نۇر-سۇلتان قالاسىنىڭ پوليتسيا دەپارتامەنتى جەرگىلىكتى پوليتسيا قىزمەتى باسقارماسى ءبولىمىنىڭ باسشىسى ازامات سادىقوۆ ونلاين بريفينگتە كارانتيندىك شارالاردىڭ ساقتالۋىن انىقتاۋ ماقساتىندا 540 رەيد جۇرگىزىلگەنىن ءمالىم ەتتى. بۇل تۋرالى Egemen.kz قالا اكىمدىگىنىڭ رەسمي سايتىنا سىلتەمە جاساپ حابارلايدى.
«قالا اۋماعىندا كارانتين شارالارىنىڭ جالعاسۋىنا بايلانىستى پوليتسيا دەپارتامەنتى شاعىن جانە ورتا بيزنەس وبەكتىلەرىنىڭ, سونداي-اق ەلوردا تۇرعىندارى مەن قوناقتارىنىڭ كارانتين رەجيمىن ساقتاۋىنا قاتىستى الدىن-الۋ جۇمىستارىن جۇرگىزۋدە. ەپيدەميولوگيالىق تالاپتاردى بۇزاتىن وبەكتىلەر – كوڭىل كوتەرۋ ورىندارىنا, ءدامحانالار مەن مەيرامحانالارعا, كاراوكەلەر مەن بارلارعا جانە ساۋدا ورتالىقتارىنا ەرەكشە نازار اۋدارىلادى», دەيدى ازامات سادىقوۆ.
ول ءوز سوزىندە ۋچاسكەلىك پوليتسيا ينسپەكتورلارىنان, سەس-ءتىڭ, اۋداندىق اكىمدىكتەردىڭ وكىلدەرى مەن ەرىكتىلەردەن قۇرالعان ءموبيلدى توپتار رەيدتىك ءىس-شارالار جۇرگىزىپ, كارانتين رەجيمىن بۇزۋشىلاردى انىقتاپ جاتقانىن ايتىپ ءوتتى.
وسى جىلدىڭ باسىنان بەرى ءموبيلدى توپتار 540 رەيد جۇرگىزىپ, 340 كارانتين رەجيمىن بۇزۋ فاكتىسىن انىقتادى:
- تۇنگى كلۋبتاردا, ءدامحانالاردا, مەيرامحانالاردا, كومپيۋتەرلىك كلۋبتاردا – 278;
- شاشتارازداردا, ماسساج سالوندارىندا, ساۋنالار مەن سۇلۋلىق سالوندارىندا – 17;
- دۇكەندەردە, ساۋدا ورتالىقتارىندا, بازارلاردا – 35.
«سانيتاريالىق-ەپيدەميولوگيالىق باقىلاۋ دەپارتامەنتى ءمااس-قا 40-تان استام مەكەمەگە قاتىستى 50-دەن اسا ماتەريال (اقبتك-ءنىڭ 462-بابى) جولداعان, ماتەريالدار قارالۋ ساتىسىندا. ءمااس شەشىمىمەن 20-دان استام مەكەمە اكىمشىلىك جاۋاپكەرشىلىككە تارتىلىپ (اقبتك-ءنىڭ 462-بابى), قىزمەتى توقتاتىلدى. كارانتين رەجيمىن بۇزۋ فاكتىلەرىن انىقتاۋ بويىنشا جۇمىستار جالعاسۋدا جانە تۇرعىندارمەن كارانتين رەجيمىن ساقتاۋعا قاتىستى ءتۇسىندىرۋ جۇمىستارى جۇرگىزىلۋدە», دەپ ۆەدومستۆو وكىلى ءسوزىن اياقتادى.