تۇركىستان قالاسىن سانيتارلىق تازالاۋعا 83 ارنايى تەحنيكا جۇمىلدىرىلعان. الداعى ۋاقىتتا ولاردىڭ سانىن 100-دەن اسىرۋ جوسپاردا بار. تازالىق ناۋقانىنا دايىندىقپەن تانىسقان وبلىس اكىمى ومىرزاق شوكەەۆ كۇشەيتىلگەن رەجيمگە كوشۋدى تاپسىردى. قالا كوشەلەرىن كۇل-قوقىستان تازارتىپ, جولداردى جۋعا ارنالعان سان الۋان ءتۇرلى تەحنيكا تۇركىستان كوشەلەرىنە شىقتى. اتالعان جۇمىستار تىنىمسىز جۇرگىزىلەتىن بولادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
تۇركىستان قالاسىندا تازالىق ناۋقانى ءجۇرىپ جاتىر. ءار سەنبى كۇنى قالا اۋماعىندا جالپىحالىقتىق سەنبىلىك ۇيىمداستىرىلۋدا. شاراعا اتسالىسقان ازاماتتار العىس حاتپەن ماراپاتتالادى. قالانى قوقىستان تازارتىپ, تازالىقتى ساقتاۋعا جاردەم بەرىپ, جاناشىرلىق تانىتقان جاندار تال ەگۋ جۇمىستارىنا دا بەلسەندى قاتىسۋدا. قالا تۇرعىندارى ءوز اۋلالارى مەن كوشە اۋماقتارىنداعى قوقىستار, ارىقشا ىشتەرىن تازالاسا, قىزمەتكەرلەر مەكەمە ماڭدارىنا تازالىق جۇمىستارىن جۇرگىزۋدە.
قالاداعى قۇرىلىس نىساندارىندا جۇرگىزىلىپ جاتقان جۇمىستاردىڭ بارىسىمەن تانىسقان وبلىس باسشىسى شاھاردى جارىقتاندىرۋدا قولعا الىنعان جاڭا جوبالارمەن تانىستى. تۇركىستانداعى بارلىق ءىرى عيماراتتار, ساياباقتار, كوپىرلەر مەن دەمالىس ورىندارى ءبىر ۇلگىدە جارىقتاندىرىلىپ, قالاعا قايتالانباي رەڭك بەردى. كونە شاھار بىرنەشە باعىتتا كوركەيىپ, زاماناۋي تەحنولوگيالاردىڭ كومەگىمەن «اقىلدى قالاعا» اينالۋدا.