قازاقستان فرانتسياداعى ەلشىcى جان عاليەۆ «D. A. E.» كومپانياسىنىڭ باسشىسى داۆيد امميومەن كەزدەستى.
كەلىسسوزدەر بارىسىندا فرانتسۋز كاسىپكەرى جەرگىلىكتى شيكىزات پەن جۇمىس كۇشىن پايدالانا وتىرىپ, الماتى وبلىسىندا ەشكى سۇتىنەن ىرىمشىك ءوندىرىسىن اشۋ تۋرالى جوسپارلارىمەن ءبولىستى.
وندىرىسكە باستاپقى ينۆەستيتسيالاردىڭ كولەمى 1 ملن. ەۋرونى قۇرايدى. جوبانى قارجىلاندىرۋعا «Kairos Advice» حالىقارالىق ينۆەستيتسيالىق-كونسالتينگتىك كومپانياسىنىڭ باس ديرەكتورى ايگۇل ساينوۆا دا قاتىسادى. ءوندىرىستى دامىتۋ ءۇشىن فرانتسيادان اسىل تۇقىمدى مال يمپورتى, سونداي-اق تەحنولوگيالار ترانسفەرى مەن تاجىريبەمەن ءبولىسۋ كوزدەلەدى.
ەلشى بۇل جوبا قازاقستان مەن فرانتسيا اراسىنداعى ىنتىماقتاستىقتىڭ باسىم سالالارىنىڭ ءبىرى بولىپ تابىلاتىن اۋىل شارۋاشىلىعىنا سايكەس كەلەتىنىن اتاپ ءوتتى. ونىڭ ايتۋىنشا, ەشكى سۇتىنەن جاسالعان ىرىمشىكتىڭ ەاەو, قحر جانە ورتالىق ازيا ەلدەرىنىڭ نارىقتارىنا جەتكىزۋدىڭ ەلەۋلى الەۋەتى بار. ەلشى اتالعان جوباعا قر ءسىم, «Kazakh Invest «ۇك» اق جانە باسقا دا مۇددەلى ۆەدومستۆولار تاراپىنان قاجەتتى سۇيەمەلدەۋ كورسەتىلەتىنىنە سەندىردى.
كەزدەسۋ قورىتىندىسى بويىنشا د.امميو قازاقستان ەلشىلىگىنە قولداۋ كورسەتكەنى ءۇشىن العىسىن ءبىلدىردى. فرانتسۋز ينۆەستورى الداعى ۋاقىتتا جوبانى باستاپ, ەشكى ىرىمشىگىنىڭ العاشقى پارتياسىن تۇتىنۋشىلارعا ۇسىنۋ ءۇشىن قازاقستانعا بارۋدى كوزدەپ وتىر.