ەلورداداعى «ديپلومات» قوناق ۇيىندە «قازاقستان» ۇلتتىق ارناسىنىڭ 2013 جىلعى تەلەۆيزيالىق ماۋسىمى قورىتىندىلاندى. ۇلتتىق ارنانىڭ ايرىقشا جوبالارى اتاپ ءوتىلىپ, جوبا اۆتورلارى مەن پروديۋسەرلەرى, رەجيسسەرلەر مەن اكتەرلەر ماراپاتتالدى.
ەلورداداعى «ديپلومات» قوناق ۇيىندە «قازاقستان» ۇلتتىق ارناسىنىڭ 2013 جىلعى تەلەۆيزيالىق ماۋسىمى قورىتىندىلاندى. ۇلتتىق ارنانىڭ ايرىقشا جوبالارى اتاپ ءوتىلىپ, جوبا اۆتورلارى مەن پروديۋسەرلەرى, رەجيسسەرلەر مەن اكتەرلەر ماراپاتتالدى.
سوڭعى جىلدارى «قازاقستان» رترك» اكتسيونەرلىك قوعامى وتاندىق ونىمدەردى دامىتۋ جولىنا بەت بۇرىپ كەلەدى. ونىڭ ىشىندە وتاندىق سەريالدار ءتۇسىرۋ ۇلتتىق ارنا ۇجىمىنىڭ ەڭبەگىن جاڭا ءبىر بەلەسكە كوتەرگەندەي. بيىلعى قاراشا ايىنان باستاپ ارنا كورەي جانە تۇرىك تەلەحيكايالارىنان تولىقتاي باس تارتىپ, تەك وتاندىق ونىمدەرگە بەت بۇرعانى بارشاعا ءمالىم. بۇل ورايدا «قازاقستاننىڭ» حابار تاراتۋ كەستەسىنە ايتارلىقتاي وزگەرىس ەنىپ, وتاندىق تەلەحيكايالاردىڭ سانى ارتتى دەسەك, سالتاناتتى ماراپاتتاۋ راسىمىندە وسى ىسكە بەلسەنە ارالاسىپ, لايىقتى ۇلەس قوسىپ جۇرگەن ادامدار قۇرمەتكە بولەندى.
بيىلعى ماۋسىمدى قورىتىندىلاعان «قازاقستان» ۇلتتىق ارناسىنىڭ باسشىسى نۇرجان مۇحامەدجانوۆا تەلەارنا وتاندىق سەريالدار ءتۇسىرۋدى 2009 جىلى قولعا العانىن, سودان بەرى بۇگىنگە دەيىن تۇسىرىلگەن تەلەحيكايالاردىڭ ۇزىن سانى 30-عا, ال, جالپى ۇلتتىق ارنانىڭ ءونىمى 628-گە جەتكەنىن ايتتى. «2010 جىلى ەكرانعا جالپى سانى 84 بولىمنەن تۇراتىن ەكى تەلەحيكايا شىقسا, 2011 جىلى كورەرمەندەر نازارىنا جەتى تەلەحيكايا ۇسىنىلدى. 2012 جىلى تەلەارنا تەلەحيكايالاردىڭ سانىن 14-كە جەتكىزە وتىرىپ, وتاندىق ءونىم كولەمىن ەكى ەسەگە ارتتىردى. ۇلتتىق ارنا ءارتۇرلى باعىتتاعى تاقىرىپتاردى قامتىپ قانا قويمايدى. ەلىمىزدىڭ جەتكەن جەتىستىكتەرىن, سىندارلى ساياساتىن ۇلتجاندىلىقپەن, وتانشىلدىقپەن جۇزەگە اسىرىپ وتىر. بۇل ورايدا شىعارماشىلىق ۇجىمنىڭ ەڭبەگى وتە ناتيجەلى. بىراق, جاقسى ونىمدەردى ەلگە ۇسىنۋدا تەك شىعارماشىلىق ۇجىمنىڭ ەڭبەگى جەتكىلىكسىز بولار ەدى. ءبىز ۇلكەن-ۇلكەن ۇجىمدارمەن, پروداكشن ستۋديالارمەن بىرگە ەڭبەك ەتەمىز. جاڭا جىلدىڭ قارساڭىندا ءوزارا ارىپتەستىكتە بىرگە ەڭبەك ەتكەن شىعارماشىلىق ادامدارىنا العىس ايتقاندى ءجون كورىپ وتىرمىز», – دەدى تەلەارنا باسشىسى.
سالتاناتتى ماراپاتتاۋ راسىمىندە قازاق ادەبيەتىنىڭ كلاسسيكالىق تۋىندىسىن العاش ەكرانداعانى ءۇشىن «اپكە» تەلەحيكاياسىن ءتۇسىرۋشى شىعارماشىلىق توپ, جاستار تاقىرىبىن كرەاتيۆتى كوزقاراستا كورسەتكەنى ءۇشىن «دوستار» سيتكومى, كرەاتيۆتى رەجيسسەرلىك شەشىم اتالىمى بويىنشا «سۇڭقار» تەلەحيكاياسىنىڭ رەجيسسەرى جانتاي قىدىراليەۆ, تاريحي تۇلعالار تاعدىرىن ءساتتى شىعارعانى ءۇشىن «ۇلت ماقتانىشى» دەرەكتى ءفيلمى, انيماتسيا سالاسىندا تاربيەلىك تاقىرىپتى اشقانى ءۇشىن «ءالي مەن ايا» ءمۋلتفيلمى, بالالارعا ارنالعان تانىمدىق سەريال اتالىمى بويىنشا «تومپاق» تەلەحيكاياسى ۇزدىك دەپ تانىلىپ, ماراپاتقا يە بولدى. سونىمەن قاتار, اسكەري-پاتريوتتىق تاربيەنى دامىتۋعا ۇلەس قوسقانى ءۇشىن «كوك تارلاندارى», ۇستاز ماماندىعىن دارىپتەگەنى ءۇشىن «ۇستاز», دارىگەر ماماندىعىن دارىپتەگەنى ءۇشىن «جەدەل جاردەم», بولىمشەلىك پوليتسەيلەردىڭ جۇمىسىنا ەلدىڭ سەنىمىن نىعايتۋعا ۇلەس قوسقانى ءۇشىن «اۋىل ساقشىسى», دەنە تاربيەسى مەن سپورتتى ناسيحاتتاعانى ءۇشىن «وليمپ شىڭى» تەلەحيكاياسى جەڭىمپاز دەپ تانىلدى.
«ەگەمەن-اقپارات».