى قازىر جەتىسۋ اۋداندىق پب تەكسەرىپ جاتىر», دەلىنگەن حابارلامادا.