كەشە ۇكىمەت باسشىسى سەرىك احمەتوۆتىڭ قاتىسۋىمەن وتكەن القالى جيىندا وسى ساۋال توڭىرەگىندەگى ماسەلەلەر تالقىلاندى. يندۋستريا جانە جاڭا تەحنولوگيالار مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ ەتالون ورتالىعىندا بولعان اتالمىش جيىنعا ورتالىق مەملەكەتتىك ورگاندار, ۇلتتىق كومپانيالار, سالالىق قاۋىمداستىقتار باسشىلارى جانە باسقا دا جاۋاپتى تۇلعالار قاتىستى. وندا ەلىمىزدىڭ تەحنيكالىق رەتتەۋ جانە مەترولوگيا جۇيەسىن جەتىلدىرۋ شارالارى ءسوز بولدى.
كەشە ۇكىمەت باسشىسى سەرىك احمەتوۆتىڭ قاتىسۋىمەن وتكەن القالى جيىندا وسى ساۋال توڭىرەگىندەگى ماسەلەلەر تالقىلاندى. يندۋستريا جانە جاڭا تەحنولوگيالار مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ ەتالون ورتالىعىندا بولعان اتالمىش جيىنعا ورتالىق مەملەكەتتىك ورگاندار, ۇلتتىق كومپانيالار, سالالىق قاۋىمداستىقتار باسشىلارى جانە باسقا دا جاۋاپتى تۇلعالار قاتىستى. وندا ەلىمىزدىڭ تەحنيكالىق رەتتەۋ جانە مەترولوگيا جۇيەسىن جەتىلدىرۋ شارالارى ءسوز بولدى.
ەلباسى «قازاقستان-2050» ستراتەگياسىندا قالىپتاسقان مەملەكەتتىڭ جاڭا ەكونوميكالىق ساياساتىنىڭ باسىم مىندەتى رەتىندە ەڭ جاڭا تەحنولوگيالىق ستاندارتتارعا سايكەس وندىرىستىك اكتيۆتەردى جاڭارتۋ قاجەتتىگى مەن ەڭ باسەكەگە قابىلەتتى سالالاردا وتاندىق ءوندىرىس ءۇشىن جاڭا نارىقتىق ورتانى قالىپتاستىرۋ ستراتەگياسىن ازىرلەۋدى ايتقان بولاتىن.
كەشەگى جيىندا, مىنە, وسى باعىتتا اتقارىلىپ جاتقان جۇمىستار جايى, كەدەندىك وداق پەن بىرىڭعاي ەكونوميكالىق كەڭىستىك شەڭبەرىندەگى ينتەگراتسيالىق ۇدەرىستەردى تەرەڭدەتۋ جاعدايىندا قازاقستاننىڭ تەحنيكالىق رەتتەۋ مەن مەترولوگيا جۇيەسىن دامىتۋ ماسەلەلەرى, سونداي-اق, وتاندىق ونىمدەر ساپاسىن جانە قازاقستاندىق مازمۇن ۇلەسىن ارتتىرۋ جولدارى قارالدى.
نەگىزىنەن بىرىڭعاي ەكونوميكالىق كەڭىستىك ۇردىستەرى كەزىندە, سونىمەن قاتار, دسۇ-عا كىرۋ پەرسپەكتيۆاسى ەسەپكە الىنعان شاقتاردا بۇل ماسەلەلەردىڭ ماڭىزى زور ەكەندىگى ايتپاسا دا تۇسىنىكتى. ياعني, ءدال تەحنيكالىق رەتتەۋ وتاندىق ءونىمدى ءتيىمدى رىنوكقا جىلجىتۋدىڭ تاپتىرماس ءتاسىلى بولىپ تابىلادى. وسىنى ەسكەرگەن جاۋاپتى ورگاندار جاعدايعا بارىنشا تالداۋ جۇرگىزگەن ەكەن. تالداۋ ازاماتتار ءومىرى مەن دەنساۋلىعىنىڭ قاۋىپسىزدىگى جاعدايىنا, ەلدىڭ ەكونوميكالىق دامۋىن تۇراقتى ۇستاۋعا, يننوۆاتسيالار ەنگىزۋ مەن ءوندىرىستى ارتاراپتاندىرۋعا اسەر ەتەتىن تەحنيكالىق رەتتەۋ جۇيەسىندە جەتىلمەگەن ورىنداردىڭ بار ەكەندىگىن كورسەتىپ وتىر. ال بۇل كەمشىلىكتەردىڭ وتاندىق ءونىمنىڭ باسەكەگە قابىلەتتىلىگى مەن تەحنولوگيالىعىنا كەرى اسەرىن تيگىزەتىنى انىق. بۇل جايىندا كەڭەستە بايانداما جاساعان يندۋستريا جانە جاڭا تەحنولوگيالار مينيسترلىگى تەحنيكالىق رەتتەۋ جانە مەترولوگيا كوميتەتىنىڭ توراعاسى ءبىرجان قانەشەۆ مالىمدەدى. ول ءوز سوزىندە, سونداي-اق, كەدەن وداعى شەڭبەرىندە بىرىڭعاي قازاقستاندىق ۇلگىنى قالىپتاستىرۋ ماقساتىندا مەملەكەتتىك ورگاندار تەحنيكالىق رەگلامەنتتەر جوبالارىن ازىرلەۋ كەرەكتىگىن, مەملەكەتتىك ورگاندار قۇزىرەتىنە كىرەتىن ماسەلەلەر بويىنشا ۇسىنىستار دايىنداۋ ءۇشىن ساراپتامالىق كەڭەستەر قۇرۋ جايىن تىلگە تيەك ەتتى. سونىمەن قاتار, بايانداما بارىسىندا كەدەن وداعىنىڭ تەحنيكالىق رەگلامەنتتەرى جوبالارىن ازىرلەۋ مەن بەيىمدەۋ بويىنشا وڭىرلىك شتابتار قۇرۋ, ءىرى ساۋدا ۇيىمدارىنىڭ اينالاسىندا كونسورتسيۋمدار قۇرۋ بويىنشا جۇمىستى ۇيىمداستىرۋ جونىندە ۇسىنىستار ايتىلدى.
كوميتەت توراعاسىنىڭ اتاپ وتۋىنشە, اتالعان تەحنيكالىق رەگلامەنتتەر كەلىسسوزدەر بارىسىندا قازاقستان مۇددەسىن قورعايتىن دەلەگاتسيانىڭ قولىنا تۇسپەس بۇرىن ءتورت مارتە ساراپتامالىق كەڭەستىڭ قاراۋىنان وتەدى. وسى ورايدا پرەمەر-مينيستر بۇل ماسەلەگە زور جاۋاپكەرشىلىكپەن قاراۋدى تالاپ ەتتى. سونىمەن قاتار, ول قازىرگى ۋاقىتتا مەملەكەتتىك ورگانداردىڭ جانىنداعى ساراپتامالىق كەڭەستەردىڭ جۇمىسى تۇراقسىز ەكەندىگىن دە باسا ايتتى. «ەرىنبەگەننىڭ ءبارى دە وعان قاتىسادى. بۇگىن بىرەۋى, ەرتەڭ باسقاسى. سوندىقتان ۇستانىم جوعالادى. وسىدان بارىپ بىزدەگى بارلىق پروبلەمالار تۋىندايدى. كەلىسسوزدەر ۇدەرىسى دە تۇسىنىكسىز جۇرەدى. دەمەك, ءبىز بولىنگەن رەسۋرستار اياسىندا جاڭا شتابتاردىڭ شتاتتىق سانىن ايقىندايتىن بولامىز. ولار تۇراقتى جانە جەدەل بولۋى ءتيىس», دەدى س.احمەتوۆ.
ب.قانەشەۆ ءسوز اراسىندا قازاقستانداعى مەترولوگيا تۋرالى زاڭنىڭ 16-شى بابى ورىندالماي وتىرعاندىعىنا توقتالدى. «بىزدە مەترولوگيا تۋرالى جاقسى زاڭ بار. دەگەنمەن, وسى زاڭنىڭ 16-شى بابى سالالىق مەملەكەتتىك ورگانداردا, ۇلتتىق كومپانيالاردا جانە ءىرى وندىرىستەردە مەترولوگيالىق قىزمەتتىڭ بولۋىن تالاپ ەتەدى. بۇل باپ ورىندالماي وتىر. سونىڭ سالدارىنان كادر جەتىسپەۋدە», دەدى ول. بۇعان بايلانىستى پىكىر قوسقان ۇكىمەت باسشىسى زاڭ نورماسى تالابىنىڭ ورىندالماۋىنا مينيسترلىكتەر مەن جاۋاپتى ۆەدومستۆولاردىڭ وزدەرى كىنالى ەكەندىگىن جەتكىزدى.
«دەمەك, زاڭ نورماسى تۇسىنىكسىز جاسالعان. زاڭنىڭ بۇل نورماسىن ورىنداماعانى ءۇشىن جاۋاپكەرشىلىك جوق. ياعني, سىزدەر زاڭ جازىلعاندا جاۋاپكەرشىلىك تانىتپايسىزدار. شاعىمدانا بەرگەنشە, جۇمىستى كۇشەيتىڭىزدەر. نورماتيۆتىك-قۇقىقتىق اكتى ازىرلەپ, باقىلاۋدى كۇشەيتىڭىزدەر. زاڭنامانى ساقتاماعاندار اشكەرەلەنسىن», دەدى س.احمەتوۆ. وسى رەتتە, پرەمەر-مينيستر مينيسترلىكتەر مەن ۆەدومستۆولار كەز كەلگەن پروبلەمانى شەشۋ ءۇشىن ولاردى پرەزيدەنتتىك نەمەسە ۇكىمەتتىك دەڭگەيگە كوتەرۋدى ادەتكە اينالدىرىپ وتىرعاندىعىن ەسكەرتىپ, مينيسترلەردىڭ جۇمىسقا بەلسەندى بولۋىن تالاپ ەتتى. ۇكىمەت باسشىسى ءسوز اراسىندا ەلىمىزدە بۇگىنگە دەيىن قازىرگى زامان تالاپتارىنا سايكەس كەلمەيتىن ەت وڭدەيتىن كەشەندەر سالىنىپ جاتقاندىعىنا توقتالىپ, جاقىندا ىسكە قوسىلعان بىرقاتار ەت وڭدەۋ كەشەندەرىن سىنعا الدى. ماسەلەن, سوڭعى سالىنعان الماتى, شىعىس قازاقستان وبلىستارىنداعى ەت وڭدەۋ كەشەندەرىنىڭ «استانا اگروونىم» كاسىپورنىمەن سالىستىرۋعا كەلمەيتىنىن اتاپ ءوتتى. ويتكەنى, «استانا اگروونىم» كومپانياسىنىڭ كاسىپورنى 5 جىل بۇرىن سالىنسا دا, وندا بارلىق تالاپتار ەسكەرىلگەن. ال جاقىندا ىسكە قوسىلعان تۇركيالىق نەمەسە قىتايلىق تەحنولوگيا كەشەندەرى تەك ەتتى شابۋعا عانا, ياعني ونى بولشەكتەپ, قانداي دا ءبىر مۇزداتقىشقا ورنالاستىرۋعا ارنالعان. ءونىم ساپاسى مەن ونى ساقتاۋدىڭ تالاپتارى ماردىمسىز. پرەمەر-مينيستر قايتا وڭدەيتىن كاسىپورىنداردى سالۋ كەزىندە ولار قۇرىلىستىڭ باسىنان باستاپ بۇگىنگى ستاندارتتارعا سايكەس جوبالانۋى ءتيىس ەكەنىن قاداپ ايتتى. بۇل, تالاپتار ەسكەرىلمەسە, كاسىپورىننىڭ ونىمدەرى كەدەن وداعى اياسىندا دا باسەكەگە قابىلەتتى بولمايدى, دەدى ۇكىمەت باسشىسى.
كەڭەس قورىتىندىسى بويىنشا پرەمەر-مينيستر تەحنيكالىق رەتتەۋ جانە مەترولوگيا جۇيەسىن ودان ءارى جاڭعىرتۋ مەن دامىتۋ بويىنشا جول كارتاسىن قالىپتاستىرۋعا وكىم ەتتى. وسىعان وراي س.احمەتوۆ يندۋستريا جانە جاڭا تەحنولوگيالار مينيسترلىگىنە, باسقا دا مۇددەلى مەملەكەتتىك ورگاندارعا ءبىر اي ىشىندە ۇكىمەتكە جول كارتاسى جوباسىن ەنگىزۋدى تاپسىردى. ۇكىمەت باسشىسى, سونداي-اق, وكىلەتتى مەملەكەتتىك ورگاندارعا جانە «اتامەكەن» وداعى» ۇلتتىق ەكونوميكالىق پالاتاسىنا باسقا دا بىرقاتار تاپسىرمالار بەردى.
س.احمەتوۆ تەحنيكالىق رەتتەۋ جانە مەترولوگيا جۇيەسىن جەتىلدىرۋگە قارجى اياماۋ قاجەتتىگىن باسا ايتتى. سەبەبى, تاۋارلاردىڭ ساپالى بولۋى قاي جاعىنان السا دا ەل ءۇشىن وتە ماڭىزدى ماسەلە. «مەن ەكونوميكا مينيسترلىگىنە تاپسىرما بەرەمىن. بۇل سالادان بيۋدجەت قاراجاتىن ۇنەمدەۋدىڭ قاجەتى جوق. بۇل جۇيەنى كەڭەيتۋ مەن جاڭعىرتۋدا, اسىرەسە, زەرتحانالار, ءونىم ساپاسى, تەحنيكالىق رەگلامەنتتەر بويىنشا وتىنىمدەردى قاراعان كەزدە مينيسترلىك ولاردى قولداۋى ءتيىس», دەدى ۇكىمەت باسشىسى.
ەتالون ورتالىعىندا س.احمەتوۆ, سونداي-اق, سىناق زەرتحانالارى جانە بىرىڭعاي نورماتيۆتىك- تەحنيكالىق قۇجاتتامالار مەملەكەتتىك قورىنىڭ جۇمىستارىمەن تانىستى.
دينارا بىتىكوۆا,
«ەگەمەن قازاقستان».