«شىمكەنت-كاشەمير» جشس – ءجۇندى وڭدەۋ جانە ودان يىرىلگەن جىپتەر مەن سىرىلىپ تىگىلگەن كورپەلەر شىعاراتىن زاۋىتتىڭ جۇمىسى قارقىن العان. بۇگىندە ءوندىرىستىڭ ءبىرىنشى كەزەڭى – ءجۇندى-جۋ جانە تاراۋدى العاشقى وڭدەۋ تسەحى تولىعىمەن پايدالانۋعا بەرىلدى. تسەح ەڭ الدىمەن وزىندىك ءوندىرىستى شيكىزاتپەن جاراقتاندىرۋ ءۇشىن قۇرىلعان بولاتىن. جىلىنا 2000 تونناعا دەيىن جۋىلعان جانە تارالعان ءجۇندى دايىندايدى. كاسىپورىندا نەگىزىنەن جەرگىلىكتى شيكىزات پايدالانىلۋدا.
زاۋىت ديرەكتورى, جاس كاسىپكەر سانات شاعانبەك ۇلىنىڭ ايتۋىنشا, كاسىپورىن ءوز سالاسىندا, ءوز اۋقىمى بويىنشا ەلىمىزدەگى ەڭ ۇزدىكتەردىڭ ءبىرى.
– كەڭەس ۋاقىتىنان بەرى تانىمال, ءجۇندى العاشقى وڭدەۋشى ءىرى زاۋىتتار قازىر توقتاپ قالعان. وكىنىشكە قاراي, ءوندىرىستىڭ بۇل ءتۇرى تومەن تابىستى سالاعا جاتادى جانە ۇلكەن سالىمداردى تالاپ ەتەدى. بىراق اەا-دا ورنالاسقاندىقتان جانە جەكەلەي جەڭىلدىك پەن ارتىقشىلىقتار ەسەبىنەن ءبىز جۇمىس اۋقىمىن كەڭەيتۋگە مۇمكىندىك الدىق, – دەيدى سانات شاعانبەك ۇلى.
2017 جىلى زاۋىت اينالىم قۇرالىن تولىقتىرۋعا «Bank RBK» اق بانكى ارقىلى نەسيە الدى. كاسىپورىن ءۇشىن پايىز مولشەرلەمەسى 17 %-ى قۇرادى, ونىڭ 7 %-ن «دامۋ» قورى سۋبسيديالايدى.
قازىرگى تاڭدا كاسىپورىننىڭ ەكىنشى كەزەڭىن ىسكە قوسۋ بويىنشا جۇمىستار اتقارىلۋدا. تارالعان ءجۇن تىزبەگىن وندىرەتىن تسەح دايىن تۇر. ساتىپ الىنعان قۇرىلعىلاردىڭ جارتىسى ورناتىلعان. بۇگىندە سىنامالار جۇرگىزىلۋدە.
وتاندىق ونىمدەردىڭ ساپاسى جوعارى, موڭعول, يتاليان, گرەك جانە رەسەيلىك انالوگتاردان ەش كەم تۇسپەيدى. سونداي-اق, باعاسى دا الدەقايدا قول جەتىمدى.