قر پارلامەنتى ءماجىلىسىنىڭ دەپۋتاتتارى «ەۋرازيالىق ەكونوميكالىق وداققا مۇشە مەملەكەتتەردىڭ تەمەكى ونىمدەرىنە اكتسيزدەر سالاسىنداعى سالىق ساياساتىن جۇرگىزۋ قاعيداتتارى تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى.
«كەلىسىم جوباسىندا 2024 جىلدان باستاپ ينديكاتيۆتىك مولشەرلەمە مەن ودان اۋىتقۋ دياپازوندارىن قولدانۋ; ەەك كەڭەسىنە اكتسيزدەردىڭ ينديكاتيۆتىك مولشەرلەمەلەرىن بەكىتۋ جانە نەگىزدەلگەن ەكونوميكالىق ورىندىلىعى بولعان جاعدايدا ولاردى وزگەرتۋ بويىنشا وكىلەتتىكتەر بەرۋ كوزدەلەدى», - دەدى ءماجىلىستىڭ پلەنارلىق وتىرىسىندا قر ۇلتتىق ەكونوميكا ءمينيسترى اسەت ەرعاليەۆ.
اكتسيزدەر مولشەرلەمەلەرىن جاقىنداستىرۋ 2024 جىلدان باستاپ جۇزەگە اسىرىلاتىن بولادى. ءاربىر بەس جىل سايىن بىرىڭعاي ينديكاتيۆتىك مولشەرلەمە جانە ودان اۋىتقۋ دياپازونى بەلگىلەنەدى.
ۇلتتىق ەكونوميكا ءمينيسترى حابارلاعانداي, 2024 جىلى سيگارەتتەرگە قاتىستى ينديكاتيۆتك مولشەرلەمە 1000 دانا ءۇشىن 35 ەۋروعا بالامالى مولشەردە ۇلتتىق ۆاليۋتادا بەلگىلەنگەن. ۇيلەسىمدىلىككە قول جەتكىزۋ ماقساتىندا سيگارەتتەرگە ارنالعان اكتسيزدەردىڭ ناقتى مولشەرلەمەلەرى 2024 جىلى ينديكاتيۆتىك مولشەرلەمەدەن 20 پروتسەنتتەن اسپاي, از جاعىنا جانە كوبىرەك جاعىنا اۋىتقۋى مۇمكىن.
«زاڭ جوباسى تەمەكى ونىمدەرىنە ارنالعان اكتسيز مولشەرلەمەلەرىنىڭ ۇلعايۋى ەسەبىنەن بيۋدجەتكە قوسىمشا ءتۇسىمدى قامتاماسىز ەتەدى. كەلىسىم ەۋرازيالىق ەكونوميكالىق وداققا مۇشە مەملەكەتتەردىڭ اۋماعىندا تەمەكى ونىمدەرىنىڭ اكتسيزىن سالۋ سالاسىندا بىرىڭعاي پراكتيكا قولدانۋدى قامتاماسىز ەتۋگە مۇمكىندىك بەرەدى», - دەدى اسەت ەرعاليەۆ.