ۇلكەن باسشىلار كىشى قىزمەتكەرلەردىڭ جۇمىسىن تەكسەرگەندە ولاردىڭ بايانداماسىن تىڭداۋمەن عانا شەكتەلۋ قازىرگى كەزدە دامىعان پراكتيكا بولىپ وتىر. باستىقتاردىڭ ءبارى دەمەسەك تە نەگىزگى بولىگى ورىنتاعىنان كوتەرىلىپ, جەرگىلىكتى جەردى ءوز كوزىمەن كورىپ, سونداعى قىزمەتكەرىنىڭ ءىس-ارەكەتتەرىن حالىقتان سۇرامايدى. وسى تۇرعىدان العاندا سقو پد باستىعى, پوليتسيا پولكوۆنيگى مارات تولەباەۆتىڭ ىستەرى كوپكە ۇلگى بولعانداي.
ول كىشى قىزمەتكەرلەردىڭ جۇمىس بارىسىن جەرگىلىكتى جەرلەرگە بارىپ تەكسەرەدى. جۋىردا ول قىزىلجار اۋدانىنداعى ياكور اۋىلدىق وكرۋگىنىڭ تۇرعىندارىمەن كەزدەسىپ, حالىقتان ۋچاسكەلىك ينسپەكتورلاردىڭ جۇمىس ناتيجەسىن ءبىلدى.
كەزدەسۋدە مارات تولەباەۆ وبلىستىق جانە اۋداندىق پوليتسيا باسشىلىعى ءۇشىن وبلىستىڭ ءار تۇرعىنىنىڭ پىكىرى ماڭىزدى ەكەنىن اتاپ ءوتتى. ياكور – قالا ماڭىنداعى اۋىل. جاقىن ماڭدا كولىك كوپ جۇرەتىن جول بار, جازدا قالا تۇرعىندارى دەم الۋ ءۇشىن ءجيى كەلەدى, سونىمەن قاتار كەلگەندەردىڭ ىشىندە قىلمىستى كاسىپ قىلعاندارى دا بولۋى مۇمكىن. ۋچاسكەلىك ينسپەكتورلار -پوليتسيا اعا لەيتەنانتى الىبەك ەلۋباەۆ پەن لەيتەنانت باحتيار سادۋوۆ ءتورت اۋىلعا قىزمەت كورسەتەدى: ياكور, ولشانكا, ۆيشنەۆكا جانە ۆوزنەسەنكا. ۋچاسكەدە تۇراتىن حالىقتىڭ سانى - 2585 ادام. وتكەن جىلى سول ايماقتا 19 قىلمىس تىركەلدى, ونىڭ 90% اشىلدى. ۋچاسكەلىك پۋنكت ءبىر قاباتتى عيماراتتا ورنالاسقان جانە ازاماتتاردى كۇندەلىكتى قابىلداۋعا قاجەتتى بارلىق زاتتارمەن جابدىقتالعان, ءۇش بولمەسى بار.
كەزدەسۋدە مارات تولەباەۆ قاتىسۋشىلاردىڭ پىكىر-ۇسىنىستارىن تىڭدادى جانە كوپشىلىكتىڭ قوشەمەتىمەن اۋىلدىڭ جەتى تۇرعىنىنا قوعامدىق ءتارتىپ پەن قاۋىپسىزدىكتى قامتاماسىز ەتكەنى, بەلسەندى ومىرلىك ۇستانىمى ءۇشىن العىس حاتتار تابىس ەتتى. كەزدەسۋ سوڭىندا پد باستىعى ازاماتتاردى جەكە قابىلدادى. وبلىستىق پوليتسيا باسشىلىعىنىڭ اۋىل تۇرعىندارىمەن, ونىڭ ىشىندە وبلىستىڭ الىس اۋداندارى تۇرعىندارىمەن كەزدەسۋ تاجىريبەسى تۇراقتى وتكىزىلەدى جانە جالعاساتىن بولادى.
سولتۇستىك قازاقستان وبلىسى