ەلورداداعى ۇلتتىق اكادەميالىق كىتاپحانادا تۇركولوگ-عالىم, جازۋشى, اۋدارماشى, گۋمانيتارلىق عىلىمدار اكادەمياسىنىڭ اكادەميگى, كۇلتەگىن اتىنداعى سىيلىقتىڭ لاۋرەاتى, ەۋروپانىڭ فرانس كافكا التىن مەدالىنىڭ يەگەرى نەمات كەلىمبەتوۆتى ەسكە الۋ كەشى جانە ءۇش تومدىق شىعارمالار جيناعى مەن شەتەل تىلدەرىندە باسىلىپ شىققان كىتاپتارىنىڭ تۇساۋكەسەر ءراسىمى بولىپ ءوتتى.
ەلورداداعى ۇلتتىق اكادەميالىق كىتاپحانادا تۇركولوگ-عالىم, جازۋشى, اۋدارماشى, گۋمانيتارلىق عىلىمدار اكادەمياسىنىڭ اكادەميگى, كۇلتەگىن اتىنداعى سىيلىقتىڭ لاۋرەاتى, ەۋروپانىڭ فرانس كافكا التىن مەدالىنىڭ يەگەرى نەمات كەلىمبەتوۆتى ەسكە الۋ كەشى جانە ءۇش تومدىق شىعارمالار جيناعى مەن شەتەل تىلدەرىندە باسىلىپ شىققان كىتاپتارىنىڭ تۇساۋكەسەر ءراسىمى بولىپ ءوتتى.
ەڭ الدىمەن, عۇمىرىندا تاپ كەلگەن قيىنشىلىقتى اسا زور شىدامدىلىق پەن توزىمدىلىك ارقاسىندا جەڭە ءبىلىپ, ارتىندا ونەگە قالدىرعان دارابوز دارىن نەمات كەلىمبەتوۆ عالىمدىق پەن جازۋشىلىقتى قوسا ارقالاپ, 1974 جىلى «ءشادى اقىن» اتتى تۇڭعىش زەرتتەۋلەر ەڭبەگىن جارىققا شىعارسا, ودان كەيىن «ءۇمىت ۇزگىم كەلمەيدى» اتتى حيكاياسىن, «جارلى ەمەسپىن, زارلىمىن» اتتى پوۆەستەر جيناعىن, «قازاق ادەبيەتىنىڭ ەجەلگى ءداۋىرى», «شىعىستىڭ كلاسسيكالىق پوەزياسى جانە قازاق ادەبيەتى», «ەجەلگى ءداۋىر ادەبيەتى» سياقتى كىتاپتارىن قالىڭ وقىرمانعا ۇسىندى.
عالىم-جازۋشىنىڭ ەرەن ەڭبەگىن اكادەميك سەيىت قاسقاباسوۆ: «نەمات كەلىمبەتوۆ سوناۋ 1980 جىلداردان باستاپ ەجەلگى ادەبيەتىمىزدىڭ تاريحىن ۇڭىلە دە تەرەڭدەي زەرتتەگەن ايتۋلى عالىم بولدى. ول ادەبيەتىمىزدىڭ ەرتە ءداۋىرىن تاڭىرلىك جانە يسلامدىق دەپ ەكى ۇلكەن كەزەڭگە ءبولىپ, قازاق ساحاراسىندا يسلامعا دەيىن دە جوعارى دامىعان مادەنيەت بولعانىن كورسەتتى» دەپ تۇيىندەسە, فيلولوگيا عىلىمدارىنىڭ دوكتورى قانسەيىت ابدەز ۇلى: «نەمات اعامىزدىڭ عىلىمي ەڭبەكتەرى مەن ادەبي كىتاپتارىنىڭ الەم تىلدەرى سانالاتىن – تۇرىك, قىتاي, نەمىس تىلدەرىنە اۋدارىلۋى – بۇل ەڭ الدىمەن قازاق رۋحانياتىنىڭ جەمىستى جەڭىسى دەپ بىلەمىن. دەمەك, كورنەكتى جازۋشى-دراماتۋرگ, تۇركولوگ-عالىم نەمات كەلىمبەتوۆتى قازاق وقىرمانى عانا ەمەس, الەم مويىنداعان قالامگەر دەپ باعالاعانىمىز ءجون» دەپ شىنايى باعاسىن بەرگەن بولاتىن.
ءىس-شارا بارىسىندا رەسەيلىك جازۋشى, «حۋدوجەستۆەننايا ليتەراتۋرا» باسپاسىنىڭ ديرەكتورى گەورگي پرياحين, سەناتور, قازاقستان جازۋشىلار وداعىنىڭ توراعاسى نۇرلان ورازالين, ازەربايجاننان كەلگەن مەيماندار چينگيز اليوگلى مەن ەلحان زال گاراحانلى, تۇركياداعى ميمار سينان ۋنيۆەرسيتەتىنىڭ پروفەسسورى ابدىۋاقاپ قارا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىق, ادەبيەت جانە ونەر ينستيتۋتىنىڭ ديرەكتورى ءۋاليحان قاليجان, حالىقارالىق تۇركى اكادەمياسىنىڭ پرەزيدەنتى شاكىر ىبىراەۆ, اكادەميك عاريفوللا ەسىم, جازۋشى سماعۇل ەلۋباەۆ, فيلولوگيا عىلىمدارىنىڭ دوكتورى ديقان قامزابەك ۇلى, ەلشى باقتيار تاسىموۆ, نەمات كەلىمبەتوۆتىڭ ۇلى قايرات كەلىمبەتوۆ جانە باسقالار نەمات كەلىمبەتوۆ جايلى ەستەلىكتەر ايتىپ, تۇساۋى كەسىلىپ وتىرعان كىتاپتار ءجونىندە پىكىرلەر ءبىلدىرىپ, الىپ كەلگەن سىي-سىياپاتتارىن ۇلتتىق كىتاپحانا مەن جازۋشى ۇرپاقتارىنا تابىستاپ, ەندىگى الداعى اتقارىلار ءىس-شارالار تۋرالى ءوز وي-پىكىرلەرىن ورتاعا سالدى.
بەرىك سادىر,
«ەگەمەن قازاقستان.